Baji quan

(八極拳)

Tamién Kai men bajiquan (開門八極拳)
País d'orixe  China
Fundador Desconocíu
Métodos téunicos Fundamentalmente golpaes a curtia distancia
Deporte olímpicu Non

Baji Quan o Pachi Chuan (八極拳, Bājíquán, “boxéu de los ocho estremos”) ye un arte marcial de China carauterizáu pol boxéu curtiu y esplosivu, y que ye famosu polos sos golpes de coldu. Ye orixinariu de la provincia de Hebei, nel norte de China, pero tamién ye conocíu anguaño n’otros llugares, sobre too en Taiwán. El so nome completu ye kai men baji quan (開門八極拳), que significa "puñu de los ocho estremos de la puerta abierta".

Aniciu

El baji quan llamábase orixinalmente bazi quan o "puñu qu'arrastriella" per aciu de que los puños, dexaos floxos y un pocoñín abiertos, úsense pa cutir p'abaxo como si foren un rastriellu. Pensábase qu'esti nome yera abondo toscu na so llingua nativa, asina que foi cambiáu a baji quan. El términu baji vien del clásicu taoísta I Ching, y significa una "estensión de toles direiciones". Nesti casu significa "que lo inclúi too" o "l'universu."

El primer maestru rexistráu de baji quan foi Wu Zhong (1712-1802). Maestros famosos qu'espardieron l'estilu foron Wu Xiufeng y Li Shuwen (1864-1934). Esti últimu yera de Cangzhou, Hebei, y algamó’l nomatu de "Dios de la Llanza Li". Formáu como Wu Shen (personaxe marcial masculín) de la opera de Pekín, foi tamién un lluchador espertu. La so cita más famosa ye: "Nun sé cómo ye golpiar a un home dos veces."[1] Estudiantes de Li Shuwen foron Huo Dian Ge (escolta de Pu Yi, l'últimu emperador de China), Li Chenwu (escolta de Mao Zedong), y Liu Yun Qiao (axente secretu del nacionalista Kuomintang y instructor de los escoltes de Chiang Kai Shek). Dende entós el baji quan algamó sonadía como "estilu d'escoltes". Ma Feng Tu y Ma Yin Tu introduxeron el baji nel Institutu Central Guoshu (Nanjing Guoshu Guan) onde s’esixe a tolos estudiantes.[2]

El baji quan comparte raigaños con otru arte marcial d'Hebei, el Piguazhang. Al paecer Wu Zhong, el maestru más antiguu que se conoz del llinaxe del baji, enseñó dambes artes al empar como un sistema integráu de llucha.[3] Col tiempu dixebráronse, y solamente volvió amestales Li Shuwen a finales del sieglu XVIII, principios del XIX. Como resclavu de la naturaleza complementaria d'estos dos estilos, hai una conseya que reza: "Cuando’l pigua s’axunta al baji, axorícense tolos dioses y demonios. Cuando’l baji s’axunta al pigua, los héroes sospiren al saber que nun son pa igualase a ello." [3]

Hai anguaño delles families de baji quan, como Han, Huo, Ji, Li, Ma, Qiang, Wu y la rama Wu-Tan del maestru Liu Yunqiao. Hai delles diferencies nel entrenamientu ente les variantes, pero vienen ser lo mesmo n’esencia. El titular del llinax de la familia Wu de baji quan en China ye Wu Lian Zhi. A traviés de más de cincuenta años d'entrenamientu, arrexuntó material y rexistros que foron tresmitiéndose de xeneración en xeneración.

Carauterístiques

Táctica y estratexa

El boxéu baji ye conocíu por abrir a la fuercia los brazos del oponente (qiang kai men) y por entamar ataques a los niveles altu, mediu y baxu del cuerpu (san pan lian ji). Sobre too ye útil en combate cuerpu a cuerpu, darréu que se centra en golpes de coldu, rodiya, costazu y cadril. Cuando bloquia un ataque o s’avera a un oponente, les téuniques del baji quan céntrense en cutir los principales puntos febles, sobre too nel tórax, piernes y pescuezu.

Les "seis grandes maneres d'abrir" (liu da kai) son:

  • Ding 頂: usar el puñu, coldu o costazu pa emburriar p'alantre y p'arriba.
  • Bao 抱: xuntar los brazos como p'abrazar a dalguién. Normalmente a esto sígue-y Pi 劈 (fender).[4]
  • Ti 提: llevantar la rodiya pa golpiar el muslu del oponente, o llevantar el pie pa golpiar la canía del oponente, etc.
  • Dan 單: usar un solu movimientu.
  • Kua 胯: usar el cadril.
  • Chan 纏: enguedeyar con xiru al rodiu de la moñeca, coldu y costazu.

Métodos corporales y de desplazamientu

Los desplazamientos en baji quan tienen tres carauterístiques especiales: Zhen Jiao, Nian Bu y Chuang Bu.

Estes téuniques de golpes tán rellacionaes cola medicina tradicional china, que sostién que toles partes del cuerpu tán coneutaes, tanto física como espiritualmente.

Formes

Les formes del baji divídense en rutines con y ensin armes. Hai 20 formes de puñu, qu'inclúin 12 Puños Baji d'Estructura Pequeña, Puñu Baji del Tigre Negru, Baji Dan Zhai, Baji Dan Da/Dui Da, Baji Luohan Gong, y Baji Si Lang Kuan. Hai ocho formes d'armes, qu'inclúin Liu He Da (llanza “qiang”), Chun Yang (espada “jian”), San Yin (sable “dao”), Xing Zhe Bang (palo), Pudao, y Chun Qiu (“da dao”, un espadón llargu y pesáu pa garrar a dos manes, usáu polos xenerales cuando diben a caballu).

Xeneración de potencia y métodos d'espresión

Les carauterístiques principales del baji inclúin golpaos de coldu, puñetazos de brazu/puñu, controles de cadril y golpes col costazu. Toles téuniques execútense con un puxu secu que se desendolca cola práutica. Ente los artistes marciales chinos el baji ye famosu polos sos movimientos rápidos. El baji céntrase na llucha cuerpu a cuerpu, entrando dende una distancia llarga con un carauterísticu pasu de carga (zhen jiao).

La esencia del baji quan ta nel jin, o métodos de tresmitir potencia, sobre tol fa jing (potencia esplosiva). L’estilu contién seis tipos de jin, ocho maneres diferentes de golpiar y dellos principios d'usu de la potencia. La mayoría de los movimientos del baji quan empleguen un métodu de cutir con un solu golpe dende una distancia percurtia. La mayor parte del dañu faise per aciu de l'aceleración momentánea que viaxa de la cintura al miembru y ye amás aumentada pol pasu de carga conocíu como zhen jiao.

Los mecanismos del jin desendólquense con munchos años de práutica, y el baji quan ye conocíu pol so entrenamientu trabayosu de la parte baxa del cuerpu y pola importancia que-y da a la "posición d'a caballu".[1] La so posición d'a caballu ye más alta que la d'otros típicos estilos de boxéu llargu. Netu qu'otros estilos, tien tamién la "posición del arqueru", la "posición sobre una pierna", la "posición vacía" (xubu), la "posición cayendo" (pubu), etc. Hai ocho diferentes guardies de les manes, arriendes de diferentes tipos de respiración y zhen jiao.

Los seis Poderes Carauterísticos Principales son:

  • El fundimientu (Xia Chen o Chen Zhui)
  • L’emburrión (Chong)
  • La estensión (Cheng)
  • L’enguedeyu (Chan)
  • L’encruz (Shi Zi)
  • La pulgada (Cun)

Influencies

El baji céntrase en ser más direutu, n’acabar en golpaes potentes y rápides qu'incapaciten al oponente pa siguir. Sicasí hai dellos estilos que deriven de los principales conceutos o principios del baji quan sobre cómo golpiar al oponente:

  • Ocho postures (Ba shi)
  • Métodu d'ocho movimientos (Ba shi gong)
  • Métodu d'ocho movimientos (Ba shi chui)
  • Ocho postures dobles (Shuang ba shi)
  • Ocho postures de los Guardies de Buda (Jingang ba shi)
  • Ocho postures del estilu del dragón (Longxing ba shi)

Munches d'estes formes tán tamién basaes o mezclaes col Lohan Quan, un estilu de Shaolin. El términu ba shi pue tamién referise a baji, pero hai que decatase de que’l términu úsase tamién en xingyi quan.

Bruce Lee, igual que munchos de los contemporáneos de so, estudió estilos como’l baji quan. Lee incorporó al so entrenamientu del Wing Chun movimientos útiles d'otros estilos, incluyendo’l baji.

Referencies

  1. 1 2 «BaJiQuan». Bajimen.com.
  2. ↑ Ba Zi Jie Xi: una espirica sobre’l puñu qu'arrastriella 耙子解析
  3. 1 2 Bajimen.com Piguazhang
  4. ↑ «Xingyi». Perry Lo and the Shou-Yu Liang Wushu Taiji Qigong Institute.

Enllaces esternos

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.