El Bailian Quan o Bailian Chuan (Boxéu del Llotu Blancu) yera un estilu de Kung Fu o boxéu chinu que Doshin So, el fundador del Shorinji Kempo, dicía qu'aprendiera col so primer maestru chinu, Chen Liang.
Realmente nun se conoz práuticamente nada del Llotu Blancu como estilu de Kung Fu o wushu. L’estudiosu del Shorinji Kempo Rogelio Casero creye que Doshin So nun deprendió Bailian Quan en cuantes estilu constituyíu, sinón que quixo denominar d'esta miente a les enseñances del so maestru Chen Liang pola mor de la cercanía d'esti a una sociedá secreta llamada precisamente “Sociedá del Llotu Blancu” [1].
Especúlase con que’l Boxéu del Llotu Blancu fuera un estilu secretu prauticáu nel sen de dicha Sociedá, escurque influyíu enforma polos sistemes de Shaolin darréu que los partidarios del Llotu Blancu aconceyábense de cutiu nel Monesteriu Shaolin, onde cabildraben contra la dinastía manchú Qing. Dalgunos estudiosos como Donn F. Draeger dicen que los siguidores d'esta sociedá prauticaben dellos estilos de boxéu chinu, y non unu solamente, y qu'amás del entrenamientu a mano vacía entrenábense con armes, notablemente col chiang o llanza de fueya reuta. Otros son p'asegurar que’l del Llotu Blancu yera un estilu mui rápidu y potente, de distancia media-curtia, y con un claru predominiu del usu de les manes.
Sicasí esti sistema nun paez que se divulgara muncho, quiciabes debío a un posible calter coxuntural (porque posiblemente fuera un sistema concebíu pa entrenar a combatientes en guerra), o pue que debío a la so escura rellación con una sociedá secreta. L’enquiz ta en qu'anguaño nun se sabe un vierbu d'él como tal estilu.
Per otra parte, dao que’l maestru Chen Liang fuera cabezaleru de la Sociedá de la Llanza Encarnada (Hong Qiang Hui), qu'impartía ente los siguidores un cursu d'artes marciales que duraba 128 díes, ye posible que lo qu'enseñaba Chen Liang (y que Doshin So denominó “Bailian Quan”) consistiera na preparación que se daba nesi cursu. De mou que pue que’l Bailian Quan nun fuera más qu'un conxuntu de téuniques y aplicaciones que s’enseñaben pa dar a los miembros d'aquella secta una mínima preparación marcial.
Per otra parte Doshin So allugaba l'orixe de les téuniques del Llotu Blancu nel Templu Shaolin, y venceyábales direutamente a la tradición de Bodhidharma. La mesma tesis defenden pal so estilu los maestros de Lohan Quan (Boxéu de los Arhat), qu'ente otres coses poseye 108 téuniques d'inmediata aplicación práutica en pareya. Nesti sen el Llotu Blancu lo mesmo yera una derivación del Lohan Quan onde solo s’estudiaben eses téuniques o una versión d'elles col envís de tresmitir aína della habilidá marcial.
Referencies
Enllaces esternos
- http://www.shorinjikempo-cartagena.org/Estilosrog1.htm INVESTIGACIÓN SOBRE LOS ESTILOS CHINOS QUE APRENDIÓ SO DOSHIN. 1ª PARTE, por Rogelio Casero Abellán