Bagua 八卦掌
Tamién Baguazhang (八卦掌), Baguaquan, Pa Kua Chang, Pa Kua
País d'orixe  China
Fundador Atribuyíu a Dong Haichuan
Artes enseñaes Estilu híbridu (llaves, valtos, golpes de pie y de puñu…)
Deporte olímpicu Non

Bagua (lleíu Pa Kua) o Baguazhang (bāguàzhǎng) ye una de les tres principales artes marciales chines de la escuela de Wudang, xunto col Taijiquan y el Xingyiquan. Clasifícase más de cutiu como práutica interna (neijia). Baguazhang significa lliteralmente "palma de los ocho trigrames", polos trigrames del I Ching, un de los llibros canónicos del Taoísmu.

Historia

Sun Lutang andando en círculos.

La creación del Bagua, como arte marcial formal, atribúise a Dong Haichuan, qu'al paecer deprendiera de maestros taoístes (y pueque budistes) nos montes de China a principios del sieglu XIX.[1] Nesti aniciu hai buelgues d'artes marciales que s'enseñaren y prauticaren endenantes na rexón na que vivía Dong Haichuan, combinaes cola andadera taoísta en círculos. Por mor del so trabayu como sirvidor nel palaciu imperial, Dong ablucó al emperador colos sos movimientos acionaos y la so habilidá pal combate, y convertióse n'instructor y en guardia personal de la corte. Dong Haichuan enseñó munchos años en Beixín, hasta algamar el patrociniu de la corte imperial.[2]

Discípulos famosos de Dong que llegaron a maestros foron Yin Fu, Cheng Tinghua, Song Changrong, Liu Fengchun, Ma Weiqi, Liu Baozhen, Liang Zhenpu y Liu Dekuan. Anque tuvieron el mesmu maestru, los sos métodos d'entrenamientu y espresiones de les téuniques de palma yeren estremaos. Los estilos Cheng y Liu tán seique especializaos n'”emburriar” les palmes, l'estilu Yin ye conocíu por “endolcar” les palmes, los siguidores del Song prautiquen la téunica de palma Mei Hua (“Flor de Cirolar”), y les palmes del estilu Ma son conocíes como "martiellos." Dellos estudiantes de Dong Haichuan, como Cheng Tinghua, participaron na Rebelión Boxer. En xeneral, anguaño la mayoría de prauticantes de Bagua siguen los estilos Yin (尹), Cheng (程) o Liang (梁), masque siguen esistiendo los Fan (樊), Shi (史), Liu (劉), Fu (傅), y otros (l'estilu Liu ye un casu particular, porque nun suel prauticase n'esclusiva sinón como complementu d'otros estilos). Amás hai subestilos de los anteriores, como los Sun (孫), Gao (高), y Jiang (姜), subestilos los tres del métodu Cheng.

Estilos modernos

  • Estilu Fu: Fu Zhensong 傅振嵩
  • Estilu Cheng: Cheng Tinghua 程廷華
  • Estilu Gao: Gao Yisheng 高義盛
  • Estilu Gong: Gong Baotian 宫宝田
  • Estilu Jiang: Jiang Rongqiao 姜容樵
  • Estilu Liang: Liang Zhenpu 梁振蒲
  • Estilu Liu: Liu Baozhen 劉寶珍
  • Estilu Shi: Shi Jidong 史計棟
  • Estilu Sun: Sun Lutang 孫祿堂
  • Estilu Yin: Yin Fu 尹福
  • Estilu Yin Yang (Tian): Tian Hui 田廻

Aspeutos comunes

La práutica d'andar en círculos, o "dar la vuelta al círculu" como la llamen dacuando, ye'l métodu carauterísticu de postura y entrenamientu del movimientu del Bagua. Toles formes de baguazhang usen sobre too esta forma de movese como parte integral del entrenamientu. Los prauticantes caminen alredor del borde del círculu con delles postures baxes, de cara al centru, cambiando de xemes en cuando de direición mientres executen les formes.[3] Pa un principiante'l círculu tien ente 1,80 y 3,60 m. de diámetru. Los estudiantes aprienden primero flexibilidá y alliniamientu correutu del cuerpu a traviés de los exercicios básicos, pa llueu siguir con formes más complexes y mecániques de poder interno. Anque los aspeutos internos del Bagua son asemeyaos a los del xingyi y el taijiquan, tienen una naturaleza distinta.

El Bagua inclúi un bon númberu d'estilos d'armes; dellos faen usu del disimulu, como la “pluma del eruditu” o un par de cuchiellos (los más ellaboraos, únicos d'esti estilu, son los de “cuernu de venáu”, con forma de media lluna). El Bagua tamién tien sonadía por prauticase con armes descomanadamente grandes, como'l bagua jian (八卦劍), o espada bagua, y el bagua dao (八卦刀), o sable bagua. Empléguense tamién otres armes más convencionales, como'l palu (gun), llanza (qiang), cayada (guai), espada de ganchu (gou) y la espada reuta y de doble filu (jian). Los prauticantes de Bagua son tamién conocíos por ser quien a remanar cualesquier cosa como arma usando los principios del arte.

El Bagua tien una variedá pergrande de téuniques y armes, incluyendo dellos golpes (con palma, puñu, coldu, deos, etc.), pataes, llaves d'articulaciones, valtos y una particular forma evasiva de movese en círculos. El baguazhang nun se considera un arte marcial puramente de percusión nin puramente d'agarres. Los prauticantes de Bagua son conocíos pola so habilidá pa entrar y salir fluyidamente de la trayeutoria de los oxetos. Equí ta l'orixe de la teoría de poder enfrentase a múltiples atacantes. La naturaleza evasiva del Bagua amúesala tamién la práutica de pasar pa detrás del oponente, al envís de qu'ésti nun seya quien a perxudicar al prauticante.

Anque les munches rames del Bagua son davezu enforma diferentes unes d'otres (delles, como l'estilu Cheng, tán especializaes en llucha a curtia distancia y llaves d'articulaciones, mientres qu'otres, como dellos estilos Yin, especialícense en golpiar rápido y dende lloñe), toos tienen l'andadera en círculos, métodos n'espiral y dellos métodos y téuniques (palmes qu'afuraquen, que frañen, etc.) en común.

Los movimientos del Bagua empleguen tol cuerpu con suaves aiciones d'endolcar y desendolcar, usando téuniques de mano, pasos dinámicos y proyeiciones. Los movimientos en rabasera saquen la enerxía del centru del abdome. El patrón d'andadera circular tamién crea fuercia centrípeta, permitiendo al prauticante maniobrar aína al rodiu del oponente.

Referencies

  1. ↑ Yintao, Fei and Yuliang, Fei. “Classical Baguazhang Volume IV: Wudang Baguazhang.” Trans. Joseph Crandall. Pinole, California: Smiling Tiger Martial Arts 1994.
  2. ↑ Jingru, Liu and Youqing, Ma. “Classical Baguazhang Volume II: Cheng Shi Baguazhang (Cheng Family Baguazhang).” Trans. Joseph Crandall. Pinole, California: Smiling Tiger Martial Arts 2001.
  3. ↑ Lie, Zhang. Classical Baguazhang Volume V: Yin Style Baguazhang. Trans. Joseph Crandall. Pinole, California: Smiling Tiger Martial Arts 1995.

Bibliografía

  • Robert W. Smith, Chinese Boxing, ISBN 1-55643-085-X
  • Bok Nam, Park & Dan Miller, The Fundamentals of Pa Kua Chang: The Methods of Lu Shui-T'ien As Taught by Park Bok Nam., ISBN 0-86568-173-2
  • Shou-Yu, Liang, Baguazhang : Emei Baguazhang Theory and Applications, ISBN 0-940871-30-0
  • O'Brien, Jess, Nei Jia Quan: Internal Martial Arts Teachers of Tai Ji Quan, Xing Yi Quan, and Ba Gua Zhang ISBN 1-55643-506-1
  • Frantzis, Bruce Kumar, The Power of Internal Martial Arts: Combat Secrets of Ba Gua, Tai Chi, and Hsing-I ISBN 1-55643-253-4

Enllaces esternos

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.