Atemi (当て身) ye un términu que nes artes marciales xaponeses designa los golpes al cuerpu,[1] normalmente por oposición a otres téuniques como “kansetsu waza” (llaves a les articulaciones), “shime waza” (estrangulamientos), téuniques d'agarre y proyeiciones. Los atemi pueden solmenase con cualesquier parte del cuerpu propiu a cualesquier parte del cuerpu del adversariu. Pueden emplegar la percusión o bien la fuercia ”suave”. Un arte marcial típicu qu'aveza emplegar l'atemi de percusión ye’l Kárate. L’allugamientu de los nervios y de los puntos de presión, tal como s’usa en dellos métodos d'acupresión, tamién suel ser un factor d'escoyeta de los oxetivos pal atemi(ver kyusho).
Hai golpes a partes vitales del cuerpu que pueden matar o incapacitar al contrariu: nel plexu solar, nes vidayes, xusto embaxo la nariz, nos güeyos, nos xenitales, o embaxo la caxada. Les artes marciales tradicionales de Xapón (antecesores del yudu, jujutsu y aikido) nun prautiquen davezu l'atemi, darréu que se supón que s’usaben nel campu batalla contra enemigos revistíos d'armadura. Sicasí hai delles esceiciones.
En sigo mesmos los atemi pueden ser téuniques completes, pero tamién úsense muncho pa romper un instante l'equilibriu del contrariu (ver kuzushi) o resolver. Esti ye por casu l'usu que suel dase al atemi n’aikido.) [2] Un golpe dolorosu, pero non mortal, a un área como los güeyos, cara, o dalguna parte feble del abdome, pue abrir camín pa una téunica más dañible, como una proyeición o una llave a les articulaciones. Inclusive si’l golpe nun apota, pue distrayer al adversariu, qu'instintivamente pue abangar el cuerpu (por exemplu esparabanando la cabeza p'atrás por un golpe a la cara) perdiendo asina l'equilibriu.
El desenrollu de les téuniques d'atemi surde de la evolución de les artes marciales xaponeses, mayormente’l jujutsu. Los primeros estilos de jujutsu de la Era Sengoku foron creaos como forma de combate ensin armes por samuráis que perdíen les armes en plenu campu batalla. El propósitu del jujutsu yera desarmar al enemigu y usar el so propiu arma escontra d'él. D’esta miente los golpes al cuerpu taben llendaos, porque la supuesta víctima llevaba de xuru una armadura completa. Ensin embargu nos estilos tardíos de jujutsu del periodu Edo los golpes a mano vacía al cuerpu llegaron a xeneralizase cuando les engarraes militares a gran estacala entamaron a arralar. Esto significaba que l'oponente del prauticante de jujutsu nun avezaba llevar armadura, y los puntos vitales que formen l'enquiz del atemi-waza quedaben más albentestate. Asina que l'atemi escomenzó a xugar un papel central nes téuniques mortales y de convencimientu ensin armes.
