Astérix chez les Belges
[editar datos en Wikidata]

Astérix chez les Belges ("Astérix na tierra los belgues") ye la historieta llarga nᵘ 24 de la serie Astérix el Galu, obra de René Goscinny y Albert Uderzo. Editólu Dargaud en Francia y Hachette n'España. Foi l'últimu álbum de la serie nel qu'intervieno Goscinny, porque morrió mientres la so ellaboración.

Argumentu

Aliéndase una sospechosa tranquilidá na aldea gala, toa ella debida a que los romanos van a la Galia, tres una campaña en Bélxica, ¡a folgar! Poro, l'arguyosu xefe Abraracúrcix engaféntase, sobremanera dempués d'escuchar que, según Xuliu César, los belgues, son los más valientes de tolos pueblos galos.[1] Por esti motivu decide partir pa Bélxica, magar que Panorámix y Astérix encamiénten-y que nun lo faiga. Con cuenta de prevenir cualquier incidente, Astérix xunto con Obélix, decide acompañalu. Al llegar a Bélxica, conocen, ente otros, a Gueusealámbix y a Vancomolóquix, principales xefes d'una aldea belga. En comiendo con ellos, deciden entamar un concursu nel que va demostrase qué pueblu ye'l más fuerte estrozando campamentos romanos y pretendiendo, amás, que Xuliu César arbitre esi concursu.


Alusiones

A lo llargo del llibru pueden atopase numberoses referencies a los tópicos belgues, apaecen los detectives Dupond y Dupont, del cómic belga Tintín, afáense fragmentos d'obres de Victor Hugo y hasta se dediquen delles viñetes al Manneken Pis de Bruxeles. A la fin, la escena de la llacuada ye un homenaxe a un célebre cuadru de Pieter Brueghel el Vieyu.

René Goscinny morrió mentanto la producción d'esti álbum. Como homenaxe, Uderzo dibuxó lluvia nel cómic hasta'l final del álbum, lo que sirve pa marcar el momentu nel que Goscinny morrió. Tamién sirve como asonsaña del clima de Bélxica.

Hai inclusive una mención implícita al cantante belga Jacques Brel. Cuando los personaxes van percorriendo'l país, Abraracúrcix fai un comentariu sobre'l paisaxe. El xefe belga respuende: «Dans ce plat pays qui est le mien, nous n'avons que das oppidums pour uniques montagnes» («nesta tierra llana que ye la de mio, nun tenemos sinón los oppidum por únicos montes»); referencia al cantar Le Plat Pays nel que Brel diz: avec das cathédrales pour uniques montagnes... le Plat Pays, qui est le mien.

Ver tamién

  • Waterzooi - Una especialidá culinaria mentada nel comic.

Referencies

  1. ↑ La fras (Horum omnium fortissimi sunt Belgae) ye auténtica de César na so obra: De bello Gallico I, 1.

Enllaces esternos

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.