Artes marciales mestes
Tamién AMM, MMA, Mixed Martial Arts, Combate Llibre, No Holds Barred (NHB), Cage Fighting, Ultimate Fighting, Pride Fighting, Sougo Kakutogi
Enfoque Variáu
Contautu/durez Deporte de contautu plenu
Deporte olímpicu Non
Cambiar los datos en Wikidata

Artes marciales mestes (más conocíes poles sigles AMM, o MMA n'inglés) ye un términu xenéricu usáu al respeutive de delles modalidaes deportives de combate a contautu plenu que permiten en competición una gran variedá de téuniques y habilidaes de combate, estrayíes d'una mecedura d'artes marciales asina como de tradiciones non marciales. Los reglamentos de competición permiten l'emplegu, tanto en pie como en suelu, d'una riestra téuniques, qu'inclúin golpes (de puñu, pie, coldu, rodía…) y téuniques d'agarrar y proyeutar, o bien inmovilizar, basaes en llaves o palanques. Estes competiciones tán abiertes a artistes marciales de diferente formación, ensin distinción d'escueles. Sicasí les artes marciales mestes pueden prauticase tamién como deportes regulares de contautu, al marxe de los torneos.

Delles organizaciones qu'entamen torneos d'artes marciales mestes son l'Ultimate Fighting Championship (UFC) y l'antiguu PRIDE Fighting Championships. Pal maxín popular, los términos artes marciales mestes y Vale tudo (“Val too”) signifiquen lo mesmo. Ensin embargu esto ye un equivocu darréu qu'hai bien de matices qu'estremen estes disciplines ente elles, y sobre too a dambes de los deportes de contautu llamaos full contact y kickboxing

Historia

Escultura que representa’l Pankration.

Anque hubo n'Occidente exemplos tan antiguos como’l Pankration (“Pancraciu”), estilu de combate a mano vacía introducíu polos griegos nos Xuegos Olímpicos nel 648 e.C., son precedentes más direutos de les AMM les exhibiciones públiques de combate que se facíen en dellos salones a finales del sieglu XIX. Estos espectáculos representaben diferentes estilos de llucha, como’l jujutsu, la llucha llibre, la llucha grecorromana y otros que s’enfrentaben en torneos y desafíos per toa Europa. Esti interés polos torneos profesionales a plenu contautu apagóse dempués de la Primer Guerra Mundial, pero más tarde remaneció dixebrada en dos corrientes principales. La primera yera la referida a la competición real, y la segunda, más dependiente de la coreografía y del espectáculu, diba acabar convertiéndose na llucha llibre profesional.

Les artes marciales mestes modernes anicien en dos asocedíos: los alcuentros de Vale tudo en Brasil, y de Shoot Wrestling en Xapón, rellacionaos ente sí pero separtaos nel tiempu.

El Vale tudo entamó na tercer década del sieglu XX, cuando Carlos Gracie convidó a competidores d'estremaes modalidaes de llucha a lo que se llamó’l "Desafíu Gracie". Más tarde’l so hermanu Helio Gracie y los sos fíos, sobre too Rickson Gracie, caltuvieron esti desafíu en forma de duelos de Vale tudo que nun cuntaben cola presencia de medios de comunicación.

Nel Xapón, na década de los 80, el lluchador Antonio Inoki organizó un refileru de combates d'artes marciales mestes. Foron la base del posterior Shoot Wrestling y habíen dar llugar a la formación d'una de les primeres organizaciones xaponeses d'artes marciales mestes, conocida como Shooto. Les AMM algamaron muncha popularidá nos Estaos Xuníos en 1993, cuando Rorion Gracie y otros socios crearon el primer tornéu d'UFC (Ultimate Fighting Championship).

Énte l'ésitu del UFC, los promotores xaponeses crearon en 1994 el Campeonatu Free Style de Xapón o Open Free Style de Xapón. Dambos yeren los dos mayores torneos d'AMM nel mundu. L’Open Free Style ganólu les dos primeres ediciones Rickson Gracie, que yá fuera un gran lluchador de Vale tudo en Brasil nes décades de 1970 y 1980. Lluchó tamién nes primeres ediciones de los PRIDE Fighting Championships.

El PRIDE resplandió dafechu ente los años 1997 y 2007. Ensin embargu l'UFC foi decayendo, perdiendo valor y siendo torgáu en dellos estaos de los USA.

Nel 2001 l'ex-empresariu de boxéu Dana White convenció a los sos amigos Lorenzo y Frank Fertitta, dueños d'una importante rede de casinos en Las Vegas, pa comprar l'UFC. Xuntos fundaron una empresa llamada Zuffa y compraron l'UFC por malpenes 2 millones de dólares. Dempués de dellos cambeos nes regles llograron llegalizar esti deporte en práuticamente tolos Estaos Xuníos.

Nel 2007 la organización del UFC compró’l PRIDE, llevando dellos deportistes del Xapón pa los Estaos Xuníos y tresformando l'UFC na mayor organización d'AMM del mundu. Anguaño atribúise a l'UFC un valor de más de mil millones de dólares, y domina más del 90% del mercáu mundial de les AMM.

Regles

Imaxe típica d'un combate de MMA.

Les regles de la mayoría de les competiciones d'artes marciales mestes evolucionaron dende los primeros tiempos del Vale tudo. Según diba estendiéndose ente espectadores y lluchadores el conocimientu de les téuniques de llucha, tuvo claro qu'había que camudar los primeros reglamentos, que yeren mínimos. Dellos motivos pa estos cambeos foron:

  • Proteición de la salú de los lluchadores: Esti cambéu persiguía sobre too desaniciar l'alcuñu de "engarraes xabaces, sin regles" que ganaren les AMM per aciu de los sos raigaños nel Vale tudo. Tamién aidó a los competidores a evitar mancadures qu'otramiente podíen alteriar el ritmu d'entrenamientu qu'ameyoraba la so calidá téunica y, poro, la calidá de les lluches.
  • Dar más espectáculu: Gracies a les regles los bonos lluchadores podíen exhibise meyor, nun quedando munchu ratu en suelu.

A midida que diben xeneralizándose los conocimientos sobre sumisiones y inmovilizaciones foron surdiendo categoríes de pesu darréu que, cuando los lluchadores se facíen más espertos nestes téuniques y yeren por ello quien a evitales, les diferencies de pesu convertiéronse nun factor sustancial.

De magar entamaron los torneos de Vale tudo torgábase golpiar los xenitales y atacar a güeyos y deos. Más recién surdió en dellos torneos la torga de patiar a un oponente que tuviera en suelu si’l que pegaba les pataes taba en pie. Torgábense tamién les testeriaes, porque yeren golpes que riquíen pocu esfuerciu y téunica y convertíen los combates n'espectáculos sangrinos. Dar testaes yera daqué común ente los lluchadores de llucha llibre. La so fuercia permitía-yos llevar el combate al suelu, pero la so falta d'habilidaes de sometimientu facía que nun fueren pa finalu aína.

Introduxéronse guantiyes pa protexer los nudiellos y güesos de les manes de cortaes y francedures al pegar puñetazos. A pesar de que dellos lluchadores teníen puños bien tresnaos, otros igual nun los teníen tanto, como por exemplu los amañosos en téuniques de sometimientu.

Estableciéronse topes de tiempu pa evitar llargues lluches en suelu con poca aición perceutible polos espectadores. Los combates ensin tope de tiempu de los primeros campeonatos facíen amás abegosa la retresmisión de los combates. De forma asemeyada afitóse la regla "stand up" (ponese de pies), onde l'árbitru pue mandar llevantar a los lluchadores si creye que tan descansando en suelu o nun se tán faciendo los posibles p'algamar una posición dominante.

Referencies

    Enllaces esternos

    This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.