Ana Cano
Vida
Nacimientu	Somiedo, 12 de mayu de 1950 (73 años)
Nacionalidá	España
Estudios
Estudios	Universidá d'Uviéu
Llingües falaes	castellanu asturianu
Oficiu	filóloga
Emplegadores	Universidá d'Uviéu

Ana María Cano González (12 de mayu de 1950, Somiedo) ye una filóloga asturiana. La so vida académica ta venceyada a la Universidá d'Uviéu onde llicenció en Filosofía y Lletres con premiu estraordinariu en 1972 y doctoróse trés años más llueu cola so tesis El habla de Somiedo, calificada con sobresaliente cum laude.

El so llabor ta reconocíu nel ámbitu européu y tien escritos artículos filolóxicos en bien de publicaciones de prestixu. Ye autora del Vocabulario del bable de Somiedo, tesis que foi espublizada pol Institutu d'Estudios Asturianos nel añu 1982.

Dende'l 2001 hasta'l 23 de xunu de 2017 presidió l'Academia de la Llingua Asturiana, cargu pal que foi escoyida dempués de la marcha de Xosé Lluis García Arias, tres venti años como presidente de la principal institución llingüística d'Asturies. Anguaño Xosé Antón González Riaño preside la institución.

Güei ye caderalga de Filoloxía Románica y foi Decana de la Facultá de Filoloxía de la mesma Universidá hasta l'añu 2008, cuando dimitió por mor de la crisis de la Facultá de Filoloxía, tres que la Xunta de Gobiernu votara a la escontra d'un maior d'asturianu dientro de los nuevos estudios reglaos adecuaos al nuevu espaciu européu.

Delles publicaciones

• El habla de Somiedo, tesis doctoral (1975)
• Vocabulario del bable de Somiedo Institutu d'Estudios Asturianos, 1982)
• Averamientu a la hestoria de la llingua asturiana (Caja de Asturias, «Conocer Asturias», xineru 1987)
• Notas de Folklor Somedán (Collecha Asoleyada, 1989)
• Estudios de diacronía asturiana (1) (Llibrería Llingüística, 2008)
• El habla de Somiedo (occidente de Asturias) (Llibrería Llingüística, 2009)

Referencies

Enllaces esternos

• Su biografía en la web Vivir Asturias.
• «Ana Cano: "La oficialidad es la única oportunidad de que el gallego-asturiano sobreviva"». La Nueva España. Consultáu'l 10 de xunetu de 2016. Cascudo, T. (5 de mayu de 2016).
• Ultima papeleta de Ana Cano. LNE Consultáu'l 07/03/2017.
• Discurso en la Selmana de les Lletres Mayo 2007 El Comercio (Consultáu'l 07/03/2017).
• Ana Cano pide una sede para la Academia de la Llingua y advierte de que no firmará contratos de alquiler. (Consultáu'l 7/03/2017)