Alfonso Enríquez
Conde de Gijón (es) Traducir


conde de Noreña (es) Traducir

Vida
Nacimientu Xixón, 1355 (greg.)
Nacionalidá Corona de Castiella
Muerte Marans, 27 d'agostu de 1395 (greg.) (39/40 años)
Familia
Padre Enrique II de Castiella
Madre Elvira Iniguez de Vega
Casáu con Isabel de Portugal, señora de Viseu (es) Traducir
Fíos/es
Hermanos/es
Pueblu Burgund-Trastamara
Estudios
Llingües falaes castellanu
Oficiu guerreru
Cambiar los datos en Wikidata
Castiellu de Noreña nun grabáu del sieglu XIX.

Alfonso Enriquez (1355 (greg.), Xixón – 27 d'agostu de 1395 (greg.), Marans), conde de Noreña y Xixón, foi fíu bastardu del rei Enrique II de Castiella. So padre dio-y el títulu de Conde de Xixón en 1373 y el de Noreña, qu'heredare, enantes de ser rei, de Rodrigo Álvarez de Asturias.

Les armes d'Alfonso Enriquez amuesen la so conexón con Álvarez de Asturias y Noreña na bordura de xaqueles d'oru y veros.

Fíu d'Elvira Íñiguez de la Vega, el conde Alfonso Enríquez ye'l primoxénitu d'Enrique II de Castiella. Naz en Xixón, en 1355 y verase en posesión d'amplios territorios; de so padre, recibe n'herencia toles sos posesiones n'Asturies, destacando los condaos de Noreña y Xixón, pero tamién Ribeseya, Villaviciosa, Nava o Llaviana, ente otros, nel oriente del país, y Cuideiru, Ḷḷuarca, o Pravia nel occidente. Poseyó Babia y Los Argüeyos. Foi'l más poderosu señor feudal de les Asturies, qu'intentó tornar independiente del reinu del so hermanu D. Xuan I de Castiella y depués del so sobrín Enrique III de Castiella. Tuvo munchos señoríos y vasayos, pero tolos perdió poles desobediéncies al rei Xuan I de Castiella, el so mediohermanu, y más tarde al rei Enrique III , el so sobrín, en 1395.

Infancia y mocedá

Demientres los primeros años de vida, caltuvose siempre baxo l'atenta curia de so padre, que colocare en puestos de responsabilidá a dellos de los sos parientes pa tratar de crear un garapiellu adictu a la Corona que-y permitiera gobernar con cierta tranquilidá.

Fizo les sos primeres armes demientres la segunda Guerra Fernandina, sometiendo les places de Viana do Bolo y Cascais, enantes que'l Tratáu de Santarem punxere final a la contienda, si bien esiste constancia de la so presencia ya na Batalla de Náxera.

Sin embargu, anque nun llegó a enfrentase abiertamente al padre, los desalcuerdos ente dambos dábense davezu. En 1375, ante'l matrimoniu que so padre concertara cola infanta Sabela de Portugal, pa echar la robla del Tratáu de Santarem, Alfonso Enríquez fuxó a Francia pa tratar de que'l papa Gregoriu XI interviniere y anulare'l compromisu, pero tuvo que ceder ante la confiscación de tolos sos bienes qu'ordenó Enrique II.

Una vez celebráu'l casoriu en 1377, que nunca llegó a consumase, Alfonso Enriquez unióse a les tropes castellanes na guerra contra Navarra. P'afrontar los gastos derivaos de la espedición, Alfonso decreta un serviciu estraordinariu nos conceyos de la so propiedá, asina como en dellos que nun lo yeren, lo que provoca una reacción entós mesmo, tanto de la Ilésia asturiana como de munchos de los miembros de la nobleza llaica. Ente esto, tuvo qu'intervenir el mesmu Enrique II prohibiendo-y al fíu recaldar nos conceyos que nun yeren d'elli, y devolver lo tomao indebidamente.

El reináu de Xuan I

Xuan I de Castiella.

En mayu de 1379 fina Enrique II de Trastámara, sucediéndolu nel tronu castellán el fíu mayor, que reinaría como Xuan I de Castiella.

Los problemes internos surden al poco. Hai que remembrar que, al principiu del so reináu, Enrique II creara un garapiellu de parientes adictos (al menos en teoría) a la Corona pa percontiar la so posición. Sin embargu, a lo llargo de los años, fuera apaeciendo una nueva clase de nobleza funcionaria, que darréu diría desplazando a los parientes del rei nel exerciciu de los puestos de responsabilidá, y que sería'l principal sofitu de los nuevos Trastámara.

Esta situación nun-y prestó lo más mínimo a l'alta nobleza, y Alfonso Enriquez, como parte d'ella, ensiguida empecipió a demostralo. Yá nes Cortes de Burgos del añu 1379, obtién les rentes del alfolí d'Avilés, y n'avientu d'esi mesmu añu, l'anulación del so matrimoniu.

Sin embargu, en 1380, ye Xuan I el que dicta una riestra de normes destinaes a torgar l'atropellu de la nobleza sobre los señoríos y encomiendes al so cargu; ente los damnificaos, el conde Alfonso, que se ve obligáu a devolver tierres garraes indebidamente a los monasterios de Monesteriu de San Salvador de Corniana y Monesteriu Real de San Benito de Safagún.

Alfonso Enriquez parte entoncienes hacia Portugal, onde trata d'obtener la man de la infanta y heredera Beatriz de Portugal, a la vez qu'ufre los sos servicios al duque de Lancaster que, casáu con una fía de Pedru I el Cruel, reivindicaba la corona de Castiella.

Énte esta situación, Xuan I procede a confiscar tolos bienes del so hermanascu, a la vez que concede al obispu d'Uviéu, Gutierre de Toledo, poderes plenipotenciarios nel país. Finalmente, fracasaes les negociaciones, Alfonso Enriquez decide tornar a Asturies, onde, acoyéndose al perdón real, recupera los sos territorios.

Sin embargu, en 1383 alcontramos una nueva rebelión del conde Alfonso qu'obliga a Xuan I a dir a Asturies urxentemente ya que'l conde Alfonso Enriquez ufriérase a los ingleses pa solicitar ayuda. Sicasí, el rei actúa rápido y rinde toa Asturies quitando Xixón, onde se refuxa el rebelde, qu'acabaría acoyéndose otra vuelta al perdón del so hermanu'l 18 de xunetu de 1383.

Depués d'esta última revuelta, Xuan I decide confiscar toles posesiones asturianes d'Alfonso Enriquez, concediéndo-y a cambiu'l títulu de conde de Valencia de don Xuan, tierres muncho más accesibles y nes que'l conde sería muncho más controlable. Amás, entregó a don Gutierre de Toledo el señoríu de Noreña en pagu polos sos servicios y crea pal so fíu, el futuru Enrique III, el títulu de Príncipe d'Asturies, con tolos sos señoríos; d'esta manera, venceyen a la corona de Castiella l'insurreutu territoriu asturianu.

Poco depués, por mor de la socesión de Fernandu I de Portugal, Xuan I decide encarcelar a Alfonso Enriquez nel castiellu de Almonacid, ante la posiblidá de qu'esti pueda llevar alantre maniobres na so contra. Tará presu durante ocho años y, namás a la muerte del rei, en 1390, recuperará Alfonso Enriquez la llibertá y les sos posesiones.

El reináu d'Enrique III

Tres la muerte de Xuan I y aprovechando'l desorden ya inestabilidá reinantes, Alfonso Enriquez consigue la devolución de les sos posesiones asturianes.

N'agostu de 1394, Enrique III degoló de Valladolid hacia Asturies pa tratar de someter otra vez a Alfonso. Pa ello, iguó una flota que tendría de llendar Xixón per mar, mientres qu'élli entraría dende Lleón atravesando'l puertu payares.

El conde centró la defensa nes places fuertes de Xixón y el Castiellu de San Martín (en Sotu'l Barcu). Trató de tomar Uviéu, pero fracasó dafechu énte la oposición de la burguesía y l'obispáu.

Xixón yera daquella una auténtica fortaleza natural; muriada dende tiempos romanos y asitiada sobre una península, la única entrada a la ciudá yera al través d'un pasillu d'arena que desapaecía col inchente, colo qu'un exércitu sitiador tenía perpocos puntos polos qu'entrar.

Enrique III puso sitiu a Xixón dellos meses, ensin que se viesen resultaos claros pa nengún de los dos contendientes. Ello llevó a una tregua.

El rei entamó un nuevu cercu a la ciudá na segunda quincena de xunetu de 1395, en tanto qu'Alfonso iguó la defensa de la villa, aprovisionándola d'alimentos y armes, tres lo cual coló nuevamente, esta vez hacia Bayona en busca d'ayuda inglesa, dexando'l cercu nes manes de la so muyer Sabela.

Tres más d'un mes d'asediu, tiempu nel que los castellanos ensayaron l'usu de l' [artillería]] contra les muries de Xixón. Finalmente, al nun llegar los refuerzos buscaos, Sabela rindió la ciudá, non sin primero asegurar la so vida y la de la familia d'ella, tres lo cual marchó hacia Francia p'alcontrase col so maríu.

Enrique III, una vez firmáu l'alcuerdu, mandó la destrucción de la villa, rematando asina les revueltes del conde Alfonso.

Años años

Poco sabemos del conde Alfonso a partir d'esti momentu, salvo que foi presu por orde del rei en San Juan de Luz, anque lliberáu poco depués, y que se rumoreó taba implicado nuna conspiración del rei de Portugal contra Enrique III en 1397, anque nunca se supó con certeza.

Morrió posiblemente en Portugal, en fecha desconocida, ya qu'a principios del sieglu XV hai noticies de qu'ellí vivía la condesa Isabel, que mantendría'l linaxe de los Noreña portugueses.

Rellaciones familiares

Escudu d'armes da la família Noronha.

Fíu del rei Enrique II de Castiella, enantes del so casoriu con doña Elvira Iñiguez de la Vega, de quien yera pariente cercanu al ser ñetos del rei Dinis de Portugal y de lareina Santa Isabel y claro de D. Sanchu IV de Castela.

Casóse en Burgos en 1373 com D. Sabela de Portugal (1364 - 1435, en Marans, Francia), señora de Viseu, fiya natural del rei Fernandu I de Portugal, enantes del so casamientu, y foron el troncu de la família portuguesa Noronha:

  1. D. Pedro de Noronha (Castiellu de Xixón 1379 - 12 d'agostu de 1452), arzobispu de Lisboa,
  2. D. Fernando de Noronha 2º conde de Vila Real (1380 -?), 2º conde de Vila Real, casáu con D. Brites de Menezes, 2ª condesa de Vila Real (1400 -?),
  3. D. Constança de Noronha (1390 -?), que foi la 2ª muyer de D. Afonso, 1º duque de Bragança, casáu com Mécia de Sousa, 4ª señora de Mortágua (1400 -?)
  4. D. Diogo Henriques de Noronha,
  5. D. Sancho de Noronha, 1º conde d'Odemira (c. 1390 -?) casó con Mécia de Sousa, 4ª señora de Mortágua (depués de fináu l'anterior maríu).
  6. D. Henrique de Noronha (c. 1390 -?).
  7. D. João de Noronha, foi fechu Caballeru pol Infante D. Duarte, en Ceuta, en cuyu cercu tomó parte xunta'l rei onde foi firíu. Foi a morrer enAlmodôvar, Portugal, de les mancadures.

Referencies, Fontes y bibliografía

  • Carvallo, Luis Alfonso de. Antigüedades y cosas memorables del Principado de Asturias. Madrid, 1695
  • Uria Maqua, Juan. Las Rebeliones del conde don Alfonso en Asturias (1368-1396), en Historia General de Asturias, tomo 2.
  • Genealogias da ilha Terceira de António Ornelas Mendes e Jorge Forjaz. Vol. VI, Páx. 467 Dislivro Histórica, 2007.
  • Brasões da Sala de Sintra-3 vols., Anselmo Braamcamp Freire, Imprensa Nacional-Casa de Moeda, 2ª Edição, Lisboa, 1973. vol. I, páx. 45.
  • História Genealógica da Casa Real Portuguesa, D. António Caetano de Sousa, Atlântida-Livraria Editora, Lda, 2ª Edição, Coimbra, 1946. Tomu I-pg. 181.
  • Sangue Real, Manuel Abranches de Soveral, Masmedia, 1ª Edição, Porto, 1998. pg. 16.
  • Cronica de D. João I, de Fernão Lopes. Cap. L III, páx. 155, edição Melo Azevedo, 1897.
  • História de Portugal de Damião Peres, II Vol. páx. 333.
  • Grandes de Portugal e de Sonsa, 55, História de Portugal, Enes, II, 248.
  • Crónica de El-Rei D. Fernando, de Fernão Lopes, Cap. LXXXII, LXXXIV e História das Gente de Sonsa, I, p.427.
  • Crónica da Tomada de Ceuta, de Zurara, cap. LRVI e História da Cidade de Ceuta., de Mascarenhas, 95.

Referencies

  1. 1 2 3 Afirmao en: Genealogics. Autor: Leo van de Pas. Llingua de la obra o nome: inglés. Data d'espublización: 2003.
  2. ↑ Afirmao en: The Peerage. Llingua de la obra o nome: inglés. Autor: Darryl Lundy.

Enllaces esternos

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.