Los Albiones yeren una tribu clasificada polos romanos como galaica, y allugaos según les fontes romanes, na estaya'l Navia-Eo (Fluvium Navia, anguaño Asturies), llendando arriendes con otres tribus galaiques como los Egobarros y Cibarcos y ástures como los Paésicos. Pliniu asítialos dientro'l Conventus Lucensis habitáu yá por galaicos onde s'alcontraba'l ríu Navialbionis (ríu los albiones):
<<Más alantre, la rexón de los ástures, l'oppidum de Noega. Na península los paésicos, y tres ellos, el Conventus Lucensis dende'l ríu Navia...>>
Ún de los pocos restos arqueolóxicos d'esti pueblu ye la estela de Nícer, (alcontrada n'A Veiga, Asturies), fíu de Clutosu, princeps (xefe, principal) de los Albiones. El so únicu clan conocíu yera'l de los cariacos (A Corredoira, A Veiga).
El testu diz asina: «NICER/ CLUTOSI / C(astello) CARI / ACA / PRINCI / PIS AL /BIONX / M AN(norum)/LXXV / HIC S(itus) EST
Bibliografía
- Celtas en Asturies, Alberto Álvarez Peña, ISBN 84-932070-4-7
- A cultura castrexa, Francisco Calo Lourido, ISBN 84-89138-71-0
- ASTVRES, Gran Enciclopedia Asturiana, ISBN 84-7286-339-5
