Alberto Fernández Velasco
Vida
Nacimientu L'Entregu, 19 de setiembre de 1942
Nacionalidá España
Muerte Xixón, 29 d'agostu de 2011 (68 años)
Familia
Fíos/es
Familia
Oficiu lutier (es) Traducir
Instrumentu musical gaita asturiana
Cambiar los datos en Wikidata

Alberto Fernández Velasco, más conocíu como Berto Velasco, (19 de setiembre de 1942, L'Entregu – 29 d'agostu de 2011, Xixón) foi un artesanu gaiteru asturianu. El so fíu, Berto Varillas, ye un conocíu gaiteru.

Perfil Biográficu

Anque na so familia nun había tradición musical, aficionóse a la música asturiana siendo mozu, mercando la so primer gaita cuando tenía dieciseyes años. En 1968 vieno pa Xixón a trabayar d'ebanista, oficiu que dexó pa dedicase a la gaita, faciendo la primera en 1979 según el modelu tradicional d'Ántón Álvarez Vega, Cogollu.

Convencíu de que'l punteru de la gaita tenía falta d'ameyorar en sonoridá, emprincipió a investigar na xera acústica pa construyir instrumentos que, calteniendo l'aire asturianu, siguieren criterios académicos tocántenes a les afinaciones.

Fexo'l so primer punteru con escala temperada en 1985, y dende entós les sos gaites allegaron a ser les favorites de munchos gaiteros solistes, tanto presente en bona parte de les ediciones del Festival Intercélticu de Lorient dende 1986. La so mayor anovación foi'l punteru cromáticu de dos octaves, desendolcáu dende 1988.

El so llabor algamó en 1993 la reconocencia de la Conseyería d'Educación, Cultura, Deportes y Xuventú del Principáu d'Asturies, al traviés d'una mesa d'espertos aconceyada pa valorar los sos instrumentos y formada por Leoncio Diéguez Marcos, Miguel Fernández Gutiérrez y Manuel Fernández Avello, na so calidá de miembros del Conservatoriu Superior de Música Eduardo Martínez Torner d'Uviéu.

Na so última etapa hora aínda trabayaba en delles estayes téuniques, rescamplando la gaita d'afinación variable, qu'axuntaba toles anovaciones surdíes de les sos investigaciones. Tenía l'enfotu de que la gaita pudiere tocar con normalidá colos otros instrumentos musicales, que quedare afitada como materia d'estudiu nel conservatoriu, que s'iguaren obres nueves pa ella y qu'hubiere una sensibilidá social haza les persones que-y dediquen los sos esfuercios.

Ye d'opinión xeneral que, por estes razones, Alberto Fernández Velasco, marcó nos años ochenta un puntu y aparte na historia de la gaita asturiana y, como escribe Ismael González Arias, puede ser considerau, “padre de la gaita asturiana moderna”.

Ver tamién

Referencies

  1. 1 2 «asturies.com» (asturianu). Consultáu'l 2 payares 2023.

Enllaces esternos

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.