Abbott and Costello
Xéneru(os)	Parodia
Miembros
Lou Costello y Bud Abbott
Enllaces esternos
Sitiu web oficial	http://www.abbottandcostello.net
Discogs	658943
[editar datos en Wikidata]

Abbott y Costello nos 50.

Abbott and Costello (n'asturianu Abbott y Costello) foi un dúu de comedia d'Estaos Xuníos d'América compuestu por Bud Abbott y Lou Costello, que col so trabayu nel teatru, la radio, el cine y la televisión ficiéronse los cómicos más populares na década de 1940. Cola so emblemática ya influyente rutina "¿Quién va primero?" marcaron les pautes de munchos gags asemeyaos nos años vinientes.

Carrera

El dúu fizo la so primer apaición na radio'l 3 de febreru de 1938^[1], nel conocíu show The Kate Smith Hour. A lo primero, les semeyances ente les sos voces foi una dificultá pa los oyentes. El problema resolvióse con Costello interpretando una voz infantil aguda. "¿Quién va primero?" foi presentada per primer vegada pa l'audiencia de la radio nacional al otru mes. Ellos quedaron nel programa de radio mientres dos años, ente que realizaben dellos papeles en Broadway como The Streets of Paris en 1939.

En 1940 fueron contrataos pola Universal Studios pa la película One Night in the Tropics. Universal concedió-yos un contratu al llargu plazu, y la so segunda película, Buck Privates, (1941) convirtiólos n'estrelles de taquiella. Na mayoría de les sos películes, la trama foi un marcu pa volver introducir les rutines de comedia qu'ellos estrenaren nel escenariu. La Universal tamién amestó númberos rellumantes, la gran producción con The Andrews Sisters, Ted Lewis y la so orquesta, Ella Fitzgerald, y otros actos musicales. Ficieron trenta y seis películes xuntos ente 1940 y 1956. Abbott y Costello tuvieron ente los artistes más populares y meyor pagaos del mundu na segunda guerra mundial.

Ente les sos más grandes películes inclúyense a Hold That Ghost, Who Done It?, Pardon My Sarong, The Time of Their Lives, Abbott and Costello Meet Frankenstein y Abbott and Costello Meet the Invisible Man, coles estrelles del terror Béla Lugosi, Lon Chaney, Jr. y Boris Karloff.

Radio

Dempués de trabayar como reemplazu de branu de Fred Allen, Abbott y Costello xuniéronse a Edgar Bergen y Charlie McCarthy en The Chase and Sanborn Hour en 1941, ente que dos de les sos películes (Buck Privaes y Hold That Ghost) fueron feches pal programa de radio Lux Radio Theatre. Ellos tamién llanzaron el so propiu programa selmanal el 8 d'ochobre de 1942, patrocináu pola marca de cigarros Camel. El dúu tamién entamó un programa pa neños de 30 minutos na radio llamáu The Abbott and Costello Children's Show, que salió al aire los sábados pela mañana, cola neña cantante Mae Slaughter y el neñu llocutor Johnny McGovern.

Televisión

En 1951, fueron contrataos pola televisión y participaron en The Colgate Comedy Hour. Cada programa yera d'una hora en direuto con actores de vodevil, frente a un públicu de teatru, la revitalización de les actuaciones de los cómicos, foi dando a les sos vieyes rutines un rellumu nuevu.

A partir de 1952 filmaron una serie de media hora, The Abbott and Costello Show, la serie apaeció nes estaciones llocales de tol país. Vagamente basada na so serie de radio, l'espectáculu xira alredor de dos desemplegaos. Unu de los gags foi'l del cobru del arriendu del apartamentu onde viven xuntos, Abbott ye cafiante con Costello pa que consiga un trabayu pa pagar l'arriendu. Na serie'l Sr. Sidney Fields ye'l dueñu del apartamentu, y Hillary Brooke ye una vecina amiga que dacuando se mete nos problemes d'Abbott y Costello. Otru protagonista foi Joe Besser como Stinky, un neñu amuyeráu de 40 años d'edá, vistíu con un traxe de pequeñu Lord. Gordon Jones foi'l policía Mike, que siempres pierde la paciencia con Lou.

Últimos años

A mediaos de la década de 1950 la popularidá d'Abbott y Costello esmoreció. Anque yeren los tiempos de Dean Martin y Jerry Lewis, cada añu fixeron dos películes nueves, más la so serie de televisión.

Bud Abbott retiróse del cine en 1956, depués de filmar con Costello Dance with Me, Henry.

Lou Costello fixo les sos últimes apaiciones na televisión en The Steve Allen Show. Tamién actuó n'episodios de General Electric Theater y Wagon Train.

Filmografía

Ver tamién

• Bud Abbott
• Lou Costello
• El Gordu y el Flacu

Referencies

Enllaces esternos

• Wikimedia Commons acueye conteníu multimedia sobre Abbott and Costello .
• Sitiu oficial (n'inglés)