كليبر

الجنرال جان باتيست كليبر (Jean-Baptiste Kléber) (9 مارس 1753 ستراسبورج - 14 يونيه 1800 القاهره) قائد عسكرى فرنسي فى حروب الثوره الفرنسيه .

 كليبر
(بالفرنساوى: Jean-Baptiste Kléber) 
 
معلومات شخصيه
الميلاد 9 مارس 1753 [1][2][3][4][5][6][7] 


ستراسبورج [8] 

الوفاة 14 يونيه 1800 (47 سنة)[1][4][5][6][7] 


القاهره [9] 

قتله سليمان الحلبى  
مواطنه
فرنسا  
الحياه العمليه
المهنه مهندس معمارى ،  وعسكرى  
اللغه الام لغه فرنساوى  
اللغات المحكيه او المكتوبه لغه فرنساوى [10][11] 
مجال العمل عماره [12] 
الخدمة العسكرية
الرتبة فريق اول  
المعارك والحروب معركة جبل طابور ،  ومعركة هليوبوليس  

نشأته
الجنرال جان باتيست كليبر

اتولد كليبر يوم 9 مارس 1753 فى مدينة ستراسبورج فى فرنسا ، ابتدا حياته فى خدمة عيلة هابسبورج . وفى سنة 1791 اتطوع فى الجيش الفرنسي واترقى بسرعة لغاية لما وصل لرتبة جنرال .

مشاركته فى حروب الثوره الفرنسيه

خدم كليبر فى راينلاند اثناء حرب التحالف الاول اللى ابتدت سنة 1792 وانتهت سنة 1797 ، وكمان اشترك فى حرب فونديه سنة 1793 اللى نجحت فى قمع تمرد الملكيين . وكان تقاعد لفترة قصيرة بعد توقيع معاهدة كامبو فورميو قبل مايرجعه الجنرال نابوليون بونابارت للخدمة العسكرية مرة تانية سنة 1797 .

مشاركته فى الحملة الفرنسية على مصر والشام

فى سنة 1798 استدعى الجنرال نابوليون بونابارت الجنرال كليبر للمشاركة فى الحمله الفرنسيه ، وشارك فى احتلال جزيرة مالطا يوم 11 يونيه 1798 ووصل مع قوات الحمله الفرنسيه لمدينة الاسكندريه يوم 1 يوليه 1798 واتصاب إصابة جامدة فى راسه بسبب النيران اللى اطلقتها حامية الاسكندريه على القوات الفرنسية .

تعيينه حاكما عسكريا على الاسكندرية

بعدما احتلت القوات الفرنسية مدينة الاسكندريه يوم 2 يوليه 1798 عينه الجنرال نابوليون بونابارت حاكما عسكريا على الاسكندريه . وبعدما اتولى منصبه بفترة قصيرة أمر بالقبض على الزعيم الوطنى المصرى محمد كريم بسبب تعاونه مع الفدائيين المصريين فى مقاومة الحمله الفرنسيه و أرسله للجنرال نابوليون بونابارت فى القاهره وبعدها احاله نابوليون بونابارت إلى محاكمة صورية تحت اشراف جنرالات الحمله الفرنسيه وانتهت المحاكمة دي بإصدار الحكم عليه بالاعدام رميا بالرصاص واتنفذ فيه الحكم يوم 6 سبتمبر 1798 فى ميدان الرميلة فى القاهره .

مشاركته فى الحملة الفرنسية على بلاد الشام

فى بداية سنة 1799 استدعاه الجنرال نابوليون بونابارت للمشاركة فى هجوم القوات الفرنسية على بلاد الشام ، وشارك مع القوات الفرنسية فى حصار مدينة العريش فى الفترة من 11 فبراير 1799 لغاية 19 فبراير 1799 واحتلالها ومن بعدها فى احتلال مدينة غزة ، وشارك فى حصار مدينة يافا واحتلالها و مذبحة يافا البشعة اللى ارتكبتها القوات الفرنسية فيها بأمر الجنرال نابوليون بونابارت يوم 7 مارس 1799 . وكمان اشترك فى حصار مدينة عكا فى الفترة من 20 مارس 1799 لغاية 21 مايو 1799 واللى انتهى بفشل القوات الفرنسية فى احتلال عكا بسبب استبسال اهالى المدينة فى الدفاع عنها بقيادة احمد باشا الجزار والى بلاد الشام اللى اتعاون مع الادميرال البريطانى سيدنى سميث قائد الأسطول البريطانى فى البحر المتوسط فى مقاومة القوات الفرنسية ، لكنه فى الفترة دى شارك فى انتصار القوات الفرنسية على القوات العثمانية فى معركة الناصرة يوم 8 ابريل 1799 وبعدها فى معركة قانا يوم 11 ابريل 1799 ده غير أنه قاد القوات الفرنسية لتحقيق انتصار حاسم على القوات العثمانية بقيادة عبد الله باشا العظم فى معركة جبل الطور يوم 16 ابريل 1799 .

توليه قيادة الحملة الفرنسية خلفا لنابوليون بونابارت

فى يوم 22 اغسطس 1799 رجع الجنرال نابوليون بونابارت إلى فرنسا ، وقبل سفره ترك رسالة لكليبر مع الجنرال مينو كان مضمونها تكليفه بقيادة الحمله الفرنسيه بدلا منه الأمر اللى اغضب كليبر غضب شديد لأنه كان دايما بيطالب بجلاء الحمله الفرنسيه عن مصر بسبب الخساير الفادحة اللى اتكبدتها القوات الفرنسية بسببها .

معاهدة العريش سنة 1800

فى يوم 24 يناير 1800 مضى كليبر على اتفاقية العريش مع الدولة العثمانية بالاشتراك مع الادميرال البريطاني سيدنى سميث قائد الاسطول البريطاني فى البحر المتوسط واللى كان مضمونها جلاء القوات الفرنسية عن مصر على نفقة الدولة العثمانية ، لكن حكومة المملكه المتحده اعترضت على الاتفاقية وطلبت خروج الفرنسيين كأسرى حرب . وبالطبع رفض كليبر الطلب ده وألغى اتفاقية العريش من جانب واحد وأعلن تغيير سياسته لأنه بعدما كان بيطالب بجلاء الحمله الفرنسيه عن مصر قرر بقاء الحمله الفرنسيه فيها واعتبار مصر جزءا لا يتجزأ من الجمهوريه الفرنسيه الاولى .

معركة هليوبوليس سنة 1800

طلب كليبر من الدولة العثمانية سحب القوات اللى ارسلتها إلى مصر ، لكن يوسف باشا صدر أعظم الدولة العثمانية وقائد القوات العثمانية ومعاه ابراهيم بيك قائد قوات المماليك رفضوا طلب كليبر وعسكروا بقواتهم فى منطقة المطريه وبعدها اشتبكوا مع القوات الفرنسية اللى قادها كليبر بنفسه فى معركة هليوبوليس اللى دارت فى منطقة عين شمس يوم 20 مارس 1800 وانتهت بانتصار ساحق للقوات الفرنسية وهزيمة منكرة للقوات العثمانية .

ثورة القاهره التانيه سنة 1800

فى يوم 21 مارس 1800 انتهز اهالى القاهره فرصة انشغال كليبر مع القوات الفرنسية بمطاردة فلول القوات العثمانية بعد انتصاره عليهم فى معركة هليوبوليس وقاموا بثورة القاهره التانيه ضد الحمله الفرنسيه واللى استمرت لمدة شهر كامل ، لكن قمعها كليبر بمنتهى العنف بعدما اصدر اوامره لجنوده بالصعود بالمدافع إلى جبل المقطم وضرب احياء القاهره بنيرانها ده غير انه امرهم بحرق حى بولاق ابو العلا اللى انطلقت منه الثورة وقتل الالاف من المصريين ، وكل ده كان بالتعاون مع مراد بك زعيم المماليك اللى كان اتحالف معاه قبل كده على ان مراد بك يكون حاكم على الصعيد تحت قيادة كليبر فى مقابل مبالغ مالية يدفعها مراد بك لخزينة الجمهوريه الفرنسيه الاولى .

وبعدما اخمدت القوات الفرنسية الثورة فى يوم 20 ابريل 1800 أصدر كليبر أوامره بفرض غرامات مالية باهظة على الأهالي وبالقبض على اعداد كبيرة منهم و تعذيبهم فى سجن القلعة و اعدام اعداد تانية ، الأمر اللى أثار مشاعر الغضب عند المصريين ضده اكتر من أى وقت .

مقتله

فى يوم 14 يونيه 1800 اتقتل كليبر بعدما طعنه الطالب الازهرى السورى سليمان الحلبى بخنجر جزاءا له على الجرايم الوحشية اللى ارتكبها فى حق المصريين .

شوف كمان

مصادر
  1. وصلة : 11894780X  — تاريخ الاطلاع: 27 ابريل 2014 — الرخصة: CC0
  2. http://data.bnf.fr/ark:/12148/cb121045499 — تاريخ الاطلاع: 10 اكتوبر 2015 — المؤلف: مكتبة فرنسا الوطنية — الرخصة: رخصة حرة
  3. معرف الشبكات الاجتماعيه: https://snaccooperative.org/ark:/99166/w6mw32vj — باسم: Jean Baptiste Kléber — تاريخ الاطلاع: 9 اكتوبر 2017
  4. مُعرِّف موسوعة بريتانيكا على الإنترنت (EBID): https://www.britannica.com/biography/Jean-Baptiste-Kleber — باسم: Jean-Baptiste Kleber — تاريخ الاطلاع: 9 اكتوبر 2017 — العنوان : Encyclopædia Britannica
  5. فايند اغريف: https://www.findagrave.com/memorial/7486 — باسم: Jean Baptiste Kleber — تاريخ الاطلاع: 9 اكتوبر 2017
  6. مُعرِّف موسوعة بروكهوس على الإنترنت: https://brockhaus.de/ecs/enzy/article/kleber-jean-baptiste — باسم: Jean-Baptiste Kléber — تاريخ الاطلاع: 9 اكتوبر 2017 — المحرر: Bibliographisches Institut & F. A. Brockhaus و Wissen Media Verlag
  7. مٌعَرِّف الموسوعة الكُرواتيَّة (LZMK ID): https://www.enciklopedija.hr/Natuknica.aspx?ID=31792 — باسم: Jean-Baptiste Kléber — المؤلف: داليبور بروزوڤيك و توميسلاڤ لادان — العنوان : Hrvatska enciklopedija — الناشر: Miroslav Krleža Lexicographical Institute — ISBN 978-953-6036-31-8
  8. وصلة : 11894780X  — تاريخ الاطلاع: 13 ديسمبر 2014 — الرخصة: CC0
  9. وصلة : 11894780X  — تاريخ الاطلاع: 31 ديسمبر 2014 — الرخصة: CC0
  10. http://data.bnf.fr/ark:/12148/cb121045499 — تاريخ الاطلاع: 10 اكتوبر 2015 — المؤلف: مكتبة فرنسا الوطنية — الرخصة: رخصة حرة
  11. مُعرِّف الضَّبط الاستناديِّ في قاعدة البيانات الوطنيَّة التشيكيَّة (NKCR AUT): https://aleph.nkp.cz/F/?func=find-c&local_base=aut&ccl_term=ica=mzk2016930480 — تاريخ الاطلاع: 1 مارس 2022
  12. مُعرِّف الضَّبط الاستناديِّ في قاعدة البيانات الوطنيَّة التشيكيَّة (NKCR AUT): https://aleph.nkp.cz/F/?func=find-c&local_base=aut&ccl_term=ica=mzk2016930480 — تاريخ الاطلاع: 7 نوفمبر 2022

وصلات خارجية
كليبر على مواقع التواصل الاجتماعى
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.