قلعة الموت

قلعة آلموت (|Alamūt|) كانت قلعه فوق جبل آلموت العالى عاش فيها الحشاشين بعد ما استولى عليها حسن الصباح.

قلعة الموت
البلد	ايران [1]
التقسيم الادارى	دهستان الموت بالا [1]
تاريخ الدمار	ديسمبر 1257
تاريخ الافتتاح الرسمى	860[2]
الاستعمال	عاصمه سابقه (الدولة الإسماعيلية النزارية )[2]،  وسجن (الدوله الصفويه )[2]
احداثيات	36°26′41″N 50°35′10″E

قلعة ألموت، قاعدة الحشاشين

حسن الصباح فى تنقلاته ماكانش مهتم بس بنشر دعوته و كسب انصار ، لكن كان مهتم كمان بانه يلاقى حته مناسبه يحولها لقاعده ليه. ما كانش عايز مكان فى مدينه يستخبى فيه من السلطات ، لكن معقل حقيقى منيع ما حدش يقدر يوصله وهو بيحارب امبراطورية السلاجقه.

لقى حسن قلعة ألموت Alamot مكان مناسب ليه. قلعة ألموت دى كانت حصن فوق صخره عاليه وسط جبال البورج على ارتفاع 6000 قدم من سطح البحر و مش ممكن الوصل ليها الا عبر طريق ضيق منحدر جداً و مليات منعطفات. و بيتقال ان القلعه بناها ملك قديم من الديلم و اتسمت بالديلمى ( ألوه أموت ) و معناه تعليم النسر او عش النسر، و بعدين جددها حاكم من العلويين سنة 860 ، و فضلت فى ايد العلويين لغاية ما حسن الصباح وصلها و قدر يدخلها فى 4 سبتمبر 1090 ، و يستخبى جواها من غير علم حاكمها ، و يضم رجاله فيها للعقيده الاسماعيليه عن طريق الدعاه ، فاتمردوا على حاكمها و طردوه منها ، و أخدها حسن الصباح و بيتقال انه ساب الحاكم يمشى و اداله 3000 دينار دهب كتعويض.

من اليوم ده بقى حسن الصباح سيد قلعة ألموت ، و من يوميها قعد فيها و ما خرجش منها لمدة خمسه و تلاتين سنه ، و فى المده دى ما خرجش من بيته جوه القلعه الا مرتين طلع فيهم ع السطوح. حسن اللى عاش فى بيته عيشه متقشفه كان بيقضى وقته فى القرايه و كتابة كلام الدعوه و تجهيز خططه.

فضلت مركز لقيادة الحشاشين لمدة 177 سنه لغاية ما حاصرها هولاكو و استولى عليها و قتل اخر زعما الحشاشين ركن الدين خورشاه.

1. https://tools.wmflabs.org/heritage/api/api.php?action=search&format=json&srcountry=ir&srlang=fa&srid=7252 — تاريخ النشر: 6 نوفمبر 2017
2. https://iranicaonline.org/articles/alamut-valley-alborz-northeast-of-qazvin-