صلاح ذو الفقار

اتولد صلاح الدين أحمد مراد ذو الفقار في مدينة المحلة الكبرى لأبوين من القاهرة وتحديدا من حي العباسية. فوالده الأميرالاي (عميد) أحمد بك مراد ذوالفقار كان من كبار رجال وزارة الداخلية. ووالدته نبيلة هانم ذو الفقار كانت ست بيت. وكان صلاح متفوق في دراسته وكان رياضي وهو واحد من أبطال مصر في الملاكمة وحصل علي بطولة كأس الملك في الملاكمة (وزن الريشة) سنة 1947. التحق صلاح ذو الفقار في البداية بكلية الطب جامعة الإسكندرية وده عشان يرضي ابوه لانه كان يتمني ان صلاح يبقي دكتور زي جده. بعد مرض ابوه، حوّل صلاح اوراقه لأكاديمية الشرطة (كلية البوليس) عشان يكون جنبه واتفوق فيها علميًا ورياضيًا.

اتخرج صلاح ذو الفقار من اكاديمية الشرطة (كلية البوليس) في سنة 1946، وبعدين اشتغل في مديرية أمن المنوفية وبعدها في مصلحة السجون وبالتحديد سجن مصر واشتغل مدرس في اكاديمية الشرطة من سنة 1949.

معركة الإسماعيليه 1952

اليوزباشى صلاح ذو الفقار كان واحد من أبطال معركة الاسماعيليه اللي قامت يوم 25 يناير 1952 واللي ظهر فيها بسالة وشجاعة رجال الشرطه المصريه ضد المحتل البريطاني. في اليوم ده تم حصار قسم الشرطة الصغير المجاور لمبني محافظة الاسماعيليه من قبل قوات الجنرال البريطاني أكسهام وكانوا 7000 عسكري إنجليزي متزودين بالاسلحه والدبابات ومدافع الميدان بينما كان عدد العساكر والظباط المصريين مايزيدش عن 800 عسكري في الثكنات و80 عسكري في مبني القسم والمحافظة معاهم تسليح ضعيف مش اكتر من البنادق القديمة.

صورة لصلاح ذو الفقار ايام خدمته في الشرطة سنة 1952

رغم كده صمد رجال الشرطة في المعركة دي وقاوموا بشجاعة وأستشهد منهم 50 عسكري وبقي 30 علي قيد الحياة لكن مصابون ورغم كده فضلوا يقاوموا القصف لغاية ما نفذت ذخيرتهم

بعد أنهيار جدران القسم ومبني المحافظة طلب الإنجليز من العساكر والظباط المصريين الخروج من القسم مستسلمين رافعين ايديهم. رفضوا الاستسلام وقرروا المقاومة لاخر نقطة دم وصنعوا بشجاعتهم ملحمة فداء ووطنية في حب مصر وكان صلاح ذو الفقار الظابط الصغير واحد من الظباط الصامدين في الموقعة الشهيرة دي سنة 1952. وبقي اليوم ده 25 يناير من كل سنة عيد الشرطة.

كان صلاح بيروح يحضر التصوير وهو صغير مع اخواته الكبار محمود ذو الفقار وعز الدين ذو الفقار اللي كانوا مخرجين وظهر في فيلمين وهو صغير من اخراج اخوه الكبير محمود ذو الفقار. في سنة 1955 حاول المخرج عز الدين ذوالفقار اخو صلاح الكبير إقناعه بالتمثيل، ولكن بحكم طبيعة شغله كان صلاح شايف انه مستحيل وزارة الداخلية هاتوافق علي شغله في السينما. ولكن مع إلحاح اخوه عز الدين عليه عشان يمثل في السينما وترشيح صلاح لدور بطولة ادام شادية في فيلم عيون سهرانه. وافق صلاح وقدم طلب لوزير الداخلية وفعلا قِدِر صلاح ذو الفقار ياخد تصريح استثنائي من وزير الداخلية للتمثيل في الفيلم.

صلاح ذو الفقار

بدأ صلاح ياخد دروس في الالقاء مع الفنان عبد الرحيم الزرقاني وكان أول فيلم ليه في السينما هو عيون سهرانه سنة 1956، بعدها عمل صلاح ذو الفقار دور حسين ابن الريس عبد الواحد في فيلم رد قلبي سنة 1957 بخفة دم وبساطة وكان الدور ده هو بداية الشهرة والنجومية. انهالت عليه سيناريوهات الافلام بعد فيلم رد قلبي ومالقاش حل غير الاستقالة من وزارة الداخلية واتوافق عليها ولكن نظرا لسجله الحافل في 11 سنة وهي فترة شغله في الشرطة، تم ترقية صلاح ذو الفقار لرتبة مقدم واحالته للمعاش بقرار استثنائي من وزير الداخلية وقتها زكريا محيي الدين.

اول ما خرج من الشرطه، اتعين صلاح ذو الفقار مدير تنفيذي لمنظمة الشعوب الأفريقيه والآسيويه واللي كان رئيسها في الوقت ده محمد أنور السادات، لكنه ماستمرش كتير في المنصب لانشغاله بادارة شركة الانتاج اللي اسسها مع اخوه عز الدين.

صلاح ذو الفقار وسعاد حسنى في مال ونساء (1960)

اتجه صلاح ذو الفقار بعد كده للسينما بقوة وسطع نجمه في سماء الوطن العربي كله واتعددت ادواره وحققت افلامه نجاح كبير كممثل ومنتج واشتغل مع اغلب نجمات السينما المصريه في عصرها الذهبي. اخد صلاح ذو الفقار كتير من الجوايز والتكريمات عن ادواره في السينما طول مشواره الفني. في سنة 1959 قدم صلاح ذو الفقار 5 أفلام منها بطولته لفيلم نساء محرمات ادام هدي سلطان وفيلم حب حتي العباده ادام تحيه كاريوكا وأدي دور بطولة في فيلم مهم هو فيلم الرجل الثاني. حقق صلاح ذو الفقار نجاح في فترة الستينات بمجموعه من الأدوار المتنوعة، مثلا؛ فيلم مال ونساء من إخراج حسن الإمام سنة 1960 وموعد في البرج (1962) وشاركه بطولة الفيلمين الممثلة سعاد حسني. وفي سنة 1961 قام ببطولة افلام موعد مع الماضي ووحيده ادام مريم فخر الدين. وفي سنة 1963 عمل دور عيسي العوام في الناصر صلاح الدين ببراعة. والسنة التالية كان دور الدكتور حموده، دكتور في حتي، في فيلم الايدي الناعمه كوميدي وحقق نجاح جماهيري، وكان الفيلم اتعرض في الدوره 14 من مهرجان برلين السينمائي الدولي سنة 1964. قام صلاح ذو الفقار ببطولة الفيلم الرومانسي اغلى من حياتي عام 1965 من إخراج محمود ذو الفقار وحقق نجاح جماهيري ونقدي واخد عنه جايزة الدولة في التمثيل وكان بداية الثنائي الأشهر مع شادية في أفلام مراتي مدير عام وعفريت مراتي وكرامه زوجتي واخد عنه ذو الفقار جايزة الدولة الاولي في التمثيل واخر فيلم لصلاح ذو الفقار وشادية كان لمسة حنان سنة 1971. بعد المرحلة دي قام صلاح ذو الفقار ببطولة أفلام ادت الفرصة لجيل جديد من الممثلات في أفلامه في فترة السبعينات زي نيللي وميرفت أمين ونجلاء فتحي أولها فيلم صباح الخير يا زوجتي العزيزه سنة 1969.

ذو الفقار في مشهد من القتلة (1971)

مع زبيده ثروت في الرجل الآخر (1973)

بدأ صلاح ذو الفقار فترة السبعينات بدور أمين عاكف في فيلم غروب وشروق سنة 1970 كمان فيلم امرأة زوجي وفيلم برج العذراء للمخرج محمود ذو الفقار،. في سنة 1971 قام ببطولة فيلم التشويق والجريمة القتلة وحقق نجاح في شباك التذاكر وقت عرضه علي شاشات السينما. وشارك فاتن حمامة بطولة فيلم قصير بعنوان ساحره سنة 1971 بردو وسافر صلاح ذو الفقار لسوريا ولبنان واشتغل في افلام كتير هناك منها فيلم باريس والحب سنة 1972 مع صباح. وإجتمع مرة أخري مع سعاد حسني في فيلم الناس والنيل من إخراج يوسف شاهين سنة 1972 ونفس السنة دعوه للحياه، وشاركه فيه ميرفت امين وفيلم رجال بلا ملامح في نفس السنة مع ناديه لطفي. قام ببطولة أفلام الرجل الآخر سنة 1973 ودنيا سنة 1974. وكمان قيامه بدور حافظ الراجل الفاسد في فيلم المذنبون سنة 1975. لعب صلاح ذو الفقار دور ظابط المباحث في الرغبة والثمن سنة 1978 وقام ببطولة مسافر بلا طريق سنة 1978، ولعب دور ملاك في فيلم خطيئه ملاك عام 1979. بدأ صلاح ذو الفقار يعمل ادوار مختلفة تناسب المرحلة السنية الجديدة زي بطولته لفيلم زياره سريه سنة 1981، وعمل دور قاضي، واخد عنه جايزة الدولي الاولي في التمثيل. وقام ايضاً باداء دور مركب في فيلم لحظه ضعف في نفس السنة وكان فيلم الطاووس مع نور الشريف وليلى طاهر ورغده وإخراج كمال الشيخ سنة 1982 محطة مهمة لانه حقق نجاح جماهيري ونقدي واخد صلاح جايزة الدولة في التمثيل عن دوره في الفيلم. وكمان عمل دور الشيخ حسونة في فيلم وداعا بونابرت للمخرج يوسف شاهين سنة 1985. بدأ صلاح ذو الفقار مرحلة جديدة من النضج الفني في مشواره في السينما وهو في اواخر الخمسينيات من عمره، بدأ يدَوَّر علي النصوص الأدبية لاكبر كتاب في مصر وفعلا لقي اللي كان عايزه وكان فيلمه من فضلك واحسانك عن قصة الأديب المصري العالمي نجيب محفوظ سنة 1986 بداية لأفلام زي اسف للازعاج سنة 1988 عن قصة الكاتب انيس منصور وفيلم الا ابنتى عن قصة الكاتب إحسان عبد القدوس سنة 1992 وأخيرا فيلم وزير في الجبس عن قصة الكاتب فتحي غانم في سنه 1993. وله بردو أفلام كوميدية زي المليونيره الحافيه في سنه 1987. وكمان الاسطي المدير عام 1988، وفي نفس السنه قام ببطولة فيلم ايام الرعب للمخرج سعيد مرزوق وعمل صلاح ذو الفقار فيلم الجريمة لعبة الاشرار اخراج هنري بركات وحقق ايرادات عالية لما اتعرض في السينمات سنه 1991.

ذو الفقار في الطاووس (1982)، وحصل فيه على خامس وآخر جايزه أفضل ممثل في مصر دور اول من وزارة الثقافة.

جذب المسرح صلاح ذو الفقار بقوة وقام ببطولة مسرحيات كتيرة طوال مشواره الفني منها رصاصة في القلب (1964) عن رواية الأديب توفيق الحكيم وكمان مسرحية روبابيكيا (1967) ادام تحيه كاريوكا ومحترم لمدة شهر (1982) ومسرحية اليوم المفقود مع ليلي طاهر في سنة 1988.

وكان لصلاح ذو الفقار نصيب من العمل العام لما كسب انتخابات وفاز بمنصب وكيل نقابة المهن التمثيلية سنة 1986 وحل مشكلات كتير وده اخد كتير من وقته. فِضِل يشتغل صلاح ذو الفقار لآخر يوم في حياته. وقام ببطولة أعمال تليفزيونية كتيره منها عودة الروح والذين يحترقون سنة 1977 وافواه وارانب سنة 1978 ومفتش المباحث سنة 1982 وحساب السنين سنة 1989 وطبعا أشهرها مسلسل عائلة الاستاذ شلش سنة 1990 واللي حقق نجاح جماهيري لما اتعرض علي شاشة التليفزيون المصري. وكانت أفلام لصوص خمس نجوم، الطريق الي ايلات والارهابى آخر أعماله وكلها اتعرضت بعد وفاته. لعب صلاح ذو الفقار كل الأدوار وكان اداءه دايما فيه خفة ظل.

• فارس الاحلام
• العبقرى
• الوسيم
• خفيف الظل

صلاح ذو الفقار وفاتن حمامه في العرض الخاص لفيلم بين الاطلال، اول فيلم من انتاج ذو الفقار في سينما ديانا في القاهره، فبراير 1959.

بدأ صلاح ذو الفقار مشواره في الإنتاج السينمائي بمشاركة اخوه الكبير عز الدين ذو الفقار في انشاء شركة افلام عز الدين ذو الفقار في سنه 1958، وانتجوا أفلام بين الأطلال سنة 1959 وبقي من افضل 100 فيلم في مئوية السينما المصرية وفي نفس السنة الرجل الثاني وملاك وشيطان والرباط المقدس سنة 1960 وصراع الابطال سنة 1962 وبقي من افضل 100 فيلم في مئوية السينما المصرية.

وفي سنة 1962، اسس شركة افلام صلاح ذو الفقار، بعد كده أنتج 3 أفلام منهم فيلمين بمشاركة رمسيس نجيب وهما أنا الهارب بطولة فريد شوقي وفيلم رسالة من امرأه مجهوله. وأنتج فيلم موعد في البرج من بطولته وكلهم حققوا نجاح في شباك التذاكر.

كان صلاح ذو الفقار بيدافع عن المرأه في افلامه وانتج أكتر من فيلم انصفوا المرأه المصريه، منها فيلم مراتي مدير عام واللي أنصف البطلة وسمح انها تكون مدير علي الرجل وبقي من افضل 100 فيلم في مئوية السينما المصرية. وله كمان فيلم 3 لصوص سنة 1966 واللي بيحكي 3 قصص لتلات حرامية في انتظار الحكم من القاضي وشارك صلاح ذو الفقار بالتمثيل في قصة منهم وهي سارق الدهب ادام هند رستم.

صلاح ذو الفقار في 1972

وفي سنة 1969 أنتجت شركة افلام صلاح ذو الفقار لشادية فيلم شيئ من الخوف من إخراج حسين كمال وأثار ضجة كبيرة في مصر وقتها وتم منع عرض الفيلم واتفرج عليه الرئيس جمال عبد الناصر وسمح بعرضه وحقق نجاح وبقي من افضل 100 فيلم في مئوية السينما المصرية. وأنتج فيلم رحلة عذاب في سنة 1972 وصدر في سينمات سوريا ولبنان. وفي عام 1973 كان صلاح منتج منفذ للفيلم القصير أغنيه الموت بطولة فاتن حمامة سنة واللي ناقش قضية التار في الصعيد وفي نفس السنة أنتج وشارك في بطولة فيلم الرجل الآخر. انتجت شركة افلام صلاح ذو الفقار لفاتن حمامه فيلم أريد حلا (1975) وحقق نجاح جماهيري ونقدي وساهم في تغيير قانون الاحوال الشخصية في مصر في الوقت ده لصالح المرأة وصلاح اخد عنه جايزة الدولة في الإنتاج وبقي الفيلم ده كمان من افضل 100 فيلم في مئوية السينما المصرية.

صلاح ذو الفقار وجيرالدين تشابلن في مشهد من فيلم نفرتيتى و اخناتون (1973)

شارك صلاح ذو الفقار في اكتر من فيلم عالمي أولها فيلم سر أبو الهول سنة 1964 وهو فيلم إيطالي وده بعد ما رشحه مخرج الفيلم دوشيو تيساري عشان الفيلم كان بيتصور في مصر. وشارك كمان في فيلم الفرسان وهو فيلم إنجليزي وقام بدور صلاح الدين الايوبي.

آخر مشاركة عالمية لصلاح ذو الفقار كانت في فيلم مكسيكي اسمه نفرتيتي واخناتون للمخرج المكسيكي راول ارايزا وانتاج عام 1973 مع جيرالدين تشابلن وقام صلاح ذو الفقار بدور حور محب ملك مصر في مصر القديمة.

الطريف في الموضوع ده انه بعد ما اتعرض فيلم سر أبو الهول، طلب دوشيو تيساري مخرج الفيلم من صلاح ذو الفقار انه يسافر إيطاليا ويشتغل في السينما الايطاليه ولكنه رفض وفضل الاستمرار في مصر.

صلاح ذو الفقار في 1964

اتجوز صلاح ذو الفقار أربع مرات في حياته. اتجوز من السيدة نفيسة بهجت سنة 1947 وهي أم اولاده احمد ومني وفِضلِت مراته حتي وفاتها سنة 1988 وله منها تلات احفاد هما كريم ذو الفقار وصلاح ذو الفقار وانجي بدوي. أما جوازه التاني فكان من الممثلة زهرة العلا وكان جواز ماستمرش كتير وانتهي بالطلاق. وكانت قصة الحب التي جمعت بينه وبين المطربة والممثلة شادية هي الأشهر في مصر واتجوزوا في سنة 1964 وقت تصوير فيلم أغلي من حياتي وكونوا مع بعض ثنائي فني قدموا من خلاله كتير من الافلام السينمائية الناجحة وأنتج لها أكتر من فيلم منها فيلم مراتى مدير عام وشيء من الخوف. وانتهي الجواز ده بالطلاق بعد 7 سنين. وبعدين اتجوز من مراته الاخيرة بهيجة واستمر جوازه منها حتي وفاته.

مقال اصلى :اعمال صلاح ذو الفقار

شارك صلاح ذو الفقار في اكتر من 250 عمل فنى سينمائى، مسرحى، تليفزيوني، واذاعى.

رصيد صلاح ذو الفقار السينمائى يعدّى 130 فيلم ما بين ممثل او منتج واشتغل مع أغلب نجمات السينما المصريه في عصرها الدهبى وقام ببطولة اكتر من 70 مسلسل تليفزيوني و20 مسرحيه واكتر من 30 مسلسل اذاعى. امتد مشواره الفنى الحافل من سنة 1956 لغاية وفاته في سنة 1993.

صلاح ذو الفقار فى تكريمه من الرئيس محمد انور السادات

حصل على جوايز كتير، منها:

• نوط الواجب العسكري من الطبقه الأولي من الرئيس جمال عبد الناصر تقديرا لدوره الوطني في معارك العدوان الثلاثي سنة 1956.
• جايزة احسن ممثل عن دوره في فيلم الايدي الناعمه في عام 1964.
• جايزة احسن ممثل عن دوره في فيلم اغلى من حياتى سنة 1965.
• جايزة احسن منتج عن فيلم مراتي مدير عام في سنة 1966.
• جايزة احسن فيلم من مهرجان المركز الكاثوليكي للسينما عن فيلم مراتي مدير عام في سنة 1966.
• جائزة الدولة الأولي في التمثيل عن دوره في فيلم كرامة زوجتي عام 1967.
• جايزة احسن منتج عن فيلم أريد حلا في سنة 1975.
• شهادة تقدير من الرئيس محمد أنور السادات في عيد الفن سنة 1979.
• جائزة الدولة الأولي في التمثيل عن دوره في فيلم زيارة سرية عام 1981.
• جائزة الدولة الأولي في التمثيل عن دوره في فيلم الطاووس في عام 1982.
• جائزة لجنة التحكيم الخاصة من مهرجان القاهرة السينمائي الدولي عام 1991.
• تكريم عن مجمل أعماله من المهرجان القومي للسينما المصرية في عام 1994.

اتوفي صلاح ذو الفقار في يوم 22 ديسمبر سنة 1993 في مستشفي الشرطة بالقاهرة عن عمر 67 سنه بعد أزمة قلبية مفاجئة خلال تصوير فيلم الارهابى.

1. وصلة : nm0957668