دريه شفيق
درية شفيق ( طنطا، 1908 - القاهره، 1975 )، صحفيه و كاتبه و مناضله مصريه من رائدات الحركة النسوية فى مصر و بيرجع ليها الفضل فى ان الست المصريه بقى ليها الحق فى الانتخاب و الترشيح عن طريق تعديل مواد الدستور المصرى.
| ||||
---|---|---|---|---|
![]() | ||||
معلومات شخصيه | ||||
الميلاد | 14 ديسمبر 1908 [1][2] | |||
الوفاة | 20 سبتمبر 1975 (67 سنة)[3][1][2] | |||
مواطنه | ![]() | |||
ابناء | جيهان رجائى | |||
الحياه العمليه | ||||
المدرسه الام | جامعة باريس | |||
المهنه | صحفيه ، وكاتِبه | |||
اللغات المحكيه او المكتوبه | لغه عربى [4] | |||
![](../I/Doria_Shafik.jpg.webp)
اتولدت دريه شفيق فى طنطا سنة 1908 لاب موظف حكومة و ام ست بيت و دخلت مدرسة نوتردام الابتدائية الفرنساويه فى طنطا و درست فيها المناهج المصرية بالاضافة الى اللغه الفرنساوى و بعدين درست لغاية شهادة الثقافة فى طنطا الثانوية للبنات و بعدين درست آخر سنتين من المرحلة الثانوية فى القاهرة للحصول على البكالوريا لعدم توافر دراسة البكالوريا للبنات فى طنطا فى الزمن ده و بعد ما خدت البكالوريا بعتتها وزارة المعارف فى بعثه تعليميه على باريس للدراسه فى السوربون و هناك درست فلسفه و اخدت الدكتوراه سنة 1940. موضوع رسالة الدكتوراه كان "فلسفة الفن الفرعونى "و" حقوق المرأة" و قالت فيها ان القانون المصرى بيدى الست حقوق كتيره ، لكن لما رجعت مصر واجهت الحقيقه المره لما رفضت كلية الاداب فى جامعة القاهره تعينها فى الكليه إكمنها ست و عشان افكارها المتحررة ، ففضلت من غير شغل لغاية ما الاميره شويكار عرضت عليها تحرير مجلة " المرأة الجديدة " اللى كانت بتصدرها فى القاهره فحررت فيها شويه و بعدين اصدرت مجلة " بنت النيل " و دى كانت اول مجلة ستات فى مصر و كان هدفها تنوير الستات و تثقيفهم. فى اواخر الأربعينات أسست جمعية " اتحاد بنت النيل " اللى كانت بتنادى بتحرير النسا، و بعدين اسست جمعيه لمحاربة الاميه و الجهل اللى كانوا منتشرين بين الستات فى مصر و فتحت مدرسه لمحو الاميه فى حى بولاق فى القاهره.
فى فبراير 1951 اتزعمت مظاهرة ضمت الف و خمسميت ست و دخلت بيهم مبنى البرلمان عشان تطالب بحقوق الست المصريه من النواب بطريقه مباشره و دى كانت حركه ثوريه معتبره و نقطة تحول فى تاريخ الست المصريه فى العصر الحديث ، بعد اقتحامها البرلمان باسبوع اتعرض على النواب قانون بينص على نيل الستات فى مصر لحق الإنتخاب و الترشيح للبرلمان اللى كان لغاية اياميها كل اعضائه رجاله.
دريه شفيق كان ليها كمان دور وطنى فى مقاومة الإستعمار البريطانى فى مصر ، ففى سنة 1951 كونت فرقه شبه عسكريه بتتكون من الستات المقاومة المستعمرين الانجليز المحتلين منطقة قناة السويس و اتدربت الستات على القتال و التمريض. و فى يناير 1951 اتزعمت مظاهره منظمة بنت النيل و حاصرت بنك باركليز الانجليزى فى القاهره و طالبت بمقاطعته.
بعد ما قامت ثورة يوليو 1952 طلبت دريه شفيق من مجلس قيادة الثوره تحويل اتحاد بنت للنيل لحزب سياسى فإتحولت المنظمه لحزب سياسى و ده كان اول حزب للستات اتشكل فى مصر.
لما اتشكلت اللجنه اللي هتشتغل على الدستور المصرى الجديد سنة 1954 احتجت دريه شفيق على إن اللجنه ما فيهاش ستات و اضربت عن الطعام هى و زملاء لها لمدة عشر ايام و ارسل لها اللوا محمد نجيب رئيس مصر وقتها يطمنها ان الدستور المصرى الجديد هيدي النساء حقوقهن السياسيه. و فعلاً الدستور الجديد اعطى الستات المصرية حق التصويت و الترشيح فى الانتخابات العامه.
الاوضاع و التطورات التي حصلت فى مصر و انعدام النشاط السياسى الحقيقى فى مصر بعد الثوره ما عجبش دريه شفيق فعاشت حوالى 18 سنه تحت الاقامة الجبرية لحد وفاتها لما وقعت من بلكونة بيتها فى حى الزمالك سنة 1975.
كان من ضمن مؤلفات درية أشعار وكتب ومذكرات غير مجلة "بنت النيل" ومجلة "الكتكوت الصغير" للأطفال.
![](../I/Wingedglobe2.svg.png.webp)
مصادر
- العمل الكامل مُتوفِّر في: http://www.oxfordreference.com/view/10.1093/acref/9780195382075.001.0001/acref-9780195382075 — المحرر: ايمانويل ك و هنرى لويس جيتس — العنوان : Dictionary of African Biography — الناشر: دار نشر جامعة اكسفورد — ISBN 978-0-19-538207-5
- مُعرِّف دليل الألماس العام: https://opac.diamond-ils.org/agent/23824 — باسم: Doria Shafik
- http://data.bnf.fr/ark:/12148/cb12377083m — تاريخ الاطلاع: 10 اكتوبر 2015 — المؤلف: مكتبة فرنسا الوطنية — الرخصة: رخصة حرة
- http://data.bnf.fr/ark:/12148/cb12377083m — تاريخ الاطلاع: 10 اكتوبر 2015 — المؤلف: مكتبة فرنسا الوطنية — الرخصة: رخصة حرة