اسماعيل ادهم

مات الساعه2 بالليل يوم التلات 23 يوليه 1940، على شط البحر فى اسكندريه، كان اسماعيل ادهم ماشي جنب الشط وفي ايديه شوكولاته بياكل منها وكان بيفرق منها على الاطفال اللى بيقابلهم فى سكته، وفجأة لقاه الناس بيرمي نفسه فى البحر، حاول بعض الناس انهم ينقذوه لكن كل المحاولات فشلت. بعد كذا ساعة نجح البوليس والمطافي باخراج جثته من المايه ولقى البوليس فى جيبه رساله شخصيه منه لرئيس النيابه بيقوله فيها انه انتحر لزهده فى الحياه وكرهه ليها.[5]

فى عدد مجلة «الرسالة» المصرية رقم 366 بتاريخ 8 يوليه 1940 اتنشر لاسماعيل ادهم مقال علمى فى اربع صفحات مليان معادلات فيزيا معقده سماه (البناء الكهربى للذره) THE ELECTRICAL STRUCTURE OF THE ATOM ، بيقول فيه إن اللى توصله العالم الألمانى «هينزنبرغ» هو اثبته قبلها بسنين فى معامل البحث العلمى فى موسكو. وإن اللى أعلنه البروفيسور الروسى «سكوبلزن» سنة 1938 بينسجم مع مبادئ الفيزيا الحديثه اللى اثبتها سنة 1933.

بعد ايام قليله من نشر المقال ده اتعلنت وفاة د.اسماعيل احمد أدهم غرقا على شط «جليم» بالاسكندرية، واتقال انهم لقوا فى جيبه رساله بيقول فيها انه انتحر وبيطلب تشريح جثته ومخه وحرق جثمانه بدل دفنه. ومعروف أن دعوى الانتحار هيا اقدم وأشهر طرق الاغتيال عند المخابرات. والغريب إن الرساله ما اتبلتش من ماية البحر مع انها كانت فى جيبه لما غرق، وكمان اللى بيطلب تشريح جثته ودماغه مش هيرمى نفسه فى البحر عشان ياكله السمك او تختفى جثته.

وبعدها أعلن أخوه د.ابراهيم أدهم أن كل أوراق وكتب وأبحاث د.اسماعيل ومنها 3 كتب فى الفيزيا والذره اختفت فى ظروف غامضة ومحدش يعرف مكانها.

عدم الاهتمام بحادثة وفاة الدكتور اسماعيل ادهم اول عالم ذره مصرى وراه بعض الاسباب منها : إن انتحاره او قتله حصل قبل ما يرموا على اليابان قنابل ذريه بخمس سنين، فمكانش حد فى مصر يعرف أهمية علوم الذره اللى كتب عنها د.أدهم، كمان بسبب إنه كان ملحد وأعلن عن افكاره فى كتيب سماه لماذا أنا ملحد؟ - وده كان نفس عنوان كتاب للفيلسوف البريطانى برتراند رسل كتبه فيما بعد – وده خللى كتير يشمتو فى موته كعقاب ربانى ليه على الحاده وبالتالى مفيش داعى يهتمو بالموضوع او يناقشوه.[6]