وفاة ديال ريان أورام

لمنطقة لجبلية فين طرات لحاديتة جات ف نواحي شفشاون ف شمال لمغريب (منطقة د رّيف)، لي معروفة ب زّراعة د لحشيش، لي كيشكّل مورد أساسي د لمدخول ل بزاف د لفاميلات ف جبال رّيف. هاد لعشبة كاتحتاج ل كميات كبيرة د لما د سّقي، سيرتو نّوع لمعدّل لي كيتستورد من لخاريج، عكس لكيف لي كاتعتامد زّراعة ديالو سيرتو على لما د شّتا. داكشي علاش سّكان د لمنطقة كيحفرو بيار عميقة، كيتسمّاو صوندات[7] باش يوصلو ل لمياه لي ف باطن لأرض. هاد صّوندات عادتن كيكونو مغطيين باش مايطيحوش فيهوم نّاس، ولاكين لوسع ديالهوم ماكيكونش كبير بزاف، ؤ ماكيشكلش خاطار كبير على شخص بالغ يلا طاح فيهوم.[8]

بسباب ضّغط لكبير على لفورشا لمائية لمنطقة كاتعاني من جفاف، لي كان من بين أسباب حيراك رّيف ف 2015،[9][10] ؤ كيخلّي سّكان يضطرو يحفرو صوندات أعمق ؤ أعمق باش يوصلو ل لما، ؤ عندو تأتيرات بيئية ؤ قتيصادية خاطيرة على لمنطقة بشكل عام.[11]

هاد لإشكاليات مامطروحينش غير ف لمغريب، مي كانلقاوهوم متلاً حتا ف سپانيا لي كاتعاني من لجفاف ف سّنوات لّخرة، ؤ فيها كتر من نص مليون بير ماشي قانوني على حساب تّقديرات. حوادت بحال هادو طراو أيضا ف بزاف د لبلدان، بحال دزاير، سپانيا، لميريكان، پولونيا ؤ ألمانيا.[12]

أعمال د لحفير ؤ مجهودات باش يتّعتق ريان

• 1 فبراير: ريان طاح ف بير لعمق ديالها 30 ميترو تقريبان فاش كان كيلعب، ف لوقت لي كان بّاه خدّام ؤ مشغول.[4] لفاميلة ديالو بقات كاتقلّب عليه، حتا لقاو بلي لبير محيد منها لغطا د لحماية ؤ كاينين أتار ديال رجلين صغار حداها. بعدما تأكدو بلي طاح ف لبير ب كاميرا د تّيليفون لي نزّلوها حتال لقاع، علمو سّلطات لمحلية. دارو محاولات د لإنقاد ب ستيعمال وسائل بسيطة، ولاكين ملي ماقدروش يوصلو ليه علمو سّلطات ديال إقليم شفشاون لي بدات كاتدرس طرقان جديدة باش يعتقو لولد.[13]
• 2 فبراير: حاولو متطوعين باش يوصلو ل ريان، ولاكين ضّيق د لحفرة جعل لقضية موستحيلة. مي قدرو يكونفيرميو بلي لولد باقي حي. صّوشل ميديا عطات هتيمام كبير ل هاد لحاديتة، ؤ ف تويتر ؤ مواقع خرين نتاشرو هاشطاݣات بحال #انقذو_ريان، #save_rayan ؤ غيرهوم. تم تنزيل لما ؤ لماكلة ؤ لوكسيجين ل ريان. سّلطات بدات كاتخدم على بلان جديد ؤ جابت دوزان تقيل د لحفير بحال جرافات باش تعتق ريان.[13]
• 3 فبراير: لفرقة د لإنقاد بقات خدّامة ف لحفير من جنب لبير باش يوصلو ل نفس لمستوى فين كاين ريان، باش موراها يبداو يحفرو أفقياً. لحفير خاصو يتدار بشكل تدريجي ؤ بشوية باش مايتسببوش ف نهيار ديال تّراب لي يقدر يقتل لولد ؤ حتا لي باغين يعتقوه. نّاطق رّسمي ب سميت لحوكومة مصطفى بايتاس ݣال بلي وزير دّاخيلية قدّم تقرير على لموضوع ل لحوكومة، ؤ بلي لفرقة د لإنقاد خدّامة ب توجيهات من لووزارا د دّاخيلية ؤ د صّحة ؤ لحماية جّتيماعية، ؤ تحت إشراف رايس لحوكومة عزيز أخنوش.[13]
• 4 فبراير: لحفير وصل ل نفس لمستوى فين كاين ريان، ؤ بدات لعملية د لحفير لأفقي، معا تخدام د قوادس عريضة باش تحمي لولد ؤ لفرقة د لإنقاد ف حالة وقوع نهيار. لحفير كيتم بشكل تقيل ب أدوات بسيطة بحال لفيسان ؤ لبالات لي ماكاتديرش رتيجاجات كبيرة. لعمال كانو كيحبسو مرة مرة باش يتجنبو شي نهيار د تّراب.[14]
• 5 فبراير: واحد لحجرة جات ف طّريق تسببات ف تعطال لعملية ب 3 د سّوايع.[14] فريق طبي ؤ هيليكوپطير ديال لقوات لملكية جّادارمية كيتسناو باش يخرج لوليّد ؤ يديوه ل أقرب سبيطار.[15] قوادس كبار كانو ديجا تحطو ؤ تّبتو باش يحميو نّفق.[16] ف ليل د نفس نّهار معا جوايه لعشرة علن دّيوان لملكي بلي ريان مات، ؤ لماليك محمد سّادس عزا واليديه شخصياً.[17]
• 7 فبراير: تدارت لݣنازة ديال ريان لي حضرو ليها مياوات د نّاس ف دّوار ديالو.[18]

تّغطية لإعلامية د هاد لحادات كانت كبيرة بزاف، سوا ف لمغريب، ف لبلدان د شمال إفريقيا ؤ شّرق لأوسط، ؤ ف لعالم كامل، ؤ ب بزاف د لّوغات بحال لعربية، لفرانساوية، نّݣليزية، سّپنيولية، لألمانية، لهولاندية ؤ غيرها.

بزاف د شّخصيات رّياضية بحال أشرف حكيمي ؤ رياض محرز، ؤ لفنية بحال نانسي عجرم ؤ دنيا باطما، ؤ سياسية بحال إيمانويل ماكرون ؤ شيخ محمد بن راشد آل مكتوم نعاو لوفاة ديالو ؤ عبّرو على تّضامن ديالهوم ف لكونطات رّسمية د تويتر.[19]

لبابا فرانسيس شكر لمغاربا ؤ حيّاهوم على لمجهود لكبير لي داروه باش ينقدو لحياة ديال ريان، ؤ عتابرو ميتال ديال "روح لقداسة لي كاينة عند بنادم".[20] وزارة لخارجية لميريكانية حتا هيا نعات ريان ف بيان رسمي ؤ عزّات لمغاربا ف لوفاة ديالو.[21]

بزاف د نّاس ف لمغريب نتاقدو لوزير لّول عزيز أخنوش حيت ماعلّقش على لحاديتة د ريان ؤلا لمجهودات لي تدارت باش تنقدو، ف لكونطات رّسمية ديالو ف صّوشل ميديا. ؤ نتاقدو لحوكومة حيت حتا وزير مغريبي ما زار لموضع ديال لحاديتة بشكل رسمي. ف لوقت لي عاداد كبير د شّخصيات سّياسية ؤ لفنية ؤ رّياضية علنات على دّعم ؤ تّعاطف ديالها ف لخمس يّام ديال محاولات لإنقاد، ؤ عزّات لمغاربا ؤ لفاميلة د ريان بعدما تّعلن على لوفاة ديالو.[22]

من جيهتو، نتاقد لمجلس لمغريبي د صّحافة، ف تقرير لي خرج ف 4 فبراير، تّخدام لّاأخلاقي ديال تصاور ؤ ڤيديوات د ريان ؤ هوّا عامر دمايات، ؤ ف حالة مزرية، ف جّورنالات ؤ لمقالات صّحافية، ؤ عتابر هادشي لي داروه بعض صّحافيين ؤ نّاشيطين ف صّوشل ميديا ضد أخلاقيات لحرفة د صّحافي، حيت كيضر لمشاعر د لفاميلة ديالو ؤ كيخرق مبدأ لحق ف صّورة، شّي لي ݣالتو حتا لحرايفية د لإعلام ؤ ليتيصال ؤ ؤستادة د صّحافة ف لمعهد لعالي د لإعلام ؤ ليتيصال ف رّباط دكتورة نادية لمهيدي.[23] ؤ نتاقد أيضا ستيجواب قاصرين ؤ هوما ف تأتر ب داكشي لي طاري ل ريان، غير على ود جمع لجيمات ؤ لڤيوز. ب لإضافة ل لّامهنية ديال بعض صّحافيين لي نشرو أخبار غالطة على لموضوع، ؤلا نشرو معلومات بلا مايتحققو منها ل أغراض تسويقية ؤ تيجارية.[24]