هيدروجين

لهيدروجيننّݣليزية: Hydrogen من ليونانية ὕδωρ هودور "ما" ؤ لفرانساوية gène جين "يخلق، يصاوب" ب معنى "لّي كيخلق لْما")[1] هوّا عنصر كيماوي أساسي، رّمز ديالو هوّا H ؤ نّمرة دّرية ديالو 1[2] ف طّابلو دّوري، هاد لعنصر مستّف ف سّطر (دّورة) 1 ؤ لعمود (لمجموعة) 1. هاد لعنصر داخل ف لݣروپ ديال لّافلزّات. ف ضّروف لمعيارية د ضّغط ؤ لحرارة، هاد لعنصر كيكون ف لحالة د غاز ؤ هوّا معروف من 1766.

هيدروجين
لجدوال الدوري
الرمزH
النمرة الدرية1
قبل منّوعنصر كيماوي (نيوترونيوم)
بعد منّوعنصر كيماوي (هيليوم)
ليحداتيات فلجدوالعناصر الدورة الأولى، عناصر المجموعة الأولى و ما
ليكتيشاف
اللي كتاشفوهنري كاڤنديش
فين تكتاشفنڭليز
إيمتا تكتاشف1766
تسمّى علىما
لبيانات لمعبورة
لكتلة1.008 Da
شكل ليليكترونات1s¹
لكتافة0.08987 g/cm³
لحرارة فاش كايدوب−259.14 °C
لحرارة فاش كايغلي−252.87 °C
النماري دلاكسدة−1،  0
الطاقة دالتايّون
(لمستوايات)
13.598 (1)
لكهروسيلبية2.2


تّاريخ

ف لبدية ديال لقرن 16، لخيميست پاراسيلسوس لاحض بلي لبوّاقات لّي كيطلعو فاش نّشارة د لحديد كتزاد ل لْحمض لْكبريتي قابلين ل ليشتيعال. ف 1671، روبرت بويل غادي يدير نفس لْملاحضة. حتا واحد من هاد جّوج ما قدر يستنتج لْوجود ديال لهيدروجين، داكشي علاش ليكتيشاف ديالو كيتنسب ل كاڤنديش. ف 1766، قدر يجمع هاد لبوّاقات ؤ يبين بلي مصاوبة من ݣاز مختالف علا لݣازات لْخرين. من بعد غادي يبين بلي لهيدروجين ملّي كيتحرق كيعطي لْما، ؤ ب هادشي غادي يسالي معا لعتيقاد لّي كان منتاشر بلي لْما عنصر أساسي ف طّبيعة. هاد لݣاز غادي تعطا ليه سّمية ديال هيدرو-جين، ب معنى "لّي كيخلق لْما" من طرف عالم شّيمي لفرنساوي أنطوان لاڤوازيي.

ف 1931، هارولد أوري ؤ لمساعدين ديالو ف جامعة كولومبيا ف لميريكان، كتاشفو نوع آخور نادر ديال لهيدروجين. هاد نّوع، لّي هوّا ليزوطوپ هيدروجين-2، ؤ لكتلة ديالو ضّوبل ديال لهيدروجين-1، تسمّا دوتيريوم.[3]

لخاصيات

لْخاصيات لْخارجية

لهيدروجين كيكون علا شكل ݣاز ف درجة لحرارة لْعادية، ؤ ماعندوش لون ؤلا ريحة، ؤ عندو أصغر كتافة ما بين لݣازات كاملين. كيولي سايل ف 252.879- درجة سيلسيوس، ؤ كيتجمد ف 259.16- درجة سيلسيوس.

لهيدروجين هوّا أكتر عنصر موجود ف لْكون ب نسبة ديال 73%، عاد تابعو لهيليوم ب 25%، ؤ لعناصر لخرين مجموعين 2%. أغلبية ديال هاد لهيدروجين كاين ف نّجوم. كوكب لمشتري حتا هوّا مكون أساسا من لهيدروجين.[3][4]

لخاصيات لفيزيكية

لخاصيات لفيزيكية ديال لهيدروجين-1، لّي هوّا أكتر نضير د لهيدروجين متوفر ف طّبيعة هيّا كتّالي:

تطبيقات عملية

لهيدروجين كيعتابروه بعض نّاس هوّا مصدر د طّاقة نّقية ديال لمستقبل، حيت نقدو نجيبوه من لْما، ؤ فاش كيتحرق كيولّي ما مرة خرة. كاينين ديجا خلايا د لْفيول كتخدم ب لهيدروجين، كتستعمل دابا ف بعض طّوبيسات ؤ طّوموبيلات.

لهيدروجين كيتستعمل ف لهندسة زّراعية باش ينتج لْأمونياك لّي كيتخدم ف تّخصيب زّراعي، ؤ ف إنتاج لپلاستيك ؤ بعض دّوايات. كيتستعمل أيضا ف تكرير لپيترول باش يتحيد منو لْكبريت، ب لإضافة ل صّناعة لغدائية متلا ف إنتاج سّمن صّناعي.

ف صّناعة د جّاج، كيتستعمل لهيدروجين ك مناخ حامي باش يتصنّعو لواح ملسة ديال جّاج، ؤ ف ليليكترونيك كيتخدم ف تصنيع شّقفات لإليكطرونية.

لكتافة ضعيفة ديال لهيدروجين خلاتو يكون أول ختيار ك غاز باش كيتعمرو لمنطادات، مي فاش نفاجر لْمنطاد لْمعروف هيندنبورݣ ف نيوجيرسي ف لميريكان، توقف هاد ليستخدام.[3]

إزوطوپات

ليزيطوپ هيدروجين-1 كيتسما پروتيوم، ؤ كيكون مكون من پروتون ف نّواة ؤ إليكطرون. دّوتيريوم ؤلا هيدروجين-2 نّواة ديالو مكونة من پروطون ؤ نيوطرون، ؤ تريسيوم (هيدروجين-3) عندو جوج نيوترونات ؤ پروتون ف نّواة. لإزوطوپات لخرين كاملين صطناعيين تصاوبو غير ف لمختبر ؤ ماشي مستاقرين، بحيت كيتلاشاو ف أجزاء قليلة من تانية من بعد ماكيبانو.[5]

لإيزوطوپات ديال لهيدروجين
سمية د لإيزوطوپسّمية 2لكتلة دّرية (ݣرام/مول)نّسبة ف طّبيعة (%)نص د لحياة
هيدروجين-1پروتيوم1.00899.9885
هيدروجين-2دوتيريوم2.0140.0115
هيدروجين-3تريسيوم3.0160~12.31 عام
هيدروجين-4كوادريوم4.0260140 يوكطوتانية
هيدروجين-5-5.0350910 يوكطوتانية
هيدروجين-6-6.0440290 يوكطوتانية
هيدروجين-7-7.052023 يوكطوتانية

عيون لكلام

  1. "أصل كلمة هيدروجين" (ب نݣليزية). مأرشيڤي من لأصل ف 2023-07-09. تطّالع عليه ب تاريخ 2020-10-19.CS1 maint: unrecognized language (link)
  2. "لمعلومات لكاملة ديال لعناصر د لجدول الدوري". مأرشيڤي من لأصل ف 2023-04-19. تطّالع عليه ب تاريخ 2020-10-07.
  3. "لْجمعية لْملكية ديال شّيمي Royal Society of Chemistry، لْجدول دّوري، هيدروجين" (ب نّݣليزية). مأرشيڤي من لأصل ف 2023-09-24. تطّالع عليه ب تاريخ 2020-10-19.CS1 maint: unrecognized language (link)
  4. "نّسبة ديال لهيدروجين ؤ لعناصر لخرة" (ب نݣليزية). مأرشيڤي من لأصل ف 2023-06-08. تطّالع عليه ب تاريخ 2020-10-19.CS1 maint: unrecognized language (link)
  5. "ليزوطوپات ديال لْهيدروجين" (ب نݣليزية). مأرشيڤي من لأصل ف 2022-05-17. تطّالع عليه ب تاريخ 2020-10-20.CS1 maint: unrecognized language (link)
Wikimedia Commons تقدر تزيد شوف بزاف د تّصاور و لمعلومات ديال Hydrogen ف ويكيميديا كومنز.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.