هوكايدو
هوكّايدو (ب جاپونية:北海道,hokːaidoː)، وكاتعني "الطريق ديال بحر الشمال"، و كانت كاتسمى زمان اِزو ولّا ييزو، هي الجزيرة الشمالية[1] ما بين الجزاير الربعة الكبار ديال جاپون، و رسميًا، هوكايدو كاتشكل فنفس الوقت عمالة و جهة، عاصمتها هي مدينة صاپّورو، و فالجزيرة عايشين بعض الناس من الآينو، اللي هما السكان اللولين ديال كتيرة جزاير جاپون.
جغرافيا
تضاريس
هوكايدو كاينة فالشمال ديال الجبّان، قريبة من سيبيريا، و ضاير بها البحر الهادي من الشرق و بحر الجبّان من الغرب و بحر اوخوتسك من الشمال، ومفارقة مع جزيرة هونشو بالبوغاز ديال تسوݣارو.
71% من الجزيرة عامر غيب، و 16% اراضي فلاحية.
عمالة هوكايدو داخلة فيها بزاف ديال الجزاير آخرى بحال ريشيري و اوكوشيري و ريبون.
جو
هوكايدو معروفة بصيافها الباردين و الجافّين (حاجة اللي كاتخلّي بزاف ديال السياح يزورو) و شتاواتها الصعاب، الحرارة المتوسطة فشهر غشت كاتكون فجوايه 22 °C ، و فشهر يناير كاتكون ما بين -4 °C و -12 °C،على حساب خط العرض و العلو ديال كل بلاصة.
الجزيرة فيها شلا رعدات دياول التلج اللي كايجيو من سيبيريا.
تاريخ
هوكايدو فلاصل كانت ارض شعب الاينو[2]، و لدابا مازلنا نقدرو نلقاو الاتر ديال لغتهم فسميّات بعض البلايص فالجزيرة، و بزاف ديال المدن، و فشلا انواع ديال الشجر و الحيوان ( بحال يزوماتسو، واللي كاتعني تايدا "الصنوبر" ديال هوكايدو).
تقسيم اِداري
هوكايدو هي فنفس الوقت عمالة (هوكايدو) و جهة جبّانية (هوكايدوكين؛ واخا هاد اللقب قليل اِلا تستعمل، و كايتستعمل غير فاش المفارقة كاتكون ضرورية). عاصمة العمالة هي مدينة صاپورو.
اهم مدن فالعمالة هما صاپورو و هاكوداتي و اَساهيكاوا.
اقتصاد
واخا كاينة شوية ديال الصناعة (الكاغيط، البيرّة، الماكلة)، كتيرة الصنايع كاينة فالمجال ديال السرابس(الخدمات). السياحة مهمة بزاف للعمالة و بالخصوص فالصيف اللي كايكون فيه الحال بارد، عكس الجزاير اللاخرى اللي كاتكون سخونة.
فلاحة
هوكايدو هي العمالة اللي عندها اكتر غلّات ديال الفلاحة فالجبّان[3]، وبالخصوص الروز و الحوت. كتيرت المجال ديال الفلاحة متطور بزاف: تربية البهايم، الزرع، الصيد. الربُع ديال الارض المحروتة فالبلاد كاينا فهاد العمالة. اهم الغلّات هما: القمح (65%)، باطاطا (79.5%)، الباربا (100%).
سياحة
بلاصة السياحة مهمة فاقتصاد ديال جزيرة هوكايدو. عام 2014، جا للجبّان كتر من 13 مليون سايح برّاني، و هاد العدد كايتزاد عام على عام، كتيرة هاد السياح اصلهم من آسيا، و بالخصوص من الشينوا، طايوان، و كوريا الجنوبية.
تقافة
عيد التلج ديال صاپورو (النحت على التلج).
مسابقات على العودان.
منازه وطنية:
- المنزه الوطني ديال اَكان
- المنزه الوطني ديال دايسيتسوزان
- المنزه الوطني ديال كوشيرو شيتسوݣين
- المنزه الوطني ديال ريشيري ريبون ساروبيتسو
- المنزه الوطني ديال شيريطوكو
- المنزه الوطني ديال شيكوتسو طويا
بعض الناس دياول هوكايدو
- بين كاشيوا، رسام
- ساكي كوماݣاي، كوايرية عالمية
- هيرومو اَراكاوا، رسامة مانݣا
