محمد بن سعيد آيت إيدر

تولد محمد بن سعيد آيت إيدر ف 1925 ف دوار تين منصور ف اشتوكة آيت باها فسوس. قرا ف اللول تما، ومن بعد مشا يكمل فمراكش، وتما فين تعرًف على النضال لوطني ضد ليستيعمار وتلاقا ناس بحال عبد الله براهيم و لمهدي بنبركة. ف 1951، شارك ف مظاهرة ضد لاستعمار وتسجن 3 شهور.[2]

بدا آيت إيدر لعمل لمسلًح ف لخمسينات، وهو من لمؤسسين د جيش التحرير. كان هو الشاف ديال جيش التحرير ف جنوب لمغريب، واللي بقا مكمًل واخا جا لاستقلال، اللي كان تيسمًيه آيت إيدر "استقلال ناقص". ف 1958 تحالفات الدولة مع فرانسا وصبانيا باش يحاربو جيش التحرير وهرًسوه ف واحد لعملية سمًاوها "عملية الشطابة - operation écouvillon".

من بعد ماتحل جيش التحرير، بقا ينسعيد تيعارض النظام، وتحكم عليه ب الإعدام ف 1963. قبل ما يتقبط هرب للجزائر، ومن بعد مشا ل فرانسا ودخل مع لمنظمة ديال 23 مارس.[3] رجع بنسعيد للمغرب فاللول د التمانينات و أسس لحزب د منظمة العمل الديموقراطي الشعبي ف 1983. ودخل ب لحزب ديالو ل لبرلمان من 1984 تال 2007.[4]

ف 2005، كان من لمؤسسين ديال لحزب ليشتيراكي لموحًد، اللي جمع بزاف د لأحزاب ليسارية الصغيرة ف لمغريب.

ف 2001، خرًج بنسعيد آيت إيدر كتاب سميتو صفحات من ملحمة جيش التحرير بالجنوب المغربي، اللي هضر فيه على التاريخ ديال جيش التحرير ف سوس ولجنوب د لمغريب.

• 2015: وسام لعرش ب ڭراض د الحمالة الكبرى