لعرب

تاريخ نتاع لعرب قبل لإسلام شوية ضيق و ما فيهش شي توتيق بزاف بسبب انه لعرب ما كانوش شعب كيعتامدو على لكتابة و تدوين و كان طابع نتاع لعيش ديال لعرب هو بدوي و كتمتد لغتهم ف منطقة لي كتسمى " شبه لجزيرة لعربية "

اغلبية نتاع لمصادر لي كتهضر على تاريخ لعرب قبل لإسلام هوما مصادر إسلامية و لكن كاين شي مصادر من غيرها قديمة من لبيزنطيين و حتى لفرس منهم لغساسنة لي كانوا عرب تحت سيادة لبيزنطيين و لمنادرة ف لعراق لي كانوا تحت سيطرة لفرس

لفترة تاريخية نتاع لعرب قبل لإسلام بزاف لي كيسميوها " لجاهيلية " حيتاش كانوا شعب وتني و كاين كيعيش ف تقافة لي فيها عادات لا انسانية بحال دفن لبنات حيين و لحروب بين لقبايل

لإسلام غا يدير واحد تحول كبير ف تقافة نتاع لعرب و تاريخ نتاع لعرب حيتاش غا يخليهم يخرجو من لحالة لبدوية و لمنعزلة لي كانوا فيها ل بناء نتاع أكبر قوة عسكرية ف ديك لوقت حيتاش مور وفاة نبي محمد غا يبداو ف توسع على حساب لأراضي تحت اسم خلافة راشدة و غا ياخدوا بزاف نتاع لأرض من لبيزنطيين و غايطيحو لفرس و موراها فتح لمصر حتى لشمال افريقيا حتى لأندلوس عام 711 ، فهاد الفترة هادي غا تبان دولة لأموية لي كانت نوعا ما واحد دولة قومية عربية و لي خلات العرب يتميزو بزاف و يكونو مواطنين من درجة لولة عكس شعوب لأخرى لي كانت تحت سيادة ديالهم بحال لفرس و لأمازيغ

خريطة نتاع لخلافة لأموية و لفتوحات ديالها

• تمركزات بزاف نتاع لقبايل لعربية فهاد الفترة ف شبه لجزيرة لعربية و شام و لعراق و حتى ف مصر و لأندلوس و لكن واخا هكاك كانت حالة لعرب ف هاد لفترة متقلبة بين ضعف و بين لقوة شي مرات حيتاش مع طلع نفود نتاع لأعاجم و لا لي ما كيهضروش لعربية بحال ديلم و لفرس و ترك هادشي خلا لعرب يغيبو بعض المرات من بلايص لقيادية ف لمشرق
• و بانت حتى ف لقرون لوسطانين هجرات نتاع شي عرب لشمال افريقيا و لمغريب منهم بنو هلال و بنو سليم و بنو معقل
• ف لأندلوس كان لعرب دور كبير ف ظهور بعض لفئات لمستعربة و هادشي خلا يبان حتى شي لهجات لي مخلطة بين لعربية و صبليونية لي كتسمى ب لموزرابية

لأمويين ف لأندلوس لي كانوا سلالة عربية حاكمة سپانيا ف لقرون لوسطانيين

سيطرو لعتمانيين على بزاف ديال لبلايص لي كتهضر لعربية او لي ساكنينها لعرب بحال مصر و شام و تونس و لعراق و حتى لحجاز و بقاو لعتمانيين حاكميين هاد لبلايص لمدة نتاع 500 عام و ف لأواخر نتاع هاد لفترة تعرضو لعرب لواحد تمييز كبير لي داروه لعتمانيين ضدهم و تسمات هاد سياسة ب " تتريك " و هادشي لي خلا تبان بزاف نتاع تورات و لي منها تورة لعربية لكبرى ضد لعتمانيين

فهاد الفترة هادي و مور ما دازات لمرحلة لعتمانية و خرج لإستعمار لؤروبي هادشي كان لبداية نتاع انشاء ديال اتحادات عربية و منظمات و بانو حتى قوميين و كتاب و ادبيين كيروجو لفكرة نتاع لوحدة لعربية من لعراق حتى لموحيط لأطلاسي و بانو حتى سياسيين كبار من بزاف نتاع دول ف منطقة نتاع شمال افريقيا و شرق لوسطاني روجو لهاد لفكرة هادي و بقوة و حاليا جامعة دول لعربية داخل فيها 22 دولة و بانت ف مارس 1945 ف مدينة نتاع لقاهرة ف مصر

شعار نتاع جامعة دول لعربية