Wynnie Schumann

Hester Winifred (Wynnie) Schumann (Knysna, Kaapkolonie, 7 Maart 1903 – Stellenbosch, Suid-Afrika, 14 September 1989) was ’n Suid-Afrikaanse opvoedkundige.

Wynnie en Christiaan Schumann se grafsteen in die Onderpapegaaiberg-begraafplaas, Stellenbosch.

Wynnie Schumann was ’n dogter van William Thomas Perks en Jane Charlotte Bouwer. Sy ontvang haar vroegste skoolonderrig aan ’n plaasskool tot st. 3 en daarna aan die destydse Hoër Meisieskool op George. In 1921 gaan sy na die destydse Opleidingskollege te Grahamstad en van 1924 tot 1926 studeer sy aan die Universiteit van Stellenbosch, waar sy ’n B.A. met die hoofvakke geskiedenis en ekonomie behaal. Nadat sy aan verskeie laer- en hoërskole in Kaapland skoolgehou het, keer sy terug na die Opleidingskollege Grahamstad as dosente, waar sy werksaam was tot haar huwelik in 1928 met prof. Christian Gustav Waldemar Schumann (17 Desember 1898 – 30 September 1980. Hy was direkteur van die Buro vir Ekonomiese Navorsing aan die US, president van die konvokasie van oudstudente van die dieselfde instelling en erepredisent van die Trust Bank van Afrika Bpk. Ná haar huwelik het sy doseer aan die opleidingskollege vir kleurlinge en ook aan die Universiteit van Stellenbosch se fakulteit opvoedkunde. Twintig jaar lank was sy raadgeefster vir vyf vrouekoshuise aan die US en dus lid van die koshuiskomitee van die US-raad. Sy het ook gedien in die hospitaalraad en die kindersorgvereniging. Vanaf 1955 was sy jare lank presidente van die Vrouelandbouvereniging (VLV) in Kaapland, waarby sy omstreeks 1935 aangesluit het, en sameroepster vir opvoeding en leeslus vir die Kaapprovinsie. Sy het ook in die hoofbestuur van die Suid-Afrikaanse Vrouelandbou-unie gedien en was in 1961 die stigter van die Suid-Afrikaanse Unie van Huisvroueklubs.

Vier kinders is uit haar en prof. Schumann se huwelik gebore: Winie, Wilsie, Annemarie en Christiaan. Hy het in ’n stadium as ingenieur vir die Windhoekse munisipaliteit gewerk.