Wuthering Heights

Wuthering Heights
Skrywer	Emily Brontë
Land	Verenigde Koninkryk
Taal	Engels
Genre	Roman
Uitgewer	Thomas Cautley Newby
Uitgegee	Desember 1847
Medium	Druk (gebind & sagteband)
ISBN	0-486-29256-8
Letterkunde-portaal

Wuthering Heights is die enigste roman van Emily Brontë. Dit is die eerste keer in 1847 gepubliseer onder die skuilnaam Ellis Bell. Brontë is die volgende jaar oorlede, op 30-jarige ouderdom, en haar suster Charlotte (ook 'n skrywer) het gevolglik die roman se manuskrip geredigeer om in 1850 as 'n postume tweede uitgawe gepubliseer te word.

Die roman se sentrale tema het te doen met die effek van jaloesie en wraaksug op verskeie karakters. Alhoewel dit vandag as een van die vooraanstaande werke van Engelse letterkunde beskou word, was historiese evaluerings daarvan nie altyd goedgunstig nie: veral omdat dit Victoriaanse ideale van geloof, moraliteit, die klassesisteem en geslagsrolle bevraagteken, maar ook omdat dit 'n Gotiese atmosfeer skep wat deur verskeie wrede situasies onderskraag word. Gedurende die tweede deel van die 19e eeu was Charlotte Brontë se roman Jane Eyre deur letterkundiges as die beste van die Brontë-susters se werke geag, maar 20ste-eeuse waardebepalings vind dikwels dat Emily se Wuthering Heights beter is.

Daar is alreeds verskeie gelyknamige verwerkings van hierdie roman gemaak: onder andere, dramatiserings soos die 1939 Hollywood-film met Laurence Olivier en Merle Oberon in die hoofrolle, die 1967 BBC produksie met Ian McShane en Angela Scoular, die 1970 film met Timothy Dalton wat die rol van Heathcliff vertolk, Die 1978 vyfdelige televisiereeks wat die BBC vervaardig het, die 1992 film met Ralph Fiennes en Juliette Binoche as Heathcliff en Cathy, en die 2009 tweedelige televisiereeks met Tom Hardy, Charlotte Riley, Sarah Lancashire en Andrew Lincoln in die rolverdeling.

Die sanger Kate Bush het in 1978 haar topverkoper debuut-enkelsnit "Wuthering Heights" vrygestel, wat gebaseer is op 'n ikoniese toneel uit die roman waar 'n geestesversteurde Cathy in die koue buite Heathcliff se venster staan en vra om ingelaat te word.

Eksterne skakels

Wikimedia Commons het meer media in die kategorie Wuthering Heights.

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.