Wolf Kibel

Wolf Kibel (16 Desember 1903 – 29 Junie 1938) was 'n Suid-Afrikaanse skilder.

Wolf Kibel
Geboortenaam Wolf Kibel
Gebore (1903-12-16)16 Desember 1903[1]
Grodzisk, Pole
Sterf 29 Junie 1938 (op 34)
Kaapstad
Suid-Afrika
Nasionaliteit Vlag van Suid-Afrika Suid-Afrika
Veld Skildery, tekening, drukkuns
Beweging Ekspressionisme
Werke Portrait of Freda Kibel (Suid-Afrikaanse Nasionale Kunsmuseum)
Still-life with bird (Pretoriase Kunsmuseum)
Cellist (Pretoriase Kunsmuseum)
Beïnvloed Marc Chagall
Henri Matisse
Oskar Kokoschka
Chaim Soutine
Een van sy werke met olieverf op doek.

Hy het in 'n Poolse dorpie, Grodzisk, in die distrik Warschau grootgeword. Sy vader is dood toe hy nog jonk was en hy het by 'n handsakmaker gaan werk. Wolf Kibel wou van jongs af ʼn kunstenaar word. Op 20-jarige ouderdom het hy sy vaderland verlaat en in Wenen gaan studeer. Kibel het hom nooit formeel by ʼn kunsinrigting ingeskryf nie omdat hy nie geld gehad het nie, maar ʼn hoogleraar aan die Weense Staatsakademie was hom goedgesind en het hom toegelaat om klasse by te woon.

Na twee jaar in Wenen het Kibel nog vier jaar in Tel Aviv en Jerusalem deurgebring voordat hy in 1929 na Suid-Afrika gekom het. Wolf Kibel se kuns het destyds geen inslag by die Suid-Afrikaanse publiek gevind nie omdat hulle gewoond was aan kunstenaars soos Roworth, Gwelo Goodman en Sydney Carter, almal beskrywende kunstenaars met "maklike" onderwerpe. Die publiek het geglo in mooi en realistiese weergawes van verstaanbare onderwerpe.

Al vier eenmantentoonstellings wat Kibel voor sy dood gehou het, was mislukkings. Een van die redes waarom Kibel se kuns nie aanvaar is nie, is omdat hy hom nie soos die meeste Suid-Afrikaanse kunstenaars by mooi landskaptonele en stillewes bepaal het nie. Sy onderwerpkeuses het uit sy onmiddellike omgewing gekom: informele portretstudies van sy vriende, alledaagse voorwerpe en huislike toneeltjies.

Sy ekspressionistiese en emosionele skilderye was ver verwyderd van die opvatting en kennis van die Suid-Afrikaners in die tyd. Wolf Kibel is in 1938 aan tuberkulose oorlede. Vandag word Kibel se werk in ʼn ander lig beskou. Na sy dood is drie gedenkuitstallings van sy werk gehou: Die eerste in 1942 in Kaapstad, die tweede in 1947 in Johannesburg en die laaste in 1950 in die Suid-Afrikaanse Nasionale Kunsmuseum in Kaapstad. Sy werk is nietemin steeds swak in Suid-Afrikaanse galerye verteenwoordig.

Bronne
  • Jeppe, Harold: Wolf Kibel 1903-'38. In: Lantern. Tydskrif vir Kennis en Kultuur. Jaargang 13, nr. 3, Maart 1964
  • Wêreldspektrum, 1982, ISBN 0908409559 band

Verwysings
  1. Berman, Esmé (2010). Art and Artists of South Africa. Kaapstad: G3 Publishers. pp. 231–234. ISBN 978-1-86812-345-2.

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.