Wladimir Dowdanof

Wladimir Dowdanof (Russies: Владимир Довданов) is 'n Kalmikiese politikus. Hy is 'n lid van die Oirat-Kalmikiese Volkskongres, 'n separatistiese organisasie wat hom beywer vir die onafhanklikheid van die Republiek van Kalmikië, tans 'n deelgebied van die Russiese Federasie.

Wladimir Dowdanof
Gebore18 November 1959 (1959-11-18)
Gorodowikofsk, Kalmikië, Sowjetunie
NasionaliteitRusland
BeroepPolitikus

Biografie

Dowdanof is in 'n Boeddhisties-Kalmikiese familie in Gorodowikofsk gebore kort nadat sy ouers uit Siberië teruggekeer het, waarheen Josef Stalin se regering alle etniese Kalmikiërs in 1943 gedeporteer het. Aan die einde van die Sowjetera het Dowdanof as 'n hooggeplaaste polisiebeampte in Kalmikië se hoofstad, Elista, gewerk. In 1991 het hy die republiek se eerste taekwondofederasie gestig.[1]

In Maart 2022 het Dowdanof saam met die voorsitter van die Oirat-Kalmikiese Volkskongres Arslang Sandzjijef en sy adjunkte Batir Boromangnajef en Adoetsje Erdnijef 'n resolusie onderteken wat die Russiese inval in Oekraïne veroordeel.[2] Kort daarna het hy om veiligheidsredes uit Rusland na Litaue geïmmigreer en die status van 'n politieke vlugteling gekry.[3]

Verwysings
  1. Sandzjijef, Arslang (2003). "Путь силы и справедливости ['n Pad van krag en geregtigheid]". Калмыки: история и культура [Die Kalmikiërs: Geskiedenis en kultuur] (in Russies). Besoek op 22 Augustus 2023.
  2. "Kalmyk people congress – let oligarchs and their children fight!". Free Idel-Ural (in Engels). 2022. Besoek op 22 Augustus 2023.
  3. "Второй "иностранный агент" после ламы. Интервью с калмыцким политиком Владимиром Довдановым". Idel.Realii (in Russies). 22 Augustus 2023. Besoek op 22 Augustus 2023.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.