Windkrag

Windkrag verwys na die omskakeling van windenergie in meer bruikbare vorme, gewoonlik elektrisiteit, met behulp van windturbines. Teen die einde van 2006 was die wêreldwye kapasiteit van wind-aangedrewe generators gelykstaande aan 74 223 megawatt. Alhoewel windkrag minder as 1% van die wêreld se elektrisiteit produseer, verteenwoordig windkrag reeds 20% van Denemarke se totale elektrisiteitsverbruik. In Spanje verteenwoordig dit 9%, en in Duitsland 7%. Wêreldwyd het windkragopwekking meer as verviervuldig tussen 2000 en 2006.

Een van die vier windturbines tussen Yzerfontein en Darling aan die Weskus.

Die meeste moderne windkrag word in elektrisiteitvorm opgewek deur die rotering van windturbines se blaaie in elektrisiteit om te skakel, met behulp van elektriese opwekkers. By windmeulens ('n veel ouer tegnologie) word windenergie gebruik om meganiese masjinerie te draai om fisieke werk te verrig, soos om graan te maal of om water te pomp.

Windkrag word op groot skaal in windplase gebruik vir lewering aan nasionale elektriese netwerke, asook in klein individuele turbines om elektrisiteit aan plattelandse huise, of aan gebiede wat van die nasionale netwerk afgeslote is, te lewer.

Windenergie is volop, hernieubaar, wyd beskikbaar, skoon, en dit verminder giftige atmosferiese- en kweekhuisgasuitlatings indien dit gebruik word om fossielaangedrewe elektrisiteit te vervang.