William Booth

William Booth (1829–1912) was 'n Britse evangelis. Hy was die stigter en die eerste generaal van die Heilsleër.[1] Hy het dié organisasie in 1865 as die The Christian Mission gestig, en dit in 1878 na die Heilsleër hernoem.[2] Hierdie Christelike beweging met sy kwasi-militêre struktuur het vanuit Londen na verskeie wêrelddele versprei en is bekend vir die humanitêre hulp wat hulle lewer.

William Booth
William Booth
William Booth in ongeveer 1890
1ste Generaal van die Heilsleër
Ampstermyn
1865 – 1912
Voorafgegaan deur Nuwe amp
Opgevolg deur Bramwell Booth
Persoonlike besonderhede
Gebore (1829-04-10)10 April 1829
Sneinton, Nottingham, Engeland
Sterf 20 Augustus 1912 (op 83)
Hadley Wood, Londen, Engeland
Eggenoot/-note Catherine Mumford
Kind(ers) Bramwell, Ballington, Kate, Emma, Herbet, Marie, Evangeline, Lucy
Religie Christendom

Beginjare

William Booth is op 10 Julie 1829 in Nottingham, Engeland gebore. Hy was die enigste oorlewende seun van Samuel Booth en Mary Moss. Samuel Booth was 'n ryk man, wie se besigheid later in sy lewe bankrot gespeel het. Sy pa is in 1842 oorlede. Hy laat sy vrou en kind brandarm agter.

Ná sy pa se dood bekeer Booth homself en word hy sterk gelowig. Hy het preke in die kerk en op straat gelewer, en word later 'n evangelis binne die Metodistiese kerk. In 1858 word hy as pastoor in Gateshead aangestel. Hy was egter nie gelukkig nie en wou hom voltyds op evangelisasie toespits. In 1861 is sy versoek om voltyds te evangeliseer weer verwerp, waarna hy 'n onafhanklike evangelis word. Sy boodskap bly egter dieselfde.

Booth is op 16 Junie 1855 met Catherine Mumford getroud. Die egpaar het agt kinders gehad:

  • Bramwell Booth (8 Maart 1856 – 16 Junie 1929).
  • Ballington Booth (28 Julie 1857 – 5 Oktober 1940).
  • Kate Booth (18 September 1858 – 9 Mei 1955).
  • Emma Booth (8 Januarie 1860 – 18 Oktober 1903).
  • Herbert Booth (16 Augustus 1862 – 25 September 1926).
  • Marie Booth (4 Mei 1864 – 5 Januarie 1937).
  • Evangeline Booth (25 Desember 1865 – 17 Julie 1950).
  • Lucy Booth (18 April 1868 – 18 Julie 1953).

Sendingwerk
Standbeeld van William Booth.

In 1865 stig Booth en sy vrou die "Christian Mission", en hy organiseer byeenkomste op Sondae in die Londense East End, waar hy redding aan diegene wat dit die meeste nodig het bied, waaronder alkoholiste, kriminele en prostitute. Hy maak ook 'n sopkombuis oop.[3]

In 1878 verander hy die organisasie se naam na die "Heilsleër" (The Salvation Army), met 'n bevelstruktuur soos die van 'n weermag. William Booth en die ander "soldate in God se leër" het uniform tydens byeenkomste gedra. Booth was die eerste generaal, en die ander evangeliste het ooreenstemmende range gehad.

As generaal skep hy poste vir sy leër in 58 lande en kolonies, en reis hy gereeld om byeenkomste te organiseer. Hy gee 'n tydskrif uit en skryf 'n aantal boeke. Hy het ook 'n aantal liedere gelewer. Sy boek In Darkest England, and the Way Out word 'n topverkoper nadat dit in 1890 uitgebring is.

Die Heilsleër en William Booth begin later respek afdwing en hy besoek konings, keisers en presidente. Selfs die die koerante het hom met respek "die Generaal" genoem.

Afsterwe
Grafsteen

Booth is op 20 Augustus 1912 in Londen oorlede. Hy was 83 jaar oud. Hy is saam met sy vrou in die Abney Park Begraafplaas in Londen begrawe.

Verwysings
  1. HAT Taal-en-feitegids, Pearson, Desember 2013, ISBN 978-1-77578-243-8
  2. Collier's Encyclopedia Volume 4. Bladsy 387
  3. "'n Leë maag het geen ore (vir die evangelie) nie", was na bewering een van sy slagspreuke.

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.