Vrouekeur

Vrouekeur is 'n Afrikaanse tydskrif wat weekliks (50 keer per jaar) deur Caxton Magazines uitgegee word. Vrouekeur het in 1949 ontstaan en was destyds 'n maandblad in sakformaat wat onder die titel Keur gepubliseer is. In 1999 is dit na die Vrouekeur hernoem. Die tydskrif se sirkulasie in die eerste kwartaal van 2016 was 59 874, vergeleke met 65 168 'n jaar vantevore.[1]

Geskiedenis

Keur is in 1949 deur Blaar Coetzee van Goeie Hoop Uitgewers begin. Coetzee was die eienaar-redakteur van die populistiese Fyn Goud-tydskrif, wat vroeër as 'n joernalis by Die Suiderstem gewerk het. Hy is later as 'n NP-minister en ambassadeur in Rome aangestel.[2]

Vroeg in 1950 vra Blaar vir Hugh Winston ("Hint") Hyman of hy nie die tydskrif wil oorneem nie. Hy en sy vrou, Baby, het die aanbod aanvaar en die tydskrif, met 'n sirkulasie van 8 000 eksemplare, vir £700 gekoop. Hint was 'n ervare koerant- en tydskrifjoernalis en was vir lank die nuusredakteur van die destydse Die Vaderland en ook onderhoofredakteur van Brandwag.[3]

Hint en Baby het Johannesburg verlaat om hulle op Onverwacht, Baby se erfplaas, in die distrik Luckhoff in die Vrystaat te vestig. Hulle drukkers was die Diamond Fields Advertiser in Kimberley, nagenoeg 160 km van Onverwacht af.

Die formaat van die tydskrif is vergroot en die sirkulasie het bly groei. In April 1952 het Hint sy broer, Boet en Sep Smidt, genader om met die tydskrif te help. Hulle begin fotoverhale publiseer en koop later Fyn Goud by Blaar Coetzee. Die gekombineerde tydskrif, Keur en Fyn Goud, het egter nie goed gevaar nie omdat dit te "gewaagd" vir sy destydse lesers was. Dit is selfs as "pornografies" beskryf.

Hulle vestig hulself in Bloemfontein en besluit om ’n landwye kompetisie te hou om na 'n nuwe naam vir die tydskrif te soek. Ster is so gebore. Keur was 'n tyd lank deel van Ster, maar het in 1967 weer 'n selfstandige titel geword.

Die driemanskap het 'n drukpers in Durban gekoop en die maatskappy Republikeinse Pers gestig. Die Republikeinse Pers is later aan Perskor verkoop, wat op sy beurt aan die Caxton-groep, die huidige eienaar, van die hand gesit is.

Verwysings
  1. (en) ANC Analysis Q1 2016. URL besoek op 27 Julie 2016.
  2. Vrouekeur – Die boom wat Blaar geplant het Geargiveer 24 Oktober 2016 op Wayback Machine, mediamense.co.za, besoek op 22 Februarie 2016
  3. Van toeka tot nou: 'n Kykie na Vrouekeur se wortels[dooie skakel] deur Johann Smidt, vrouekeur.co.za, besoek op 22 Februarie 2016

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.