Vlag van Bhoetan

Die nasionale vlag van Bhoetan is op 8 Augustus 1949 in gebruik geneem tydens die ondertekening van die Vriensdkapsverdrag. Die vlag vertoon twee skuinsbalke van onder aan die vlagpaalkant tot bo aan die wapperkant in geel bo en oranje onder met ’n wit draak in die middel.

Vlag van Bhoetan
Vlag van Bhoetan
Vlag van Bhoetan
Gebruik Nasionale vlag Nasionale vlag
Verhouding 2:3
Goedgekeur 1969[1]
Ontwerp Twee skuinsbalke van onder aan die vlagpaalkant tot bo aan die wapperkant in geel bo en oranje onder met ’n wit draak in die middel.
Ontwerp deur Mayam Choying Wangmo Dorji

Simboliek

Volgens die Wetlike bepalinge van die Nasionale Vlag van die Koninkryk van Palden Drukpa soos onderskryf in Resolusie 28 van die 36ste sessie van die Nasionale Vergadering gehou op 8 Junie 1972 en soos hersien in die Grondwet van 2008 stel die geel burgerlike tradisie en tydelike gesag soos vergestalt in die Druk Gyalpo, die Bhoetanese Draakkoning, wie se koninklike gewaad tradisioneel ’n geel kabney (tipe serp) insluit.[2] Die oranje helfte stel die Boeddhistiese spirituele tradisie, veral die skole van Drukpa kagyü en Nyingma, voor.[2] Druk, die Donderdraak word gelyk oor die twee kleure verdeel. Die plasing van Druk in die middel van die vlag oor die skeidslyn tussen die twee kleure, dui op die gelyke belangrikheid van die burgerlike en kloostertradisies in die Koninkryk van Druk (Bhoetan) en roep die krag van die heilige band tussen die oppermag en die mense. Die wit kleur van Druk stel die reinheid van innerlike gedagtes en dada voor van die etnies en linguïsties diverse volke van Bhoetan verenig.[3][2] Die juwele in die kloue van Druk stel Bhoetan se rykdom voor asook die veiligheid en beskerming van haar mense,[4] terwyl die draak se grommende mond Bhoetan se gode voorstel wat toegewy is tot die verdediging van Bhoetan.[5]

Ontwerp en kleure
Die Bhoetanese vlag buite die Permanente Bhoetanese Sending na die Verenigde Nasies in New York Stad

Die huidige vlag bestaan uit skuinsbalke van onderaan die vlagpaalkant tot bo-aan die wapperkant met die boonste driehoek in geel en die onderste in oranje. Gesentreer op die skeidslyn is ’n groot swart-en-wit draak wat na die wapperkant kyk.[6] Die draak hou ’n norbu, of juweel. in elk van sy kloue vas.[6] Die agtergrondkleure van die vlag, geel en oranje, word geïdentifiseer as Pantone 116 en 165 onderskeidelik.[7] Ekwivalente van hierdie skakerings en die wit van Druk is vasgestel deur verskeie ander kodes volgens spesifieke bypassende stelsels soos hieronder aangedui.

Kleurskema Geel Oranje Wit
RGB 255, 213, 32 255, 78, 18 255, 255, 255
Pantone (druk) 116 165 NVT
CMYK 0-15-94-0 0-60-100-0 0-0-0-0
Heksadesimaal FFCC33 FF4E12 FFFFFF

Die dimensies van die vlag moet ’n verhouding van 2:3 behou.[7][3] Die volgende groottes is as standaard deur die Regering van Bhoetan verklaar:[8]

  • 6,4x4,3 meter
  • 3,7x2,4 meter
  • 1,8x1,2 meter
  • 0,9x0,6 meter
  • 23c15 cm vir voertuigvlaggies

Geskiedenis

Die Sentrum vir Bhoetanstudies, ’n onafhanklike navorsingsentrum in Bhoetan[9] het in 2002 ’n dokument’n dokument (die CBS-dokument) vrygestel[8] wat die enigste geredelik beskikbare oorvertelling van die historiese ontwikkeling van die Bhoetanese vlag is. Die dokument maak staat op eerstehandse vertellings wat deur onderhoude met indiwidue wat van die laat 1940’s tot die aanvaarding van die vlag in die 1970’s persoonlik by die skep en verwerk van die vlag van Bhoetan betrokke was. Hierdie verslag is dus ’n noemenswaardige primê^re bron vir inligting oor die geskiedenis van die Bhoetanese vlag. Die beskrywing van die vlag van 1949 in die dokument stem egter nie ten volle ooreen met foto’s van die vlag nie wat dit moeilik maak om van die beweringe in die boek te interpreteer.

Eerste nasionale vlag (1949)
Hierdie illustrasie van die eerste nasionale vlag van Bhoetan wat gebruik is in 1949 tydens die ondertekening van die Indo-Bhoetanese Verdrag, is gebaseer op swart-en-wit foto’s van die geleentheid wat uit latere dokumentasie verkry is

Die CBS-dokument noem dat die eerste nasionale vlag ontwerp is op versoek van Jigme Wangchuck, die tweede Druk Gyalpo van die 20ste-eeuse Bhoetanese Koninkryk, en is in 1949 bekendgestel gedurende die ondertekening van die Indo-Bhoetanese Verdrag.[8] Hoewel die dokument nie ’n illustrasie van die oorspronklike ontwerp bevat nie, is foto’s tydens die geskiedkundige geleentheid geneem waarop die eerste Bhoetanese vlag gesien kan word.[10][11]

Erkenning vir die ontwerp van die vlag gaan aan Mayam Choying Wangmo Dorji in 1947.[4] Lharip Taw Taw, een van die min koninklike skilders van die tyd, het volgens oorlewering die vlag geborduur. Druk was groen, in ooreenstemming met tradisionele en geloofsverwysing na yu druk ngonm ((dz) གཡུ་ རབྲུག་ སྡོནམ), of “turqkoois druk.”[8] Vandag word ’n moderne weergawe van hierdie geskiedkundige oorspronklike vlag (met verskeie noemenswaardige veranderinge wat deur die moderne vlag beïnvloed is) agter die troon in die Nasionale Vergadersaal in Thimphu vertoon.[8][12]

Volgens die CBS-dokument was die oorspronklike Bhoetanese vlag ’n vierkantige tweekleurige vlag met skuinsbalke van onderaan die vlagpaalkant tot bo-aan die wapperkant. Geel was bo en gepunt na die wapperkant en rooi was onder en gepunt na die vlagpaalkant. In die middel van die vlag waar die geel en rooi bane ontmoet, was ’n groen Druk parallel met die onderkant van die vlag en sy gesig in die rigting van die wapperkant.[8]

Die CBS-dokument illustreer egter nie die vroeë weergawes van die vlag en die beskrywing van die 1949-vlag is nie heeltemal ooreenstemmend met die foto’s van 1949 nie. Dit beskryf die vlag as “vierkantig” terwyl die verhouding van die vlag op die foto’s nader aan 4:5 lyk. Die dokument beskryf dat die draak na die wapperkant kyk terwyl die draak op die vlag in die foto’s na die vlagpaalkant kyk. Die draak word beskryf as “parallel met die wapperkant” (bedoelende, volgens ’n diagram in die dokument, parallel met die onderkant van die vlag), terwyl die draak in die foto’s lyk of hy effens vertikaal hel. Die draak word ook beskryf as “groen”, maar in die foto’s wil dit voorkom of die skakering van groen baie lig is.

Westerse vlagboeke tot na 1970 toon oor die algemeen die Bhoetanese vlag as ’n gelykenis van dié in die 1949-foto’s.[13][14][15][16]

Veranderinge in 1956

Die tweede weergawe van die nasionale vlag is in 1956 ontwerp vir die besoek van die derde Druk Gyalpo Jigme Dorji Wangchuck aan oos-Bhoetan. Gedurende die reis het die Druk Gyalpo se sekretariaat nuwe vlagontwerpe begin gebruik wat gebaseer was op ’n foto van die eerste nasionale vlag van 1949, met die kleur van die draak wat van groen na wit verander is. Die gevolg van die Druk Gyalpo het ’n konvooi van meer as ’n honderd ponies ingesluit; ’n klein weergawe van die vlag is op die saal van elke tiende ponie geplaas en ’n groot vlag ongeveer 0,56 m2 in grootte is elke aand in hul kampeerplek vertoon en is gehys met die geblaas van ’n beuel.[8]

Veranderinge na 1956

In die laat 1950’s is Dasho Shingkhar Lam, voormalige Sekretaris vir Jigme Dorji Wangchuck en sesde Speaker van die Nasionale Vergadering (1971-71), deur die koning versoek om verskeie wysigings aan die vlag te bring; hy is verantwoordelik vir die huidige ontwerp van die vlag[17] wat sedert 1969 onveranderd gebly het.[18] Die koning was ontevrede met die vroeë vierkantige Bhoetanese vlae wat nie soos die reghoekige vlag van Indië gewapper het nie. Hy het dit opgemerk tydens die besoek van ’n Indiese diplomaat aan Bhoetan. Die standaard mates van die vlag van Bhoetan is daarna aangepas om meet soos die Indiese vlag te lyk (dit was 9 voet by 6 voet).[8]

In ’n ander verandering is die draak wat voorheen in ’n naastenby horisontale posisie in die middel van die vlag was, geherposisioneer om oor die diagonale skeidslyn in die vlag gesprei te word. Hierdie verandering was daarop gemik om te keer dat die draak “in die rigting van die aarde kyk” wanneer die vlag nie wapper nie. Kilkhor Lopen Jada, ’n Bhoetanese kunstenaar, het ’n nuwe ontwerp vir die druk geverf waarin die kurwes van die draak se liggaam ontspan is om ’n effens langer en golwende vorm aan te neem.[8]

Die CBS-dokument meld dat die koning “iewers in 1968 of 69” beveel het dat die kleur van die onderste helfte van rooi na oranje moes verander.[8]

Die Bhoetanese vlag is vir die eerste keer in 1961 die buiteland langs ’n ander vlag vertoon gedurende ’n staatsbesoek aan Indië deur Jigme Dorji Wangchuck. Hierdie besoek het ’n nuwe verhouding tussen die twee lande ingelui.[19]

Gebruik
Die vlag van Bhoetan kan gesien word op die stertvin van Druk Air, die nasionale redery

Op 8 Junie 1972 het die Nasionale Vergadering van Bhoetan Resolusie 28 goedgekeur waardeur Nasionale Vlagreëls wat deur die kabinet saamgestel is, in werking gestel is.[20] Die reëls bevat agt bepalings wat die beskrywing en simboliek, kleure, bane en ontwerpelemente dek. Ander reëls hou verband met die grootte van die vlag, die vlagprotokol insluitend geskikte plekke en geleenthede vir vertoon van die vlag asook wie die vlag op voertuie mag vertoon. In die algemeen word soveel respek aan die vlag betoon as wat aan die Bhoetanese staat en die staatshoof betoon word. Net soos in die Amerikaanse Vlagkode mag geen ander vlag hoër as die Bhoetanese vlag vertoon word nie, die vlag mag nie gebruik word as ’n bekleedsel (met sekere uitsonderings) nie en die vlag mag ook nie aan die grond raak nie. Ander bepalings sluit die verbod op die insluiting van die vlag in ander elemente of in ’n logo in. In buitengewone gevalle mag die vlag as bekleedsel op doodskiste gebruik word maar slegs in die geval waar die oorledene ’n minister op militêre personeellid met ’n hoë rang was.[3]

Die reëls van 1972 bepaal ook dat elke dzongkhag (distrikhoofkantoor) die nasionale vlag sal hys. Waar geen dzongkhag bestaan nie, sal die nasionale vlag gehys word voor die kantoor van die hoofregeringsamptenaar.”[3]

Amptenare bo die rang van minister mag die vlag by hul huise vertoon indien hulle nie naby die hoofstad woon nie.[3] Die tradisie van vertoning van die vlag voor ’n regeringskantoor het voor 1968 nie in Bhoetan bestaan nie maar is deur die Druk Gyalpo as standaardpraktyk ingestel nadat sy sekretariaat in daardie jaar van die stad Taba na Tashicho Dzong geskuif is.[12] Die enigste vlagdag volgens die 1972-reëls is die Nasionale dag wat jaarliks op 17 Desember gevier word.[3] Die Nasionale dag herdenk die kroning van Ugyen Wangchuck as die eerste koning van Bhoetan op 17 Desember 1907.[4]

Verwysings
  1. "Bhoetan" (in Engels). Flags of the World. Geargiveer vanaf die oorspronklike op 31 Mei 2020. Besoek op 27 Mei 2019.
  2. (en) Eerste Skedule – Die Nasionale Vlag en die Nasionale Embleem van Bhoetan (PDF). Die Grondwet van die Koninkryk van Bhoetan. Regering van Bhoetan (18 Julie 2008). URL besoek op 25 September 2010.
  3. "Die Nasionale Vlagreëls van Bhoetan (1972)" (PDF) (in Engels). Geargiveer vanaf die oorspronklike (PDF) op 24 April 2012. Besoek op 25 September 2010.
  4. (en) "Nasionale Simbole". Departement Inligtingstegnologie. 2008. Geargiveer vanaf die oorspronklike op 6 Julie 2011. Besoek op 25 September 2010.
  5. (en) Eerste Skedule – Die Nasionale Vlag en die Nasionale Embleem van Bhoetan. Die Grondwet van die Koninkryk van Bhoetan (2008). URL besoek op 25 September 2010.
  6. "Nasionale Vlag" (in Engels). National Portal of Bhutan. 2004. Geargiveer vanaf die oorspronklike op 13 November 2012. Besoek op 28 September 2010.
  7. (en) Specification Sheet 007. William Crampton Flag Institute. 1 Augustus 1994.
  8. (en) Penjore, Dorji; Kinga, Sonam (November 2002). The Origin and Description of The National Flag and National Anthem of The Kingdom of Bhutan (PDF). Thimphu: Sentrum vir Bhoetanstudies. pp. 1−43. ISBN 99936-14-01-7. (Geargiveer by WebCite)
  9. "Oor die Sentrum" (in Engels). Geargiveer vanaf die oorspronklike op 22 Augustus 2013. Besoek op 3 April 2012.
  10. Een foto (sien "Indo-Bhoetanese Vriendskapsverdrag, 8 Augustus 1949". New Delhi: National Gallery of Modern Art. Besoek op 22 Desember 2010.) is in 2009 vertoon in die uitstalling "Bhoetan: 'n Blok op Geskiedenis". New Delhi: National Gallery of Modern Art. Besoek op 22 Desember 2010. BBC-dekking van hierdie uitstalling (sien "In beeld: Skaars afbeeldings van Bhoetan word vertoon". BBC. 14 Februarie 2010. Besoek op 22 Desember 2010.) bied die volgende onderskrif vir die foto: “Die Indië-Bhoetan Vriendskapsverdrag van 1949 is die basis van noue bande tussen Bhoetan en Indië. Dit is onderteken by die regeringshuis in Darjeeling in 1949.” (Beeld: Koningin-Ouma van Bhoetan)."
  11. (en) "Indo-Bhoetanese Verdrag". Bhoetan 2008. Geargiveer vanaf die oorspronklike op 4 Oktober 2010. Besoek op 22 Desember 2010.
  12. Gyeltshen, Tshering (2002). "Eerste nasionale vlag ontwerp in 1949". Kuensel Online (in Engels). Kuensel Corporation. Geargiveer vanaf die oorspronklike op 19 Augustus 2011. Besoek op 10 Oktober 2010.
  13. (en) I.O. Evans (1963). The Observer's Book of Flags.
  14. (en) Gordon Campbell en I.O. Evans (1965). The Book of Flags.
  15. (en) E.M.C. Barraclough (1965). Flags of the World.
  16. (en) Karl-Heinz Hesmer (1975). Flaggen Wappen Daten.
  17. (en) Ura, Karma (1995). The Hero With a Thousand Eyes. Karma Ura. p. 232. ISBN 9788175250017.
  18. (en) Costantino, Maria (2001). The Illustrated Flag Handbook. Gramercy Books. p. 46. ISBN 978-0-517-21810-5.
  19. (en) Warikoo, K. (2008). Himalayan Frontiers of India: Historical, Geo-Political and Strategic Perspectives. Routledge. p. 142. ISBN 978-0-415-46839-8. Besoek op 28 September 2010.
  20. (en) National Assembly Secretariat (1999). Proceedings and Resolutions of the National Assembly from 31st to 50th sessions, Vol. 2. Regering van Bhoetan. p. 97.

Eksterne skakels
Hierdie artikel is in sy geheel of gedeeltelik vanuit die Engelse Wikipedia vertaal.
   
Klik vir info oor hierdie sjabloon.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.