Tulpstoel

Die Tulpstoel is in 1955 en 1956 deur Eero Saarinen, [1] vir die Knoll-maatskappy van New York, ontwerp. Die stoel is in die eerste instansie ontwerp om by die komplementêre eettafel te pas. Die stoel vertoon die gladde lyne van modernisme, en was vir sy tyd, eksperimenteel met betrekking tot die gebruik van materiale. Die stoel word as 'n klassieke voorbeeld van industriële ontwerp beskou.

Tulpstoel, ontwerp deur Eero Saarinen

As gevolg van die futuristiese gebruik van kurwes en sintetiese materiale, word die stoel dikwels as verteenwoordigend van die ''ruimte-era' beskou.

Ontwerp en konstruksie

Saarinen was van mening dat die onderste gedeelte van stoele en tafels in 'n tipiese binneruimte, 'n lelike, verwarrende en onrustige omgewing skep. Hy wou die groot hoeveelheid stoelpote in vertrekke verminder. [2]

Saarinen het gehoop om 'n glasvelselstoel, wat uit een stuk bestaan, te vervaardig, maar hierdie materiaal kon nie die basis ondersteun nie, en prototipes was geneig om te breek. As gevolg hiervan is die basis van die tulpstoel van gegote aluminium, met 'n rilsanbedekte afwerking, om by die boonste gedeelte van die stoel te pas, gemaak. Dit het 'n uniforme voorkoms van eenheid aan die stoel verleen. Die boonste dop van die stoel is gevormde veselglas, met 'n versterkte, plastiekgebonde afwerking.[1] Die gestoffeerde skuimrubber kussing, met 'n kleefstrookopening, kon van die stoel verwyder word.

'n Patent vir die Tulpstoel is in 1960 aan Saarinen toegeken.[3]

Toekennings
  • Toekenning van die museum van moderne kuns, 1969
  • Federale toekenning vir industriële ontwerp, 1969
  • Toekenning van die Stuttgart ontwerpsentrum, 1962

Projek Cybersyn

In 1971 is 'n aangepaste weergawe van die Tulpstoel vir die ontwerp van Projek Cybersyn gebruik.[4]

Verwysings
  1. "Eero Saarinen. Tulip Armchair (model 150): 1955-56" (in Engels). Museum of Modern Art. Geargiveer vanaf die oorspronklike op 7 Februarie 2015. Besoek op 20 Februarie 2020.
  2. Ronan, Alex (28 Januarie 2015). "Design Dictionary: Tulip Chair" (in Engels). Dwell magazine. Geargiveer vanaf die oorspronklike op 20 Februarie 2020.
  3. Tulip chair
  4. Free As In Beer: Cybernetic Science Fictions accessed April 7, 2012

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.