Triëst

Triëst (Italiaans: Trieste, [triˈɛste], ; Sloweens en Kroaties: Trst; Duits: Triest) is 'n stad in die noordooste van Italië met 'n bevolking van 204 338 in 2018 en 'n oppervlakte van 84,49 km². Die stad, wat as die administratiewe setel van die streek Friuli-Venezia Giulia dien, is aan die noordoostelike kus van die Adriatiese See net wes van die grens tot Slowenië geleë. Triëst het in 1918 as gevolg van Oostenryk-Hongarye se neerlaag tydens die Eerste Wêreldoorlog onder Italiaanse bewind gekom. Dit was een van die gasheerstede tydens die FIFA Sokker-Wêreldbekertoernooi in 1934.

Triëst
Comune di Trieste
Trst • Triest

Kaart Wapen
Vlag
 Land Vlag van Italië Italië
 Administratiewe gewes Friuli-Venezia Giulia
 Provinsie Triëst
 Koördinate 45°39′N 13°46′O
 Stigting 177 v.C.
 Oppervlakte:  
 - Totaal 84,49 vk km
 Hoogte bo seevlak 2 m
 Bevolking:  
 - Totaal (2018) 204 338
 - Bevolkingsdigtheid 24/vk km
 Tydsone UTC +1 (MET)
 - Somertyd UTC +2 (MEST)
 Burgemeester Roberto Dipiazza (FI)
 Amptelike webwerf retecivica.trieste.it

Literatuur

In die 19de eeu was Triëst nie net Oostenryk-Hongarye se enigste groot seehawe en poort tot die wêreld nie, maar ook een van die voorste kulturele metropole in Sentraal-Europa. Literêre persoonlikhede het aangetrokke gevoel tot hierdie smeltpot van kulture wat as 'n soort brug tussen Wes- en Oos-Europa beskou is. Skrywers soos James Joyce, Italo Svevo en Umberto Saba het van die stad 'n ontmoetplek van die literêre wêreld gemaak. Claudio Magris, die bekendste hedendaagse skrywer uit Triëst, het na sy geboortestad selfs as die "literêre hoofstad van Sentraal-Europa" verwys.

Dit was die unieke atmosfeer van Triëst en sy Riviera wat vir digters en skrywers die inspirasie vir literêre werke gelewer het. Italo Svevo en Umberto Saba se romans en verhale speel hier af, met die stedelike bourgeoisie as hul protagoniste. James Joyce het hier die basis gelê vir sy sleutelwerk Ulysses, terwyl Rainer Maria Rilke die eerste van sy Duineser Elegien in die kasteel Duino geskryf het.

Die Duitse skrywer Veit Heinichen, wat in 1980 sy eerste besoek aan Triëst gebring het, het hom later hier permanent gevestig. Dikwels speel die historiese politieke gebeure rondom Triëst 'n belangrike rol in sy misdaadromans met Commissario Proteo Laurenti as hoofkarakter.[1]

  • 'n Uitsig oor Triëst se stadsentrum
    'n Uitsig oor Triëst se stadsentrum
  • Die kasteel Miramare net noord van Triëst
    Die kasteel Miramare net noord van Triëst
  • Die Canal-Grande in Triëst
    Die Canal-Grande in Triëst
  • Palazzo del Municipio
    Palazzo del Municipio

Verwysings
  1. (de) Eberhard Fohrer: Friaul-Julisch Venetien. 4de hersiene uitgawe. Erlangen: Michael Müller 2016

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.