Timbavati-wildreservaat

Die Timbavati-wildreservaat is aan die grens tussen Hoedspruit (in Limpopo) en Acornhoek (in Mpumalanga), noord van die Sabi Sand-wildreservaat, aan die westekant van die Krugerwildtuin geleë. Geografies en polities is Timbavati in Mpumalanga geleë. In Tsonga, beteken die naam Timbavati "die plek waar iets heiligs uit die hemel na die aarde afgekom" het, en verwys na die skaars wit leeus van Timbavati.

Timbavati-wildreservaat
Simbavati Rivierherberg, Timbavati-wildreservaat
Simbavati Rivierherberg, Timbavati-wildreservaat
Land Suid-Afrika
Provinsie Mpumalanga
Naaste dorp Hoedspruit
Ligging van Timbavati-wildreservaat op 'n kaart (Mpumalanga)
Timbavati-wildreservaat
Timbavati-wildreservaat
Ligging in Mpumalanga
Koördinate: 24°20′07″S 31°20′38″O
Oppervlak 53 392 hektaar
Openingsjaar 1956

Geskiedenis

Die reservaat is in 1956 gestig deur eendersdenkende wildboere met die stigting van die "Timbavati-vereniging". Die vereniging het 50 lede en is 534 km2 (53 392 hektaar) groot.[1] Timbavati is deel van Associated Private Nature Reserves (APNR) en die heinings wat Timbavati van die ander lidreservate in die APNR en van die Krugerwildtuin skei, is verwyder. Natuurlewe, insluitend leeus, jagluiperds, olifante en ander spesies, loop vrylik tussen hierdie reservate rond. Ngala (wat 'leeu' in Tsonga beteken) en Motswari-wildreservate is in Timbavati saamgevoeg.

Sonsondergang oor Timbavati-wildreservaat

Geografie

Die reservaat vorm deel van die Groter Limpopo Oorgrenspark en lê tussen die Krugerwildtuin in die ooste, die Klaserie- en Umbabat-wildreservate in die noorde en die Thornybush-wildreservaat in die weste. Daar is geen draadheinings tussen die Timbavati en die Krugerwildtuin nie, wat vrye beweging van wild tussen die reservate moontlik maak. Die wêreldberoemde Krugerwildtuin is 'n bewaringsgebied van meer as 20 000 km2. Die suidelike grens van hierdie groot kompleks van openbare en privaat beskermde grond lê naby Eswatini en grens aan Zimbabwe in die noorde en Mosambiek in die ooste.

Die terrein is golwend met hoogtes tussen 300 en 500 m bo seevlak. Die gebied word gekenmerk as 'savanna-bosveld' met 6 verskillende landskapstipes: akasiabosveld, oop bosveld, mopaniebosveld, combretumbos, gemengde combretumbos en gemengde veld op Gabbro. Bosolifante, buffels, koedoes, Burchellsebras, blouwildebeeste, kameelperde, rooibokke, waterbokke en vlakvarke is oorvloedig met hul roofdiere, waaronder leeus, luiperds, jagluiperds, gevlekte hiëna en rooijakkalse. Die bedreigde wildehond is ook 'n gereelde besoeker aan die Timbavati-wildreservaat. Die groter en seldsamer bokke, soos die bastergemsbok, eland en basterhartbees (tsessebe), het stadig teruggekeer na hierdie gebied, maar hulle getalle is steeds krities laag.

Klimaat

Die klimaat word gekenmerk deur 'n nat somerseisoen (Oktober tot Maart), met die meeste reënval tussen Desember en Februarie. Dit is ook die warmste tyd van die jaar, met temperature in die omgewing van 32 °C. 'n Tipiese somersdag sal warm wees met stormwolke wat vergader vir 'n skouspelagtige laatmiddag-donderstorm.

Gedurende die wintermaande (April tot September) is die weer droog met min kans op reën. Aangesien wild geneig is om rondom kwynende waterbronne te vergader, is wildbesigtiging meer voorspelbaar. Die temperatuur kan wissel van 10 °C tot 28 °C op dieselfde dag. Soggens en saans kan dit baie koud wees, en warm klere word sterk aanbeveel.

'n Wit leeuwelpie by Kromdraai, Suid-Afrika.

Verwysings
  1. "Timbavati Private Nature Reserve (TPNR)" (in Engels). Simbavati River Lodge. Geargiveer vanaf die oorspronklike op 5 November 2012. Besoek op 11 Desember 2009.

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.