Teenpous Clemens VIII

Gil Sanches Muñoz[2] was die seun van Pedro II Muñoz y Liñan en Catalina Sanchez de Carbon. Hy studeer kerkreg en was tot 1396 in diens van die kurie in Avignon. As gesant van Teenpous Benedictus XIII en aartsbiskop van Valencia het hy hom beywer vir die beëindiging van die Westerse Skisma.

Op die konsilie van Constance is Benedictus afgeset en Pous Martinus V tot pous verkies. Benedictus het die afsetting nie erken nie en homself tot sy dood in 1423 as die regmatige pous beskou. Na sy dood het drie van die vier kardinale wat deur Benedictus aangestel is, vir Gil Sanchez Muños as sy opvolger verkies. Hy het die naam Clemens VIII aangeneem. Hy het die steun van koning Alfonso V van Aragon en Sisilië gekry omdat die koning 'n geskil met Rome gehad het. Pas drie jaar na die dood van Benedictus op 19 Mei 1426 laat Clemens hom as pous uitroep. Die vierde kardinaal wat deur Benedictus aangestel is, was nie tevrede met die keuse nie en het sy eie kandidaat Teenpous Benedictus XIV laat aanstel. Clemens het toe Benedictus XIV in die ban gedoen.

In 1429 het Rome en Aragon vrede gesluit en die politieke steun vir Clemens het verval. Op 26 Julie 1429 doen hy afstand van die pousskap en om verdere moeilikhede te voorkom laat hy sy kardinale die bestaande pous Martinus V as pous verkies. Clemens onderwerp hom aan pous Martinus en word aangestel as biskop van Mallorca.