Teenpous Benedictus XIV

In 1417 het die konsilie van Constance die Westerse Skisma beëindig deur die bestaande twee aanspraakmakers op die pousskap af te set en Pous Martinus V as pous te kies. Benedictus XIII een van die aanspraakmakers het nie bedank nie en in 'n kasteel in Peñiscola in die koninkryk van Valencia voortgegaan as pous. Op die dag net voor sy dood het hy vier van sy getroue aanhangers aangestel as kardinale. Drie van die kardinale het na Benedictus se dood vir Teenpous Clemens VIII as pous verkies. Een van Benedictus se kardinale, Jean Carrier wat afwesig was tydens die verkiesing, het die verkiesing as ongeldig verklaar en Bernard Garnier verkies, wat die naam Benedictus XIV aangeneem het.[2] Carrier was aartsdeken van Rodez naby Toulouse en Garnier was die koster van Rodez.

Garnier het in die geheim sy pousskap beoefen en staan bekend as die versteekte pous. In 'n brief aan Johanna van Arkel skryf die graaf van Armagnac dat slegs Carrier geweet het waar Garnier hom bevind. Garnier regeer tot sy dood in 1429 of 1430. Hy het selfs kardinale aangestel waarvan een se naam Jean Farald was.

Na die dood van Garnier, stel Carrier homself aan as pous en noem homself ook Benedictus XIV.[3] Carrier word egter deur Clemens VIII gevang en opgesluit in die kasteel van Foix waar hy omstreeks 1437 te sterwe kom.

Daar word beweer dat kardinale lojaal aan Carrier toenemend minder belangrike teenpouse aangestel het in 1437 en 1470.[4]