Taubie Kushlick

Taubie Kushlick (7 Mei 1910 – 13 Maart 1991) was ’n Suid-Afrikaanse verhoogaktrise, -regisseur en -produksieleier. Sy het veertig jaar lank haar stempel op die Suid-Afrikaanse toneelwêreld afgedruk.

Taubie Kushlick
Geboortenaam Taubie Braun
Geboorte 7 Mei 1910
Luckhoff, Vrystaat
Sterfte 13 Maart 1991
Johannesburg
Nasionaliteit Suid-Afrika
Beroep(e) Akteur, regisseur, produksieleier

Lewe

Sy is op 7 Mei 1910 in Luckhoff gebore as Taubie Braun.[1] Sy het in Londen studeer, toe in Port Elizabeth gewerk en in 1939 na Johannesburg verhuis waar sy by die Johannesburg Repertory Society (Johannesburg REPS) aangesluit en in toneelstukke begin optree het. Sy het ook stukke geregisseer en vervaardig.

Sy het met dr. Philip Kushlick getrou en hulle het ’n seun, dr. Rupert Kushlick, gehad.

In 1955 het sy 25 jaar in die bedryf gevier met die regie van twee Amerikaanse toneelstukke in His Majesty’s Theatre: The Desperate Hours en The Fifth Season.

In Maart 1959 het Kushlick in ’n vennootskap gegaan met Leon Gluckman en die maatskappy Kushlick-Gluckman gestig. Hul eerste produksie was ’n musikale weergawe van Oscar Wilde se The Importance of Being Earnest. Gluckman was die regisseur van Half in Earnest en Kushlick het die rol van lady Bracknell gespeel. In 1962 het sy die Franse akteur Marcel Marceau na Suid-Afrika gebring, asook die Ierse akteur Michéal MacLiammoír om sy eenmanstuk oor Oscar Wilde, The Importance of Being Oscar, op te voer.

Sy het later Taubie Kushlick Productions gestig en oor die jare talle toneelstukke vervaardig. Haar produksie van Eric Blau en Mort Shuman se Jacques Brel is Alive and Well and Living in Paris het op 12 Augustus 1972 in die Chelsea Theatre in Johannesburg geopen. Verskillende weergawes van die stuk het na ander stede getoer met verskillende sangers soos Gay Lambert, Laurika Rauch, Bruce Millar en Judy Page. In 1981 het sy From Taubie with Love in die Markteater op die planke gebring met Judy Page en Marloe Scott-Wilson.

In 1987 het Kushlick vir Danielle Pascal na Suid-Afrika gebring om in About Love en Bravo Piaf te sing. Sy het Kushlicks Theatre Restaurant op 5 September 1989 geopen met haar produksie van A Tribute to the Words and Music of Brel.

Dood

Sy het sowat vyf weke voor haar dood in 1991 ’n maagoperasie ondergaan. Hoewel sy skynbaar goed herstel het, het sy op 13 Maart in hul huis ineengesak en is kort daarna oorlede.[2]

Verwysings
  1. The Encyclopaedia of South African Theatre, Film, Media and Performance. URL besoek op 22 Februarie 2013
  2. "Talle bring hulde aan Taubie Kushlick", Die Burger, 15 Maart 1991. URL besoek op 22 Februarie 2013.
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.