Tatham-kunsgalery

Hierdie kunsmuseum is sedert 1990 in die ou Hooggeregshofgebou en die ou Presbiteriaanse kerk in Albert Luthulistraat in Pietermaritzburg.

In 1903 het mev. Ada Susan Tatham met geld geskenk deur die inwoners van Natal en 'n bydrae deur die stadsraad van Pietermaritzburg in Engeland 'n aanvangsversameling aangekoop. Deur die jare is die versameling uitgebrei deur aankope, bemakings en skenkings.

In 1923 het lt.kol. Robert H. Whitwell van Engeland 'n waardevolle versameling van meer as 400 kunswerke uit die periode 1880 tot 1920 aan die museum geskenk. Dit het bestaan uit skilderye, grafiese kuns, glas, porselein en Oosterse matte en vorm sedertdien die kern van die versameling.

Skildery deur Philip Wilson Steer, 2016, Tatham-kunsgalery

Hier is 'n klein, maar goeie versameling skilderye hoofsaaklik van Engelse en Franse kunstenaars van die laat 19de en vroeg 20ste eeu. Die bekendste kunswerk in die museum is die skildery “ 'n Studie van bome in blom” deur die impressionis Alfred Sisley (1839–1899). Walter R. Sickert (1860–1942) het ses en Philip Wilson Steer (1860–1942) het twee skilderye in die versameling. Onder die ander kunstenaars wie se skilderye hier te sien is, is William Orpen (1871–1931), die Franse impressionis Edgar Degas (1834–1917), Pablo Picasso (1881–1973), Pierre-Auguste Renoir (1841–1919), Henri Matisse (1869–1954), David Hockney (1937), Alfred Manessier (1911–1993), Ivon Hitchens (1893–1979), die landskapskilder Peter de Wint (1784–1849), akwarelmeester John Sell Cotman (1782–1842), Pierre Bonnard (1867–1947), Jean-Baptiste-Camillle Corot (1796–1875), Charles-Francois Daubigny (1817–78), die Franse landskapskilder Henri Harpignies (1819–1916) en ander lede van die Barbizonskool (1830–70). Onder die skilderye deur Suid-Afrikaanse kunstenaars is die werk van Cecil Higgs (1898–1986), Wolf Kibel (1903–38) en Lippy Lipshitz (1903–80) die bekendste.

Drie versamelings van moderne Suid-Afrikaanse kuns is hier aanwesig. 'n Verskeidenheid soorte kuns is vervat in die Lorna Peirson-versameling, afdrukke in die Johansson-versameling en keramiek in die Millin-versameling.

'n Wye verskeidenheid tradisionele Zoeloe-kuns soos kralewerk en pottebakkerswerk is te sien, so ook beeldhouwerk deur Mandlenkosi Zondi. Ook is hier 'n bronsbeeld deur Antoine Bourdelle (1861–1929), portrette deur John Opie (1761–1807), Lalique-glas deur René Jules Lalique (1860–1945), porselein uit Sèvres, Dresden, Delft, Kopenhagen en China (K'ang Hsi) en ander artikels uit Japan, Rusland en Iran.

• Fransen, Hans: Guide to the museums of Southern Africa. Kaapstad: Southern African Museums Association, 1978.
• www.pmbhistory.co.za
• www.tatham.org.za