TCP/IP
TCP/IP is 'n versameling protokolle wat algemeen vir kommunikasie tussen rekenaars gebruik word. Die naam TCP/IP is 'n samestelling van die twee bekendste protokolle van die TCP/IP-protokolsuite, naamlik die transmissiebeheer-protokol (TCP) en het internetprotokol (IP). TCP/IP word as "TCP oor IP" uitgespreek. Die Internet is die grootste en bekendste TCP/IP-netwerk.
| Internet- en netwerkprotokolle | |
|---|---|
| Toepassingvlak: | DNS FTP Gopher HTTP HTTPS IMAP IRC NNTP POP3 RTP SIP SMTP SNMP SSH SSL Telnet UUCP XMPP |
| Versendvlak: | DCCP SCTP TCP UDP |
| Netwerkvlak: | ARP ICMP IGMP IP(IPv4, IPv6) RARP |
| Dataskakelvlak: | ATM Ethernet FDDI PPP Token ring Wi-Fi |
| volgens die TCP/IP-model | |
Protokolle
TCP/IP is gebaseer op navorsing wat die Amerikaanse Departement van Verdediging (DoD) gedoen het om boodskappe oor die ARPANET-netwerk te stuur. Dit bestaan hoofsaaklik uit vyf protokolle:
- Internetprotokol (IP)
- Transmissiebeheerprotokol (TCP)
- Lêeroordragprotokol (FTP)
- Eenvoudige pos-oordragprotokol (SMTP)
- Telnet (om die opdraglyn van rekenaars oor te neem)
Argitektuur
Die TCP/IP-argitektuur bestaan uit vier vlakke:[1]
- Die netwerktoegangsvlak (dataskakelvlak) bevat protokolle wat nodig is vir toegang tot 'n netwerk. Die protokolle word gebruik vir kommunikasie tussen die bediener (kommunikasienode) en die gekoppelde kliënt (gasheer). TCP/IP beskik nie oor 'n unieke protokol nie, maar gebruik die protokolle benodig vir 'n spesifieke netwerk, byvoorbeeld ethernet, X802 of X.25.
- Die internetvlak (netwerkvlak) bevat prosedures wat die beweging van data oor verskillende netwerke moontlik maak. Die vlak verrig dus 'n roeteringsfunksie. Die protokol in die vlak word die internetprotokol of IP genoem.
- Die transportvlak (versendvlak) verseker die betroubare oordrag van data tussen twee gashere. Die vlak is ook verantwoordelik vir die oorhandiging van die data aan die regte toepassing.
- Die toepassingsvlak bevat die protokolle vir die spesifieke gebruikertoepassings, soos byvoorbeeld lêeroordrag (FTP) en elektroniese pos (SMTP).
Verwysings
- Netwerksekerheid Geargiveer 4 Maart 2016 op Wayback Machine, 'n verhandeling deur Abraham Jacobus Nel, Randse Afrikaanse Universiteit, Februarie 1991
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.