Suid-Afrikaanse algemene verkiesing van 2014

Verskeie nuwe partye het op nasionale en provinsiale vlak aan die verkiesing deelgeneem:

• South Africa First (SAF) is gestig deur voormalige lede van Umkhonto we Sizwe, die ANC se gewapende vleuel.
• Agang is gestig deur Mamphela Ramphele.
• Die Werkers- en Sosialistiese Party (WASP) is op Sharpevilledag in 2013 gestig deur leiers van die onafhanklike mynwerkers se betogingskomitee wat aan die stuur van betoging by Marikana was, en die Democratic Socialist Movement (DSM).
• Die Ekonomiese Vryheidsvegters is gestig deur Julius Malema.
• Die United Congress is gestig deur Mluleki George.
• Die Nasionale Vryheidsparty is gestig deur Zanele kaMagwaza-Msibi, voorheen van die IVP.
• Front Nasionaal is gevorm deur ’n samesmelting van die Boere-Krisis-Aksie en die Federale Vryheidsparty.

Die Onafhanklike Demokrate wat 4 setels en 0,9% van die stemme in 2009 gekry het, het met die Demokratiese Alliansie saamgesmelt voor die verkiesing.

Op 17 Desember 2013 is aangekondig dat vyf politieke partye, naamlik Cope, die IVP, die ACDP, die UCDP en die Vryheidsfront Plus ’n samewerkingsooreenkoms bereik het met 20 spesifieke prioriteite waaroor die partye eenstemmigheid bereik het. Die partye in die koalisie, genaamd die Kollektief vir Demokrasie en onder voorsitterskap van Mosiuoa Lekota van Cope, sal hul eie identiteite behou en onder hul eie name en logos aan die verkiesing deelneem.[4] Die IVP het aanvanklik deelname aan die koalisie ontken en gesê dat hulle versigtig is vir die stig van sulke koalisies omdat dit in vorige verkiesings slegs verwarring onder hul ondersteuners veroorsaak het.[5][6]

Op 20 Desember 2013 het NUMSA, een van Cosatu se grootste bondgenote, aangekondig dat hulle nie die ANC of enige ander politieke party sal steun in 2014 nie en dat NUMSA beplan om ’n nuwe werkersklas-kollektief soortgelyk aan die ontbinde United Democratic Front met die uiteindelike doel om ’n sosialistiese party te vorm wat aan die 2019-verkiesing gaan deelneem.[7][8]

Op 28 Januarie 2014 het die DA aangekondig dat Mamphela Ramphele ’n uitnodiging om as presidentskandidaat van die DA te staan, aanvaar het[9][10][11] en dat die DA en Agang sou saamsmelt.[12][13] Op 31 Januarie 2014 het Ramphele gesê dat sy nie DA-lidmaatskap wou aanvaar nie en dat sy die leier van Agang Suid-Afrika sal bly. Dit het heelwat verwarring veroorsaak.[14] Op 2 Februarie 2014 het Zille gesê dat Ramphele die ooreenkoms verloën het.[15] Ramphele het gevolglik verskoning gevra vir die omkeer in haar besluit en gesê dat die tydsberekening nie reg was nie.[16]

Op 6 Februarie 2014 is aangekondig dat die Cope-lede wat Shilowa-ondersteuners was, beplan het om by die United Democratic Movement van Bantu Holomisa aan te sluit.[17] Op 11 Maart 2014 het Al Jama-ah en die Afrika Moslemparty aangekondig dat hulle saam sou werk onder die naam Al Jama-ah Gemeenskapsparty.[18] Op 12 Maart is verslag gedoen dat ’n DA-LP, Beverley Abrahams, by die ANC aangesluit het.[19] Voorts is op 20 Maart 2014 bekend gemaak dat Lourie Bosman, Niekie van den Berg en Theo Coetzee van die DA en Pieter Vorster van die Afrikanerbond hulle by die Vryheidsfront Plus aangesluit het en hulself as parlementêre kandidate beskikbaar stel.[20]