Sterretjies

Sterretjies
	Geelbeksterretjie
Wetenskaplike klassifikasie
Domein:	Eukaryota
Koninkryk:	Animalia
Filum:	Chordata
Klas:	Aves
Orde:	Charadriiformes
Suborde:	Lari
Familie:	Sternidae; Bonaparte, 1838
Genera
	Anous; Procelsterna; Gygis; Onychoprion; Sternula; Phaetusa; Hydroprogne; Gelochelidon; Larosterna; Chlidonias; Thalasseus; Sterna;

Die sterretjies is 'n groep seevoëls wat verwant is aan die steltloperagtiges (Charadriiformes) en waterploeërs (Rhynchopidae).

Daar is egter geen konsensus oor hierdie groep se indeling nie en hulle word dikwels onder die familie meeue (Laridae) ingedeel. Soms word hulle egter as 'n aparte familie (Sternidae) beskou, of selfs as 'n subfamilie (Sterninae), of 'n genus (Sternini).

Die meeste sterretjies is vroeër by die genus Sterna ingedeel.[1] DNS-analise het egter gelei tot die opdeel van hierdie groep in 'n aantal klades van kleiner genera.[2][3]

Sterretjies kom oor die hele wêreld voor. Met uitsondering van enkele tropiese en varswaterspesies het almal 'n grys en wit verekleed.

Tydens die paartyd het hulle egter swart mussies en sommige spesies kry ook swart vere op die rug en bors. Hulle is skraal, elegante voëls met lang, gepunte vlerke, met relatief klein pote en tone en dun snawels. Die meeste spesies het gevurkte swaelsterte met diep mikke. Seeswaels leef hoofsaaklik van klein vissies en word trouens meestal in kusgebiede aangetref. Sowat 75 % van alle seeswaels behoort tot die genus Sterna, waarvan elf spesies in Suid-Afrika voorkom.

Die bekendste verteenwoordiger van die genus wat ook in Suid-Afrika aangetref word, is die Europese grysborsseeswael of die Arktiese seeswael (Sterna paradisaea), wat elke winter van die Noordpool tot selfs na die Suidpool migreer. Die Damara-seeswael (Sterna balaenarum) word slegs aan die kus van Angola, Namibië en Kaapland aangetref. Sommige spesies is slegs somergaste wat van Asië of Europa af migreer.

Verteenwoordigers van ander genera wat ook in Suid-Afrika aangetref word, is die reusesterretjie (Hydroprogne caspia); die sogenaamde lagseeswael (Gelochelidon nilotica); die grootbruinsterretjie (Anous stolidus); die witvlerkswartswael (Chlidonias leucoptera); die witbaardsterretjie (Chlidonias hybrida); die swartmeerswael (Chlidonias nigra) en moontlik die wit seeswael (Gygis alba). Spesies wat nie in Suid-Afrika voorkom nie, is die grootbekseeswael (Phaetusa simplex), wat langs riviere in Suid-Amerika voorkom, en die inkaseeswael (Larosterna inca), wat in China voorkom.

Sien ook

Verwysings

del Hoyo, J.; Elliott, A. & Sargatal, J. (1996): Handbook of Birds of the World, Volume 3: Hoatzin to Auks. Lynx Edicions, Barcelona. ISBN 84-87334-22-9
Bridge, E.S.; Jones, A.W. & Baker, A.J. (2005): A phylogenetic framework for the terns (Sternini) inferred from mtDNA sequences: implications for taxonomy and plumage evolution. Molecular Phylogenetics and Evolution 35(2): 459-469. doi:10.1016/j.ympev.2004.12.010
Collinson, M. (2006). Splitting headaches? Recent taxonomic changes affecting the British and Western Palaearctic lists. British Birds 99 (6): 306-323.

Bronnelys

Wêreldspektrum, 1982, ISBN 0-908409-66-4, volume 25, bl. 60

Eksterne skakels

Wikispecies het meer inligting verwant aan Sterretjies
(en) "Tern". Encyclopædia Britannica. Besoek op 19 Augustus 2019.

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.

[1] Hoyo, J.; Elliott, A. & Sargatal, J. (1996): Handbook of Birds of the World, Volume 3: Hoatzin to Auks. Lynx Edicions, Barcelona. ISBN 84-87334-22-9

[Bridge-2] Bridge, E.S.; Jones, A.W. & Baker, A.J. (2005): A phylogenetic framework for the terns (Sternini) inferred from mtDNA sequences: implications for taxonomy and plumage evolution. Molecular Phylogenetics and Evolution 35(2): 459-469. doi:10.1016/j.ympev.2004.12.010

[3] Collinson, M. (2006). Splitting headaches? Recent taxonomic changes affecting the British and Western Palaearctic lists. British Birds 99 (6): 306-323.