Leucospermum

Leucospermum (speldekussings) is 'n struikgenus wat hoort tot die familie Proteaceae. Daar is 48 spesies wat tot die genus hoort.

Leucospermum
Leucospermum erubescens
Wetenskaplike klassifikasie
Domein:	Eukaryota
Koninkryk:	Plantae
Klade:	Tracheofiete
Klade:	Angiospermae
Klade:	Eudicots
Orde:	Proteales
Familie:	Proteaceae
Subtribus:	Leucadendrinae
Genus:	Leucospermum R.Br.
Tipespesie
Leucospermum hypophyllocarpodendron[1] (L.) Druce
Sinonieme[2]
Conocarpus Adans. non L. Lepidocarpus Adans. Leucadendrum Salisb. in Knight Leucadendron O.Kuntze non L.

Die speldekussings of luisies is na die proteas seker die bekendste en gewildste tuin- en snyblomme van die proteafamilie. Soos die proteas hou die blomme van speldekussings ook lank en die blomtyd is ook lank (dikwels 4 maande of langer). Waar die skutblare meestal die eienskap is wat proteas so aantreklik maak, is die uitstaande style en stempels die kenmerkendste eienskap van die speldekussings. Speldekussings het geen skutblare nie.

Wanneer hulle nie blom nie, kan speldekussings van proteas (en alle ander lede van die proteafamilie) onderskei word op grond van die drie of meer tandjies wat hulle aan die punte van hul blare het en wat dikwels rooierige randjies het. Die speldekussings kan ruweg verdeel word in die met groter blomkoppe ('n deursnee van meer as ongeveer 4 cm) en die met klein blomkoppe (ongeveer 3 cm in deursnee). Die blomkoppies van die rankende Leucospermum prostratum is slegs ongeveer 2 cm in deursnee. Die bekendste en gewildste speldekussings is Leucospermum cordifolium (vroeër Leucospermum nutans) en Leucospermum reflexum.

Met die uitsondering van die transkeise speldekussing, spitsblaarspeldekussing en die seepsteenspeldekussing kom al die spesies in die Wes-Kaap voor.