Sof Omar-grotte

Sof Omar is ’n stelsel grotte wat op 15,1 km die langste in Ethiopië is. Toe dit in 1972 gemeet is, was dit die langste in Afrika, maar sedertdien is langer grotte in Algerië (Tafnariviergrot, 18,4  km) en Madagaskar (Krokodilgrot, 18,1 km) ontdek.[1] Die grotte is geleë oos van Robe in die Balesone van die Oromia-streek in Suidoos-Ethiopië, waardeur die Weyibrivier (Gestrorivier) vloei.[2] Dit sak ondergronds by die Ayiew Maco-ingang en verskyn weer bogronds by Holuca sowat 1 km van daar. Volgens tradisie was Sof Omar ’n Moslemheilige wat in die gebied gewoon het en Ayiew die naam van sy dogter. Maco en Holuca is plaaslike terme vir onderskeidelik "naam" en "grot". Dit is al lank ’n godsdienssentrum en is heilig vir beide Moslems en plaaslike Oromo's. Die grotte is bekend vir hulle pilare, veral in die "Pilaarkamer".

Sof Omar-grotte
Die Pilaarkamer in die Sof Omar-grotte.
Die Pilaarkamer in die Sof Omar-grotte.
Ligging Bale-provinsië
Vlag van Ethiopië Ethiopië
Koördinate 6°54′22.7″N 40°50′41.6″O
Lengte 15,1 km
Ontdek 1897
Die Weyibrivier verdwyn in die Ayiew Maco-ingang van die Sof Omar-grotte. Die droë vallei en dorp is links daarvan.

Topografie

As ’n mens van Goro na Sof Omar reis, daal die struikgewas steil met 90 m in ’n kloof af. Die Weyibrivier loop van die 4 300 m hoë Balberge deur ’n 150 km breë rif van kalksteen na die grot. Vroeër het die rivier skerp na links gekronkel, maar in ’n stadium het die kalksteen opgelos en ’n reeks deurgange gevorm wat groot genoeg geword het vir die hele Webrivier om deur te loop. Uiteindelik het die rivier die kronkelpad verlaat en ’n droë vallei geskep wat van Ayiew Maco tot by Holuca loop. Die dorpie Sof Omar is naby Ayiew Maco in die droë vallei geleë.

Nog ’n dominante verskynsel is ’n groot sinkgat van 100 m breed en 60 m diep wat in die basaltplato reg bo die grotte voorkom.

Verwysings
  1. Guden, Bob. "World's Longest Caves". Caver Bob. Besoek op 5 November 2020.
  2. http://www.bookrags.com/tandf/sof-omar-cave-ethiopia-tf/#p2000a3339960656001%5Bdooie+skakel%5D Encyclopedia of Caves and Karst Science

Skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.