Snelheid

Die snelheid van 'n liggaam verwys na die tempo waarteen die posisie van die liggaam verander, met inbegrip van die rigting waarin dié verandering plaasvind. Dit kan ook beskryf word as die verplasing van die liggaam in 'n gegewe tydinterval, weereens met inbegrip van die rigting van die begin- na die eindpunt.

Snelheid is naamlik 'n vektorhoeveelheid waarvan die rigting 'n inherente aspek vorm. In 'n driedimensionale ruimte word dit gevolglik deur 'n driedimensionale vektor (essensieel drie geordende getalle) weergegee, wat opgestel kan word nadat 'n Cartesiese assestelsel gekies is. Die absolute waarde (of grootte) van hierdie snelheid lewer die liggaam se spoed, wat met 'n enkele getal, of skalaarhoeveelheid, aangedui kan word. Die spoed is gevolglik nie rigtingafhanklik nie, en 'n assestelsel is oorbodig by die beskrywing daarvan.

Tensy daar 'n krag op die liggaam uitgeoefen word sal die snelheid van die liggaam onveranderd bly, soos bepaal deur Newton se eerste wet: die wet van traagheid. Beide die spoed en bewegingsrigting bly gevolglik konstant tot welke tyd 'n krag op die liggaam inwerk, wanneer Newton se tweede wet in werking tree.

Berekening

Wiskundig word snelheid as volg gedefinieer: $v={\frac {\Delta x}{\Delta t}}$
Waar $\Delta x$ die verplasing verteenwoordig en $\Delta t$ die verlope tyd verteenwoordig.

Snelheid kan gesien word as die eerste afgeleide, volgens tyd ( $t$ ), van posisie ( $x$ ) of die integraal van versnelling (a):

$v={\frac {dx}{dt}}$
$v=\int _{a}^{b}a\,dt$

Snelheid vs spoed

Streng gesproke is daar 'n verskil tussen snelheid en spoed. Kyk na die definisies van snelheid en spoed hieronder en ook verplasing en afstand:

Snelheid = Verplasing / Tyd

Spoed = Afstand / Tyd

Kyk ook

This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.