Sildenafil

Sildenafil, wat onder meer onder die naam Viagra verkoop word, is ’n mediese middel wat gebruik word om erektiele disfunksie en pulmonale hipertensie te behandel.[1] Dit is onduidelik of dit doeltreffend is in die behandeling van seksuele disfunksie by vroue.[1]

Pfizer se Viagratablet in die kenmerkende blou diamntvorm.

Werking

Sildenafil word per mond geneem of in ’n aar ingespuit.[1] Dit begin gewoonlik binne 20 minute werk en die uitwerking duur sowat twee uur.[1] Dit blokkeer ’n ensiem wat die nukleotied beïnvloed wat bloedvloei na die penis reguleer.[1] Dit verg egter seksuele opwekking om te werk.[1] Dit lei ook tot die verruiming van die bloedvate in die longe.[1]

Algemene newe-effekte sluit in hoofpyn, sooibrand en ’n blossende vel.[1] Mense met hartbloedvatsiektes word gewaarsku om versigtig te wees as hulle dit gebruik.[1] Seldsame maar ernstige newe-effekte sluit in ’n lang ereksie, wat tot skade aan die penis kan lei, sigprobleme en gehoorverlies.[1]

Die Amerikaanse farmaseutiese korporasie Pfizer het die middel oorspronklik in 1989 ontdek in ’n soektog na ’n behandeling vir hartverwante borspyne.[2] Dit is in 1998 in Amerika en Europa as medisyne goedgekeur.[1][2]

Verwysings
  1. "Sildenafil Citrate" (in Engels). The American Society of Health-System Pharmacists. Geargiveer vanaf die oorspronklike op 23 April 2020. Besoek op 1 Desember 2014.
  2. Goldstein, I; Burnett, AL; Rosen, RC; Park, PW; Stecher, VJ (6 Oktober 2018). "The Serendipitous Story of Sildenafil: An Unexpected Oral Therapy for Erectile Dysfunction". Sexual Medicine Reviews. 7 (1): 115–128. doi:10.1016/j.sxmr.2018.06.005. PMID 30301707.

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.