Sidney Goldblatt

Sidney Goldblatt (1919 - 28 Desember 1979) was 'n Suid-Afrikaanse kunstenaar en beeldhouer. Hy is in Johannesburg gebore. Ná sy skoolloopbaan het hy vir 10 jaar 'n sakebestaan gevoer. Gedurende dié tyd het hy reeds 'n groot belangstelling in die kuns getoon en van tyd tot tyd geskilder. Ná sy eerste eenman-uitstalling in 1948 het hy besluit om hom voltyds op die skilderkuns toe te lê. Hy is vir 3 jaar na Londen en Parys om kuns te bestudeer. In Parys het hy onder André Lhöte en Ferdinand Léger gestudeer en in Londen het hy die tegniek van beeldhou bemeester.

Sidney Goldblatt het in 1952 na Suid-Afrika teruggekeer ná hy eers 'n besoek aan Italië gebring het. Hy het hom in Hillbrow, waar hy grootgeword het, gevestig. Dié voorstad het 'n sterk indruk op Goldblatt gemaak en sy kubistiese benadering en die verdeling van sommige van sy werke in vlakke kan hieraan toegeskryf word. Kort ná sy huwelik met Wendy Webster in 1955 het hy 'n kunsskool geopen, waar hy verskeie kunstenaars opgelei het.

In 1957 is Goldblatt vir 'n jaar na Europa, waar hy 6 maande lank in Spanje deurgebring het, Italië, Switserland en Frankryk besoek het en ook 3 maande in Engeland deurgebring het. Die rustieke Spaanse landskap met sy dramatiese lig het 'n groot invloed op hom gehad en sy skilderye van die diere, landskap, mense, geboue, dorpies en visserstonele was kleurvol, semi-abstrak en gestileer. Met sy terugkeer na Suid-Afrika was dié Spaanse werke oorheersend op uitstallings wat vir hom sowel binnelands as in die buiteland erkenning gebring het.

Sy styl het mettertyd verander - 'n non-figuratiewe element met 'n groter sensitiwiteit vir kleur, meer kompakte komposisies en 'n vrye hand het algaande opvallend geword. In sy later jare het hy na die realisme teruggekeer.

Goldblatt het verskeie mediums gebruik - hy was grafiese kunstenaar sowel as beeldhouer en olieverfskilder.

Die meeste van sy grafiese werke is linosneë en hy het soms ook akriel gebruik. Soms het hy ook kombinasies van linoleum, olieverf en goiing gebruik, dikwels in monokleur. Aanvanklik het hy linoleum vir sy collage-komposisies gebruik, maar later het dit die medium self geword, met 'n sterk lineêre element daarin. Die meeste van Goldblatt se beeldhouwerke is van aluminium en in groen en swart brons gegiet. Sy beeldhouwerke is deur sy skilderye en linowerke beïnvloed, maar elemente van die Afrika-beeldhoukuns en kubisme kom ook sterk na vore.

In die laaste paar maande van sy lewe het Sidney Goldblatt vele aspekte van Namibië geskilder. Hy en sy vrou het kort voor sy dood 'n besoek aan dié land gebring en hy was beïndruk deur die statige ou geboue van die land en die Namib-woestyn.