Savannekat

Die Savannekat is ’n hibridiese katras wat ’n kruising is tussen ’n huiskat en ’n tierboskat.

Savannekat
Land VSA
Ontstaan Hibride
Pels Kort
Patroon Kolle
Wetenskaplike naam
Felis catus (huiskat)
Portaal  Portaalicoon   Katte

Geskiedenis

Judee Frank, die teler van Bengaalse katte, het ’n mannetjie-tierboskat met ’n Siamese kat gekruis. Hul eerste katjie is op 7 April 1986 gebore.[1] Die kat het die belangstelling gewek van Patrick Kelley, wat een van die latere katjies in 1989 gekoop het.[2] Kelley was een van die eerste telers wat ’n nuwe katras wou skep wat op dié kruising gebaseer is. Hy en ’n ander teler, Joyce Sroufe, het saamgewerk om die kat erken te kry.[2] Hulle het ook ’n teelstandaard opgestel. In 2001 het TICA die nuwe ras erken.[3]

Die kat is ook in Brittanje goed ontvang en het veral sedert 2006 geweldig toegeneem in gewildheid. In 2010 is die eerste Savannekat in Brittanje geteel.

Beskrywing
Die ore van ’n Savannekat het strepe aan die agterkant wat soos vals oë lyk.

Savannekatte is een van die grootste huiskatrasse. Hul hoë, lenige bou laat hulle swaarder lyk as wat hulle is. Latere geslagte wat verder verwyder is van die tierboskat, is gewoonlik kleiner. Die Savanne se pels hang af van die huiskatras wat vir die oorspronklike kruisteling gebruik is. Vroeë geslagte het die een of ander vorm van donker kolle op ’n ligter agtergrond en baie van die eerste telers het katte met ’n "wilde" voorkoms soos Bengaalse katte en Egiptiese maus gebruik om die kolle te behou. TICA erken net bruin katte met swart of donkerbruin kolle, silwer met swart of donkergrys kolle, swart met swart kolle en silwer met swart haarpunte en swart kolle.[4] Daarbenewens is nie-standaardkleure ook te kry. Baie telers probeer dié kleure uitskakel, terwyl ander met dié katte teel om nuwe eienskappe te skep.

Die Savanne se kolle, groot ore en lang bene laat hulle baie soos die tierboskat lyk. Die klein kop is hoër as wat dit breed is, en die nek is dun.[5] Die merke aan die agterkant van die ore lyk soos vals oë. Die kort stert het swart ringe en ’n effekleurige swart punt. Swart merke loop van die hoek van die oë teen die neus af na die snorbaard, baie soos by ’n jagluiperd.

Savannekatte se geaardhede wissel van sosiaal met mense en ander diere tot bang vir vreemdelinge. Hulle moet verkieslik van kleins af aan mense blootgestel word. Hulle is intelligent en nuuskierig en leer dikwels hoe om kasdeure oop te maak. Baie katte is nie bang vir water nie in sal in die water speel. Nog eienaardighede is ’n vermoë om die hare op die punt van die stert te laat rys as ’n manier van groet en ’n vreemde sisgeluid wat meer soos dié van ’n slang as van ’n kat klink.

Sien ook

Verwysings
  1. "Blast from the Past. . . . The Very First F1 Savannah" (PDF). Feline Conservation Federation. 51 (4): 32. 2007. (Oorspronklike essay: Wood, Suzi (November 1986). LIOC-ESCF 30 (6): 15.)
  2. "SIMBA spotlight on Patrick Kelley". The Savannah Cat Newsletter (in Engels). S.I.M.B.A. Herfs 2003. pp. 9–12. Geargiveer vanaf die oorspronklike op 20 Desember 2016. Besoek op 3 Oktober 2009.
  3. "TICA Savannah breed introduction" (in Engels). TICA. Geargiveer vanaf die oorspronklike op 16 September 2015. Besoek op 3 Oktober 2009.
  4. "TICA Breed Standard for Savannahs (SV)" (PDF). Besoek op 18 Desember 2008.
  5. "Petworld: Volume 6, Issue 6". Geargiveer vanaf die oorspronklike op 18 Junie 2010. Besoek op 24 November 2006.

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.