Sava

Die Sava (Sloweens: [ˈsàːʋa]; Serwo-Kroaties: [sǎːʋa]; Serwiese Cyrillies: Сава) is 'n groot oos-vloeiende rivier in suidelike Sentraal-Europa. Die rivier, met 'n lengte van 990 km, vorm die tweede grootste sytak van die Donau na die Tisza (volgens sy gemiddelde afloop van 1 609 m³/s is die Sava die waterrykste takrivier). Die Sava vorm die noordelike grens van die Balkanskiereiland en die suidelike grens van die Pannoniese Laagvlakte. Die Sava vloei deur drie nasionale hoofstede: die Sloweense Ljubljana, die Kroatiese Zagreb en die Serwiese Belgrado. Altesaam meer as agt miljoen mense leef in die Sava-bekken, veral Bosniërs, Kroate, Serwiërs en Slowene. Die Sava-bekken word in die suide deur die Dinariese Alpe begrens.

Die Sava in Zagreb, Kroasië
Die Sava in Slavonski Brod, Kroasië. Bosnië en Herzegowina is oorkant dié rivier
Sava
Die Sava in Belgrado, Serwië.
Die Sava in Belgrado, Serwië.
Die Sava in Belgrado, Serwië.

Die stroomgebied van die Sava.

Oorsprong Samevloeiing van Sava Bohinjka en Sava Dolinka naby Radovljica, Slowenië
Alpe
Monding Belgrado, Serwië
Donau
Stroomgebied Slowenië, Kroasië, Bosnië en Herzegowina, Serwië
Lengte 990 km (620 myl)[1]
Oorspronghoogte 833 m (2 733 voet)
Mondinghoogte 68 m (223 voet)
Gemiddelde afloop 1 609 m³/s (56 800 vt/s³)
Stroomgebiedopp. 97 713,2 km² (37 727,3 myl²)[1]
Kaart van die Sava-bekken in Europa.
Kaart van die Sava-bekken in Europa.

Die Sava ontstaan deur die saamvloei van Sava Bohinjka en Sava Dolinka naby Radovljica, Slowenië, in die Alpe, net suid van die grens met Oostenryk. Aansluitend vloei die Sava in 'n suidoostelike rigting en bereik die Sloweense hoofstad Ljubljana. Van hier af vloei die rivier verder in 'n suidoostelike rigting en bereik Kroasië. Net ná die grens vloei die Sava deur die Kroatiese hoofstad Zagreb. Die rivier gaan voort in 'n suidoostelike rigting en vorm later vir 'n lang stuk die noordelike grens van Bosnië en Herzegowina met Kroasië. Verder oos vorm die Sava vir 'n kort stukkie die grens tussen Serwië en Bosnië en Herzegowina, voordat hy in 'n oostelike rigting vloei en in die Serwiese hoofstad Belgrado in die Donau uitmond.

Geskiedenis

In antieke tye is die Sava Savus genoem. Die naam is dalk afgelei van die Proto-Indo-Europese wortel *sewh1 ("om vloeistof te neem") en die agtervoegsel *eh2, sodat dit letterlik "wat [die grond] besproei" beteken.[2]

Verwysings
  1. "Sava River Basin Analysis Report" (PDF, 9.98 MB) (in Engels). International Sava River Basin Commission. September 2009. p. 13. Geargiveer (PDF) vanaf die oorspronklike op 4 Maart 2016. Besoek op 27 April 2019.
  2. (de) Udolph, Jürgen (28 Maart 2007). "Alteuropa in Kroatien: der Name der Sava/Save". Folia onomastica Croatica (12/13). Besoek op 27 April 2019.

Eksterne skakels
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.