SV Schermbeck

SV Schermbeck is 'n sportklub uit Schermbeck in die deelstaat Noord-Rynland-Wesfale in Duitsland, veral bekend vir sy sokkerafdeling. Behalwe sokker, het die klub ook afdelings vir swem/waterpolo, handbal, tafeltennis, atletiek en pluimbal.

SV Schermbeck

Volledige naam	Spielverein Schermbeck 1912 e.V.
Stigtingsdatum	1912
Tuisveld	Waldsportplatz am Trog, Schermbeck
Kapasiteit	5 000
Kompetisie	Oberliga Wesfale

Die klub is in 1912 gestig as Turnverein Schermbeck. In 1917 het die klub as gevolg van die Eerste Wêreldoorlog ontbind, maar dis in 1919 herstig en met Ballspielverein Schermbeck verenig. In die 1930’s is daar met die sokkerklub Grün-Weiß Schermbeck saamgesmelt om Turn- und Sportverein Schermbeck te vorm. Reeds in die 1938/39-seisoen kon die klub nie meer spanne in die veld stoot nie, aangesien baie van die lede vir militêre diens opgeroep is of by die Hitler Jugend-beweging betrokke was. Die klub het op hierdie stadium op die derde vlak gespeel.

Na die Tweede Wêreldoorlog is die span met die huidige naam herstig. Die klub se beste na-oorlogse prestasie is in 2003 behaal toe daar die eerste keer promosie na die Oberliga Wesfale verkry is.