SV Babelsberg 03

Op 1 Oktober 1903 is die Sport-Club Jugendkraft 1903 deur 'n paar jeugdiges uit die dorp Nowawes gestig. Twee jaar later is Fußball-Club Fortuna 05 opgerig. In 1919 smelt die twee klubs saam tot SV Nowawes 03. In die 1930’s het die klub die Gauliga gehaal. In 1938 is Nowawes ingelyf by die stad Babelsberg en so verander die klubnaam in SV Babelsberg 03. Sewentien maande later het Babelsberg sy stadsregte verloor en 'n wyk van Potsdam geword. Die klub het met Sportfreunde Potsdam saamgesmelt en die Sportvereinigung Potsdam 03 geword.

Na die Tweede Wêreldoorlog is die klub heropgerig as SG Babelsberg en in 1949 het die span aan die eerste DDR-Oberliga-seisoen deelgeneem. In 1949 het die klub met Märkische Volksstimme saamgesmelt en BSG Märkische Volksstimme Babelsberg geword, wat na een seisoen in tipies Oos-Duitse styl verander is na Rotation Babelsberg.

In die 1950/51-seisoen het Hans Schöne die topdoelskieter in die DDR-Oberliga geword met 38 doele, 'n rekord wat nooit verbeter is nie.

In 1961 het die owerhede 'n nuwe klub in Potsdam opgerig (SC Potsdam) en al die goeie spelers van Babelsberg is deur die owerhede verplig om by die nuwe klub aan te sluit. Die klub het selfs Babelsberg se posisie in die tweede liga ingeneem, terwyl Babelsberg weer onder moes begin. Vier jaar later het die klub egter opgehou bestaan en Babelsberg, intussen herdoop na BSG Motor Babelsberg, kon weer sy plek in die liga inneem.

Na die Duitse hereniging het die klub sy ou naam, SV Babelsberg 03, teruggekry en was sy beste prestasie om een seisoen in die 2. Bundesliga deur te bring.

• Amptelike klubblad
• Abseits Guide to German Soccer