Roswell-voorval

Die Roswell-voorval verwys na die gebeure rondom ’n Amerikaanse militêre verkenningsballon wat in 1947 naby Roswell, Nieu-Mexiko, neergestort het.[1] Dit het aanleiding gegee tot bewerings dat dit ’n buiteaardse ruimteskip is wat geval het.

Die Roswell Daily Record kondig op 8 Julie 1947 aan dat beslag gelê is op ’n "vlieënde piering".

Die weermag wou die ware doel van die ballon, om Sowjet-kerntoetse op te spoor, wegsteek en het ná die aanvanklike groot belangstelling in die voorval berig dit was ’n gewone weerballon.[1] Belangstelling oor die ongeluk het afgeneem tot in die laat 1970's, toe mense wat in VVV's belangstel, verskeie komplotteorieë uitgedink het. Daar is beweer een of meer ruimtetuie het by Roswell neergestort, dat die buiteaardse wesens in die tuie deur die weermag gevind is en dat hulle dit probeer wegsteek.

In die 1990's het die weermag die ware aard van die Projek Mogul-ballon bekend gemaak. Tog is gissings oor Roswell steeds gewild in populêre media en komplotteorieë duur voort.

Verwysings
  1. Olmsted, Kathryn S. (2009). "Chapter 6: Trust No One: Conspiracies and Conspiracy Theories from the 1970s to the 1990s". Real Enemies: Conspiracy Theories and American Democracy, World War I to 9/11 (Oxford University Press). ble. 173–204. ISBN 978-0-19-975395-6
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.