Roshen
Roshen is 'n Oekraïense vervaardiger van lekkergoed wat deur die politikus en sakeman Petro Porosjenko[1] besit word. Dit verenig lekkergoedfabrieke in die Oekraïense stede Kijif, Winnitsja, Marioepol en Krementsjoek asook in Klaipėda, Litaue, en Lipetsk, Rusland, onder een dak. Die naam van die maatskappy is afgelei van die eienaar se getranslitereerde van in Engels, Poroshenko. Alle produkte word onder die handelsnaam Roshen bemark.
| Lekkergoedmaatskappy Roshen ДП Кондитерська корпорація «ROSHEN» | |
  | |
| Tipe | Privaat maatskappy |
|---|---|
| Gestig | 1996 |
| Hoofkantoor | Kijif, Oekraïne |
| Gebied bedien | Oekraïne, Russiese Federasie, internasionale mark |
| Industrie | Lekkergoed |
| Produkte | Sjokolade-lekkergoed, koeke, wafels |
| Inkomste | 1 miljard VSA-$ (2010) |
| Webwerf | Roshen |
Die maatskappy vervaardig 'n groot reeks lekkergoed, maar staan veral bekend vir sy sjokoladelekkers en koeke wat in die Karl Marx-sjokoladefabriek in Kijif vervaardig word. Daarnaas word 'n groot verskeidenheid minder gesofistikeerde produkte met 'n tradisioneel hoë sjokolade-inhoud in die laer prysklas aangebied. Roshen is die markleier in die gebied van die voormalige Sowjetunie, maar voer sy produkte ook na lande in die Europese Unie, Verenigde State, Kanada en Israel uit.
In 2012 is Roshen met sy jaarlikse produksievolume van 450 000 ton 18de gelys in die internasionale lekkergoedbedryf se Candy Industry Top 100, 'n lys van die wêreld se grootste lekkergoedvervaardigers. Voordat die Russiese Federasie invoere van Roshen-produkte weens beweerde vals etikettering in Julie 2013 verbied het, het verkope op die Russiese mark sowat 40 persent van Roshen se totale omset verteenwoordig.[2]